1 Corintios 4

Ti ixra̱ kuènté ti sin kjueyá Cristo

1Jahara chrókꞌuíkonra ti jeheni éxi chojni chꞌehe ixra̱ Cristo kixin jeheni mé kꞌuáyéhe̱ni ti ixra̱ tsjakoni ti nkehe kuènté Díos ninkexró kꞌuénoehña. 2Méxra̱ ti nkexro tsꞌáyéhe̱ ijnko ixra̱ la ticháxi̱n tsja̱ko̱xi̱n kixin chaxín jína sichꞌe ti ixra̱. 3A̱ndá janhan la toxakonahña á jahara o̱ nkojín juez chjasintajni tsotsjehe á jína o̱ náhí ti ixra̱ tjétꞌa̱. La kja̱xin janhan la tekahya ijie̱ a̱sená. 4Janhan xráxinka̱konhña á kjuásian nkojín ijie̱, kjánchó jehya tꞌaxrjexín kixin ninkehó ijie̱ chontahya. Náhí. Jehó Ìnchéni mé tsondáchro á chonta ijie̱ o̱ náhí. 5Méxra̱ chrókꞌuekahyara iji̱é nkojín chojni ti na̱xa̱ kjanhña Ìnchéni kixin ti ó tsokjan chꞌan la jehe chꞌan sinchenoxín chꞌan kaín ti nkehe ómó siín ti sítie, la ko jehe chꞌan sinchenoxín chꞌan kaín ti nkehe tjenka̱yáxin a̱sén chojni. A̱ndá Díos mé tsjajon ti nkehe tsjacha nkojnko ti chojni ikjuí jína.

6Kíchóni, nixjahára ti nkehe i kixin jína chrókꞌuejora, ndá xi̱kaha chrókꞌuitjára chrókꞌuejora éxi tja̱ko̱xi̱n chꞌin Apolos la ko janhan, kixin chróchro̱nkaxínra jehó ti nkehe chónta ti xroon itén Díos, kixin ninkexró chrókjuinchenkehya kixin ijnko chojni la a̱ntsí jína tjako, a̱ndá ti íjnko la náhí. 7Méxra̱, ¿xá nkexro kjuajon kjuachaxin kixin a̱ntsí chrókótjetoanra jahara? La ko, ¿xá nkehe chontara kjuajonhña Díos? Ti chontara jehó ti kjuajon Díos la, ¿nkekuènté nchehnkera éxi jahóra tsíkjachara xi̱kaha?

8Jahara ó chontara kaín ti nkehe tjinkáonra, ó rikóra la ichꞌera éxi ijnko rey, la í tjinkákonhñara kixin chrókjuinki̱tsani. Ti chaxín chrókꞌuejora éxi rey la kja̱xini chróchóntani kjuachaxin tsꞌe̱to̱ani. 9Méxra̱ tjénka̱yáxian kixin janhan, ti nkexro kjueyá Ìnchéni, mé Díos kjuajon kjuachaxin kixin tsjixixín chrókꞌuejóni, éxi ti chojni ó tjejóchóhen tsjasóte la ko itsꞌen. Mé xi̱kaha tꞌikon kaín chojni chjasintajni la ko ti sin ángel nkexrín tꞌatsínkani. 10Jeheni tinkáchónkini Cristo la éxi chojni lo̱nti̱ tꞌikon chojni, a̱ndá jahara tꞌikon chojni éxi chojni imá nohe kixin tinkachónkira Cristo. Jeheni éxi chojni kanhñó chónta kjuachaxin, a̱ndá jahara la imá chontara kjuachaxin. Jeheni la tjikosayéhya chojni, a̱ndá imá tjikosáyehe chojni ti jahara. 11Ijie na̱xa̱ tjasótexíni kjinta, tꞌenxíni ìnta̱, chóntahyani ika tsꞌinkáyani, nínkakohen chojni ti jeheni, la ko chóntahyani ndo̱eni, 12#Hch. 18:3.*la ko imá tóxrjéni kixin itjani chꞌexíni ixra̱ inieni. Ti tꞌándaxín sin la jeheni tjancheheni Díos kixin sincheñao ti jehe sin. Ti nchekjasóte sin ti jeheni, la tónínkakuenhñani sin. 13Ti tjontá sin ti jeheni, la nkojína nixje̱he̱ni sin. Tꞌikon sin ti jeheni éxi chji̱nínó siín chjasintajni, éxi ijnko nkehe ninkehó sínkíhya, la na̱xa̱ xi̱kaha sítóhen ijie.

14Ikjian tíhi la jehya tjanoára. Náhí. Ikjian kixin nta̱xráxinkaonra éxi xja̱na kixin tjua̱hára. 15Méxra̱ jahara, kjónté chróchontara ite mil chojni chrókjuákohara nkexrín itjen Cristo, la chontahyara itsjé itꞌára. Janhan mé kꞌóna éxi itꞌára xi̱kaha kixin kuitekáonra Cristo Jesús ti kjuákohára ti itan jína tsaáxinra. 16#1Co. 11:1; Fil. 3:17.*Mé xi̱kaha xrja̱noáhára kixin chrókjuáko̱xinra éxi tjáko̱xián janhan.

17Méxra̱ kuétua̱ha̱n Timoteo tsjiji ntiha. Jehe chꞌan mé imá tjua̱ha chꞌan éxi xja̱na kixin jína ichꞌe chꞌan ixra̱. Ndá tsjiji chꞌan sintaxraxinkaonra nkexrín tsochrehéra Cristo, éxi xráxín tjàkua kaín ni̱nko. 18Nkojinra la ihnkera kixin imá nohara la tjénka̱yáxinra kixin chaxínhña tsjasántsjahára. 19Kjánchó ó tsjasántsjahára ti xi̱kaha tjinkaon Ìnchéni. A̱ndá jehya jehó tsi̱nha̱n ti nkehe nixja ti sin imá ihnke. Náhí. Kja̱xin tsotsjaha̱ á chaxín tjejóchꞌe sin ti ixra̱ nchenkeko sin o̱ náhí. 20Kixin ti kjuachaxin kuènté Díos la jehya ti nkexrín nixja chojni ó. Náhí. Ticháxi̱n tsja̱ko̱xi̱n sin ti kjuachaxin kuènté chꞌan. 21¿Nkehe tjinkáonra? ¿Á chrókjuasán chrókjui̱ntakjasótiara ní? O̱, ¿á tjinkáonra kixin kjuaxróxin chrókjuasántsjahára?

Currently Selected:

1 Corintios 4: poeNTplus

Highlight

Copy