Tito 3
3
Thi rugunda sincheꞌe ni dithikaon Jesucristo
1Nchexraxaon kain ni dithikaon Jesucristo ixin sithikaon na̱ ni thetuꞌan nunthe ko ni thetuꞌan rajna ko sincheꞌe na̱ kain thi jian. 2Ko runichjaꞌa na̱ jianꞌa ixin inaa chujni, tsetukaoꞌa na̱ chujni, icha jian chrjuin runichjee choo na̱ ko jian sakao na̱ kain chujni.
3Ixin jaꞌan ná are saꞌo xruꞌin bechunxin ná ko bagithikaonꞌa ná ngain Ndo Dio, ko banthaxruxian ná banthoꞌo ná kain thi jianꞌa bakiakueꞌen nthauꞌa ná, ko jianꞌa baxraxaon ná ko bakunchjua ná ko xruꞌin chujni bajinao ná ko baningakuꞌen choo ná. 4Aro Ndo Dio, thi binthakjan ná inaa chujni narua, kjuagua ná ndo thi anto thjuaa ná ndo, ko kai thjueꞌe ndo kainxin chujni jii ngataꞌa nunthe, 5ko jeꞌe ndo juinthakjan ná ndo inaa chujni narua ixin kuiakunua ná ndo ko jeꞌa ixin anto jian runthoꞌo ná. Ko binthakjan ná inaa chujni narua ko bijma ná ko Espíritu Santo binthakjan ná inaa chujni ko unthoꞌo ná thi jian. 6Ko ixin Nchaa ná Jesucristo, thi binthakjan ná inaa chujni narua, Ndo Dio chjaa ná Espíritu Santo. 7Ko jiꞌi bincheꞌe ndo ko juinthatjañaa ná ndo thi jie̱ ruguan ná ixin kuiakunua ná ndo ko binthakjan ná ndo inaa chujni narua ko jai techueꞌen ná ixin sunthe ná ngain ndo kainxin nchaꞌon.
8Ko juajna jiꞌi ndua, ko rinaꞌo ixin jaꞌa kain nchaꞌon rundache na̱ ko tsjaguꞌe na̱ juajna jiꞌi, ixin jañaa kain ni dithikaon Ndo Dio sincheꞌe na̱ thi jian. Ko kain jiꞌi jian ko thjengijna kain chujni. 9Ko dixintheꞌa ixin thi nduaꞌa thekin inaa chujni, ko dithikaonꞌa ixin thi nduaꞌa nichja na̱ ixin ndo dachriꞌi na̱ xrachrjen. Ko duñaoꞌa ko thetukoꞌa na̱ are nichja na̱ ixin ley, ixin kain thi nichja na̱ xruꞌin xree ko xruꞌin thjengijna chujni.
10Ko ja̱ chrujan chujni jeꞌo ncheketo chujni ko dithikaonꞌa thi jian juajna xraago, jaꞌa nichjeꞌe na̱ yoo o nii nthiꞌa ixin isincheꞌa na̱ jañaa. Ko ja̱ dithikaonꞌa na̱, dantsjenda na̱. 11Ko ixin thi bincheꞌe chujni mee, jaꞌa unuꞌa ixin dithikaonꞌa juajnee Jesucristo, ko kain thi jianꞌa ncheꞌe xraguxin ixin jikininxin sueꞌen jie̱ ixin kain thi jianꞌa ncheꞌe.
Thi ndachro Pablo ngain Tito
12Are jaꞌan ruruaꞌan ko siji Artemas o Tíquico, jaꞌa tuen sasiꞌi sitsjena ngain rajna Nicópolis ixin nthi̱ꞌa̱ sathuaxin kunithjaue kin. 13Ko thjengijna Zenas, xi nichjaxin chujni, ko Apolos. Ko chjeꞌe na̱ thi rugundeꞌe na̱ ixin xruꞌin sitjeꞌen na̱ ngatja nthiꞌá. 14Ko kain ni dithikaon Jesucristo tsangi na̱ sincheꞌe na̱ thi jian ko tsjengijna na̱ chujni rugundeꞌe, ko jañaa sikon ni thi jian xra ncheꞌe na̱.
Pablo juexin kji̱n xroon ko ruaꞌan juajna
15Ko kain ni te nthiꞌi ruaꞌan na̱ juajna jaꞌa. Kai nthatsaꞌan ñao chjeꞌe juajna kain ni chrjiꞌo ná jian nthi̱ꞌa̱.
Jaꞌan kunixin ansenna nthatsaan ñao Ndo Dio ixin sinthanchaon ra ndo kain ra. Jañaa tsuꞌen.
Currently Selected:
Tito 3: plsNT
Highlight
Copy
Compare
Share
Want to have your highlights saved across all your devices? Sign up or sign in
© 2017, Wycliffe Bible Translators, Inc. All rights reserved.
