Tito 2

Thi tsjaago Tito ngain chujni

1Aro jaꞌa nchekueꞌen chujni jeꞌo thi jitaxin ngain xruen Ndo Dio. 2Ko chujni udachrichjan nchekueꞌen na̱ ixin ndakua sincheꞌe na̱, ko kain nchaꞌon tsjaago na̱ ixin jian thinxin na̱, ko ruxraxaon na̱ jian thi sincheꞌe na̱, ko jeꞌo sithikaon na̱ juajnee Ndo Dio, ko ruthjueꞌe na̱ chujni ko tsixiꞌin na̱ kain thi tangi. 3Ko kai ni nanchrichjan nchekueꞌen na̱ ixin sincheꞌe na̱ thi jikininxin ngathexin kon Ndo Dio, ko runichjaꞌa na̱ thi jeꞌa ndua ixin ncheketo na̱ chujni, ko rukuanꞌa na̱, ko tsjaago na̱ ixin ncheꞌe na̱ thi jian 4ixin jañaa tsjaago na̱ ngain ni nchrii icha chjan ixin ruthjueꞌe xan xixiꞌi xan ko xeꞌen xan. 5Ko ruxraxaon xan jian thi ncheꞌe xan, ko sincheꞌa xan thi jianꞌa, ko jian sakueꞌen xan ni te nchianduꞌa xan ko jian sithikaon xan xixiꞌi xan, ixin jañaa chujni runichjaꞌa na̱ jianꞌa ixin thi jian juajnee Ndo Dio.

6Kai nichjeꞌe kain xan xii ixin sincheꞌa xan thi jianꞌa ixin uchunxin xan thi jian. 7Ko jaꞌa Tito, tjaguꞌe xan kexreen sincheꞌe xan jian, ko are tsjaguꞌe xan, tjaago ixin jian nuꞌa ko jian ncheꞌe kain xra. 8Ko kain nchaꞌon ncheꞌe ko tjaago jian, ixin jañaa tsusuee kain chujni ningakuꞌen thi jian juajna, ko chroꞌa runichja na̱ jianꞌa ixin jaꞌan ná.

9Kai nchekueꞌen ni ncheꞌe xree inaa chujni ixin sithikaon na̱ kain thi dituꞌen na̱ ko jañaa ruchee xi najnii na̱ ko runichjangiꞌa na̱ xa. 10Ko tsemaꞌa na̱ ixin jañaa tsjaago na̱ ixin jian ncheꞌe na̱ xra, ko kain chujni sikon thi jian ncheꞌe na̱, sinchesayeꞌe na̱ Ndo Dio, thi binthakjan ná inaa chujni narua.

11Ko Ndo Dio anto thjuaa ná, mexinxin ruaꞌan xeꞌen ngataꞌa nunthe ixin kain chujni rukjan na̱ inaa chujni narua ko thi jichunxin na̱ xruꞌin nchaꞌon seꞌen. 12Ko thi thjuaa ná ndo tjagua ná ixin tsinthuꞌe ná kain thi jianꞌa, ko itsakuenꞌa ná thi jianꞌa jii ngataꞌa nunthe, ko ngain nchaꞌon teꞌi sinthoꞌo ná kain thi jian, ko kain nchaꞌon sithikaon ná ngain ndo ko ruxraxaon ná jian thi sinthoꞌo ná. 13Ko jañaa ruchuꞌen ná tsii thi nchaꞌon chrjuin, are tsii Ndo Dio Nchaa ná Jesucristo, thi binthakjan ná inaa chujni narua ko thi techunxin ná xruꞌin nchaꞌon seꞌen. 14Ko jeꞌe xrajon beꞌen ixin kain thi jianꞌa binthoꞌo ná, ixin jañaa bintharua ná ko binthakjan ná chujnii jeꞌe, chujni sithikaon ko sincheꞌe thi jian kainxin nchaꞌon.

15Ko jiꞌi thi nchekueꞌen na̱ ixin sithikaon na̱, ko nichjeꞌe na̱ ko nchesatheꞌe na̱ are jianꞌa sincheꞌe na̱ ixin jaꞌa chunda juachaxin thetuꞌan, ko jañaa chujni runichjaꞌa na̱ jianꞌa ixin jaꞌa.

Currently Selected:

Tito 2: plsNT

Highlight

Copy

Compare