Romanos 7
7
Jaꞌan ná xraa ni dinthekaꞌo choo
1Jaꞌa ra xro choo ná, xro chunxin ra ley bayée Moisés, unuꞌa ra ixin ley jiꞌi chunda juachaxin tsetuꞌan ngain chujni jeꞌo are xra techon na̱. 2Jiꞌi xraa naa nchrii thutheꞌe: ley thetuꞌen nchra seꞌe nchra ngain xixiꞌi nchra are jeꞌe xa xrajichon xa, ko are ndaseꞌen xa, ixruꞌin ley tsetuꞌen nchra. 3Mexinxin ja̱ naa nchrii sekaꞌo inaa xii ko xixiꞌi nchra xra jichon xa, jeꞌe nchra jianꞌa ncheꞌe nchra ixin jikaꞌo nchra yoo xii. Ko ja̱ xixiꞌi nchra ndaseꞌen xa, jeꞌe nchra chunda nchra juachaxin tsutheꞌe nchra inaa xii ko jañaa jeꞌa jianꞌa thi sincheꞌe nchra.
4Jañaa jaꞌa ra kai, jaꞌa ra xro choo ná, jaꞌa ra xro tekininxin ra Cristo, xraa undabeꞌen ra ixin ithetuanꞌa ra ley. Jai thetuꞌan ra Cristo, thi xechon ngayee ni ndabeꞌen, ko jai sinthoꞌo ná thi jian ixin tsusayexin Ndo Dio. 5Ixin are saꞌo, are jaꞌan ná xra banthoꞌo ná kain thi bajinao nthauꞌa ná, are mee ley banchekiakuꞌen nthauꞌa ná banthoꞌo ná icha jianꞌa, ko kain thi jianꞌa ná banthagacha ná ixin rukji ná ngathe xruꞌi. 6Aro jai jaꞌan ná xraa undabeꞌen ná ko ithetuanꞌa ná ley, thi ley anto suji baketuan ná, ko jai unchao sithikaon ná Ndo Dio kunixin Espíritu Santo ko sinthoꞌa ná inchin banthoꞌo ná are baketuan ná ley.
Thi jianꞌa jii ngajin ná
7Mexinxin, ¿keꞌe rundachro ná? ¿Rundachro ná ixin ley bayée Moisés, jianꞌa? ¡Naꞌi! Aro jaꞌan ruchunxinꞌa kexeꞌe thi jianꞌa ja̱ rugeꞌa ley. Ixin ley ndachro: “Thiakuenꞌa thi chunda inaa chujni.” Ko ley jiꞌi kununanxin ixin jiꞌi jianꞌa. 8Ja̱ rugeꞌa ley jiꞌi, jaꞌan runchexruxinaꞌa runthaꞌa thi jianꞌa, aro ixin ley juii ngain juarixaunna, icha binthaꞌa thi jianꞌa. Ko thi koꞌa ley, nthi̱ꞌa̱ chujni chunxinꞌa kexeꞌe thi jianꞌa. 9Are jaꞌan xra benunaꞌa thi thetuꞌan ley, are mee, jaꞌan baxraxaꞌon ixin xruꞌin thi jianꞌa banthaꞌa. Ko are jaꞌan ukununa keꞌe thetuꞌan ley, are mee, jaꞌan kununa ixin ubinthaꞌa tsjé thi jianꞌa, ko kai kununa ixin thi jianꞌa beꞌe ngajin ko jaꞌan xraa ndabeꞌen na. 10Ko ley ruchjana juachaxin rugarichon ko xruꞌin nchaꞌon rugeꞌen na, aro jeꞌo kjuaguꞌna ixin jaꞌan jikininxin na tsji ngathe xruꞌi. 11Ixin thi jianꞌa nchexruxiꞌin nthauꞌna bancheyana, kuthimejan banchegunda ley ixin banchekjínxin na ngathexin kon Ndo Dio.
12Mexinxin nchao rundachro ná ixin ley bayée Moisés juixin ngain Ndo Dio, ko xruꞌin thi jianꞌa ncheꞌe ley, ko kain thi thetuꞌan ley jian ko nchao jii. 13Aro thi rindachrjan jiꞌi ixin ley anto jian ley, ¿a ley thi nchao suen na? ¡Naꞌi! Kain thi jianꞌa jaꞌan binthaꞌa, mee thi ndachro ixin jaꞌan jikininxin tsji ngathe xruꞌi, ko thi jianꞌa banchegunda ley ixin kjuaguxin thi jianꞌa jaꞌan binthaꞌa. Ko kai ley jiꞌi kjuaago ixin atho jianꞌa thi ncheꞌe ni.
14Jaꞌan ná nua ná ixin ley jian ixin juixin ngain Ndo Dio, aro jaꞌan xraa kaxeꞌo chujni, ko sujiꞌa na ko xraa ndakuchji na ngain thi jianꞌa ko nthaꞌa thi jeꞌe rinao. 15Ixin jaꞌan thianxinꞌa keꞌe tunna ixin are jaꞌan rinaꞌo sinthaꞌa thi jian, aro chroꞌa. Ko thi jianꞌa jaꞌan rinaoꞌa sinthaꞌa, mee thi jaꞌan nthaꞌa. 16Ko thi jaꞌan rinaoꞌa sinthaꞌa, mee thi jaꞌan nthaꞌa, ko jañaa tjaago ixin ley bayée Moisés jian ley. 17Mexinxin ijeꞌa jaꞌan thi nthaꞌa thi jianꞌa, thi ncheꞌe jiꞌi thi jianꞌa jii ngaxiꞌin nthauꞌna. 18Ixin jaꞌan sujiꞌa na, ko xruꞌin thi jian jii ngain ansenna, mexinxin chroꞌa nthaꞌa thi jian. 19Jaꞌan chroꞌa nthaꞌa thi jian inchin jaꞌan rinaꞌo, ko jeꞌo nthaꞌa thi jianꞌa ke jaꞌan rinaoꞌa. 20Ko are jaꞌan nthaꞌa thi jaꞌan rinaoꞌa, nduaxin jeꞌa jaꞌan nthaꞌa yaa ixin thi jianꞌa jii ngaxiꞌin nthauꞌna, mee thi ncheꞌe yaa.
21Jañaa tunna: Are jaꞌan rinaꞌo sinthaꞌa thi jian, aro chroꞌa ixin jeꞌo nthaꞌa thi jianꞌa jii ngajin. 22Ko ngaxiꞌin ansenna anto rinaꞌo sinthaꞌa inchin thetuꞌan Ndo Dio ngain ley. 23Aro thi jianꞌa jixiꞌin nthauꞌna tajandaꞌa na nthaꞌa inchin rinao juaxraxaunna. Ko thi jianꞌa jii ngaxiꞌin nthauꞌna, thetunna.
24¡Anto chrjuinꞌa tununa jaꞌan! ¿Kensen nchao rugantsje juachaxin jianꞌa jii ngain nthauꞌna ixin senꞌa na? 25Thexruxian Ndo Dio ixin jeꞌo Nchaa ná Jesucristo nchao tsjengijna na jaꞌan. Ko jaꞌan thianxin ixin rugunda sithikaꞌon ley bajon Ndo Dio, aro thi jianꞌa jii ngaxiꞌin nthauꞌna thetunna ko nthaꞌa thi jeꞌe rinao.
© 2017, Wycliffe Bible Translators, Inc. All rights reserved.