Romanos 6
6
Jaꞌan ná inthoꞌa ná thi jianꞌa, jai nthoꞌo ná thi thethuꞌan Jesucristo
1¿Kexreen sinthukjexinxin ná jiꞌi remee? ¿Axra sinthoꞌo ná thi jianꞌa ixin Ndo Dio xra sinthatjañaa ná ndo? 2¡Naꞌi, isinthoꞌa ná thi jianꞌa! Jaꞌan ná ukuentuxiꞌin ná ko inthoꞌa ná thi jianꞌa banthoꞌo ná. Mexinxin, ¿kexreen xrasinthoꞌo ná thi jianꞌa? 3¿Anuaꞌa ra, ixin jaꞌan ná xro bigithe ná, xrabakoꞌo ná Jesucristo ko jaꞌan ná ko jeꞌe kjan ná inchin nakua chujni? 4Ixin are jaꞌan ná bigithe ná, jiꞌi ruchro ixin jaꞌan ná kai xrabakoꞌo ná Jesucristo are jeꞌe ndabeꞌen, ko inchin jeꞌe xechon ixin thi anto jié juachaxiin Ndudaa ná thjen ngajni, kai jaꞌan ná xechon ná, mexinxin basingixin ná ko sakji ná inchin inaa chujni narua.
5Ja̱ jaꞌan ná ko Jesucristo kjan ná inchin nakua chujni ko xrabakoꞌo ná are jeꞌe xrabaa, kai sunthechon ná ngain jeꞌe ixin jeꞌe xechon. 6Ko nua ná ixin kain thi jianꞌa banthoꞌo ná are saꞌo, kain mee undabeꞌen nganito ntha cruz kunixin Jesucristo, ko jañaa juexinxin thi jianꞌa banthaxruxian ná banthoꞌo ná. Ko jai isinthoꞌa ná thi jianꞌa, ko thi jianꞌa ichroꞌa tsethuan ná. 7Ixin are undadeꞌen ni ichroꞌa sincheꞌe ni icha thi jianꞌa. 8Ja̱ undabeꞌen ná kunixin Jesucristo, jaꞌan ná jian nua ná ixin sunthechon ná ngain jeꞌe. 9Ixin jaꞌan ná nua ná ixin Cristo uxechon ko ixruꞌin nchaꞌon rukjan seꞌen inaa ixin thi ndadeꞌen ni ixruꞌin juachaxin chunda ngain Jesucristo. 10Ixin are Cristo ndabeꞌen, thi ndadeꞌen ni juinchetjaan juachaxin ngain Cristo, ko jai jeꞌe jichon ixin nchesayeꞌe Ndo Dio. 11Jañaa jaꞌa ra kai xraxaon ra, xraa undabeꞌen ra ko ichroꞌa sincheꞌe ra thi jianꞌa bincheꞌe ra, aro jai techon ra ixin jeꞌo sinchesayeꞌe ra Ndo Dio ixin Jesucristo.
12Mexinxin jai jaꞌa ra dithuaxinꞌa ra ixin thi jianꞌa xra tsetuꞌan ngain nthauꞌa ra. Ko dithuaxinꞌa ra ixin thi jianꞌa sinthanthaꞌa ra thi jianꞌa nchexruxiꞌin nthauꞌa ra. 13Ko dithuaxinꞌa ra ixin thi jianꞌa sinchegunda nthauꞌa ra ngain kain thi jianꞌa; icha jian xrajon ra ngain Ndo Dio inchin jikininxin chujni undabeꞌen ko kjan xechon. Dithuaxin ra ixin Ndo Dio tsetuꞌan ngain nthauꞌa ra ixin sincheꞌe ra thi jian. 14Ixin thi jianꞌa ixruꞌin juachaxin chunda ngajin ra ixin ley bayée Moisés ithetuanꞌa ngajin ra jai ixin jai thi jian thixin ngain Ndo Dio, mee thi thetuꞌan ngajin ra.
Jaꞌan ná ni nchexree Ndo Dio
15¿Mee jai, keꞌe sinthoꞌo ná?, ixin ithetuanꞌa ná ley ko jai thetuan ná thi thjuaa ná Ndo Dio, ¿a xrasinthoꞌo ná thi jianꞌa? ¡Naꞌi isinthoꞌa ná thi jianꞌa! 16Jaꞌa ra nuꞌa ra jian ixin ja̱ ruxrajon ra sincheꞌe ra xra ngain naa xi najni rugunda sithikaon ra xa, jiꞌi ruchro ixin ndakueꞌna ra xa. Jañaa tuꞌen ni are dithikaon ni thi jianꞌa, ja̱ suthikaon ná thi jianꞌa, ndasitjaan ná. Ko ja̱ suthikaon ná Ndo Dio, jeꞌe ndo sinthatjañaa ná ndo jie̱ ruguan ná. 17Are saꞌo jaꞌa ra xraa ndakueꞌna ra thi jianꞌa, aro jaꞌan thexruxian Ndo Dio ixin jai jaꞌa ra ubithikaon ra kunixin ansean ra thi jian juajnee Ndo Dio uxraguꞌa ra. 18Ko jai ithetunꞌa ra thi jianꞌa ixin jai jaꞌa ra uni nchexree thi jian rinao Ndo Dio. 19Jaꞌan nichja inchin kexeꞌo chujni ixin jaꞌa ra xra chroꞌa thinxin ra jian kain jiꞌi. Ixin are saꞌo jaꞌa ra xrajon ra bincheꞌe ra thi thjuaꞌa ko thi jianꞌa, aro jai xrajon ra ncheꞌe ra thi jian ko jañaa rukjan ra jian chujni ngathexin kon Ndo Dio.
20Are jaꞌa ra xrabinthe ra xraa chujni dikuchji ngain thi jianꞌa, are mee bancheꞌa ra inchin nchexruxiꞌin Ndo Dio. 21¿Aro keꞌe bacha ra are mee? Xruꞌin bacha ra, jeꞌo juasuaxin ixin thi bancheꞌe ra ko banthakjínxin ra ngain Ndo Dio. 22Aro jai thi jianꞌa ithetunꞌa ra ixin jaꞌa ra uxrajon ra ncheꞌe ra xree Ndo Dio, ko jiꞌi jian, ixin jian sinthe ra ngathexin kon ndo, ko jeꞌe ndo sinthagechon ra ko xruꞌin nchaꞌon seꞌen ra. 23Thi chujni ncheꞌe thi jianꞌa sacha na̱ tsji na̱ ngathe xruꞌi. Aro thi juinthathuan ná Ndo Dio nthakjan ná inaa chujni narua ko xruꞌin nchaꞌon seꞌen ná ko sunthe ná ngain Nchaa ná Jesucristo.
© 2017, Wycliffe Bible Translators, Inc. All rights reserved.