Romanos 16
16
Pablo chjee juajna kain chujni chunxin
1Jaꞌan nthatsaꞌan ñao ra ixin xan choo ná Febe. Jiꞌi naa nchrii thjengijna ni thetuꞌan niꞌngo jii ngain rajna Cencrea, thi jii ngandeꞌe ndachaon. 2Jian dayeꞌe ra nchrii jiꞌi, inchin jikininxin sayée ni chujni ncheꞌe xree Jesucristo ko thjengijna ra ko chjeꞌe ra nchra thi rugundeꞌe nchra ixin nchrii jiꞌi tsjé chujni kjuengijna ko kai jaꞌan kjuengijna na nchra.
3Ko chjena ra juajna Priscila ko Aquila ixin kayui ni teꞌi kjuengijna na binthaꞌa xree Jesucristo. 4Ko kayui ni teꞌi xraonꞌa na̱ rugeꞌen na̱ ixin jaꞌan ko thexruxian na̱ ko jeoꞌa jaꞌan, kai ni choo ná, ni niꞌngo jeꞌa judío. 5Ko chjena ra juajna kain chujni xrathe ngain nchiaduꞌa Priscila ko Aquila. Kai chjena ra juajna Epeneto, xi anto jian dakjiꞌan ko anto thjuaa, ko ngain nunthe Acaya xi jiꞌi xi saꞌo bithikaon Jesucristo. 6Chjena ra juajna María, thi anto bincheꞌe xra ngajin ra. 7Chjena ra juajna Andrónico ko Junias thi ni xradikao jnina ko judío na̱ kai, ko bintheaxiꞌin ngajin ngain nduꞌa xiiso, ko ni teꞌi anto thjueꞌe ni kuinchieꞌe Jesucristo ko saꞌo bithikaon na̱ Jesucristo ke jaꞌan.
8Chjena ra juajna Amplias, xi anto jian dakjiꞌan ko kai dithikaon xa Jesucristo. 9Chjena ra juajna Urbano, xi banthakiꞌan xree Jesucristo, kai chjena ra juajna Estaquis, xi anto jian dakjiꞌan. 10Chjena ra juajna Apeles, thi anto tangi bathuꞌe ixin bithikaon Jesucristo. Kai chjena ra juajna kain ni nchianduꞌa Aristóbulo. 11Chjena ra juajna Herodión thi xra dikao jnina. Ko kai chjeꞌe ra juajna kain ni nchianduꞌa Narciso ni kai dithikaon Jesucristo. 12Chjena ra juajna Trifena ko Trifosa ixin ni teꞌi ncheꞌe na̱ xree Jesucristo. Chjena ra juajna Pérsida, nchrii anto bincheꞌe xree Jesucristo. 13Kai chjena ra juajna Rufo, thi anto chunxin chujni ixin ncheꞌe xree Jesucristo, ko kai janee thi kjui xraa janana. 14Chjena ra juajna Ansíncrito, ko Flegonte, Hermas, Patrobas, Hermes, kunixin kain chujni dithikaon Jesucristo te ngain na̱. 15Chjena ra juajna Filólogo, Julia, Nereo ko nchri choo kunixin Olimpas ko kain chujni dithikaon Jesucristo te ngain na̱.
16Chjeꞌe choo ra juajna inchin kukuan ná xro bithikaon ná Jesucristo. Ko kain chujni te ngain kain ningue Jesucristo ruaꞌan ra na̱ juajna.
17Jaꞌa ra xro choo ná, tsjeꞌe ra ixin sinthayaꞌa ra chujni nchetjajin ko ncheketo icha chujni, ko dithikaonꞌa na̱ thi jian juajna kuangi ra jaꞌa ra. Tatoꞌa ra chujni teꞌi. 18Ixin kain chujni teꞌi ncheꞌa xra ixin Nchaa ná Jesucristo, ko jeꞌo ncheꞌe na̱ xra ixin thi rinao nthauꞌe na̱ ko chrjuin nichja na̱ ixin ncheyeꞌe na̱ chujni xradithikaonꞌa jian. 19Kainxin chujni nuꞌe ixin jaꞌa ra dithikaon ra Ndo Dio, ko jiꞌi anto chananxin. Aro jaꞌan rinaꞌo ixin icha jian ruxraxaon ra ixin thi jian ncheꞌe ra, ko ncheꞌa ra jañaa ngain thi jianꞌa. 20Ko Ndo Dio, thi dajon thi chrjuin tunuꞌe anseen ni, utuin sinchethegua nchiijin ngangi ruthaa ra. Ko thi anto chrjuin binthathuan ná Nchaa ná Jesucristo seꞌe ngajin ra.
21Timoteo, thi jian dakjiꞌan ngain xra, chjaa ra juajna; kai chjaa ra juajna Lucio, Jasón ko Sosípater, ni chujnina.
22Pablo chjana xra ko diꞌin na Tercio, ko kji̱n na xroon inchin ndachjejin na, kai chjaꞌa ra juajna ixin dithikaꞌon Nchaa ná.
23Kai Gayo ruaꞌan juajna. Ko jaꞌan riꞌi ngain nchianduꞌa ko kai nthiꞌi xrathe kain ni dithikaon Jesucristo. Kai Erasto, thi tenchjiꞌan tumii rajna ko xan choo ná Cuarto ruaꞌan ra na̱ juajna.
24Ko thi chrjuin juinthathuan ná Nchaa ná Jesucristo seꞌe ngajin ra. Jañaa tsuꞌen.
Nthiꞌi juexinxin juajna jiꞌi
25Nthusayeꞌe ná Ndo Dio, thi nthasuji ra kunixin juajnee Jesucristo, thi jaꞌan kjuaguꞌa ra. Ko juajna jiꞌi jixraago jai, ko kai juajna jiꞌi ubeꞌe are kunchjian nunthe. 26Aro jai uchunxin ni juajna jiꞌi ixin thi dikji̱n ni bagayee juajnee Ndo Dio ixin jañaa kuetuꞌan Ndo Dio, ndo xruꞌin nchaꞌon seꞌen. Ko jiꞌi xraago ngain kain chujni ixin sithikaon na̱ ko ruchunthia na̱ ngain ndo.
27¡Jeꞌo nakua Ndo Dio jii thi nuꞌe kainxin, ko jeꞌe thi jikininxin tsusayeꞌe kainxin nchaꞌon ixin thi bincheꞌe Jesucristo! Jañaa tsuꞌen.
© 2017, Wycliffe Bible Translators, Inc. All rights reserved.