Romanos 15
15
Sinthoꞌo ná inchin Cristo bincheꞌe
1Jaꞌan ná xro jian duthikaon ná juajnee Jesucristo, chroꞌa sinthoꞌo ná jeꞌo thi jaꞌan ná nthaxruxian ná. Icha jian tsixian na̱ ko tsjengijna ná chujni xra jianꞌa thinxin. 2Kain ná rugunda sinthoꞌo ná thi jian ixin sinchexruxiꞌin chujni ko tsjengijna na̱, ko jañaa icha ruchunthia na̱ ngain Jesucristo. 3Ixin Cristo kai bincheꞌa inchin jeꞌe runchexruxiꞌin aro kuꞌen inchin jitaxin ngain Xruen Ndo Dio: “Thi jianꞌa banichja chujni ixin Suixin, betsingataꞌa na jaꞌan.” 4Ixin kain thi betaxin are icha saꞌo ngain Xruen Ndo Dio, ko kain jiꞌi betaxin ixin xraguaxin ná ixin tsangi ná ruchuꞌen ná ko xruꞌin juachjaon ruchunda ná ko icha ruchunthia ná thi bithikaon ná. 5Aro Ndo Dio nthasuji ná ko thjengijna ná ixin kain nchaꞌon sunthe ná ngain ndo, ko ruchjaa ra ndo nakua juaxraxaon inchin kjuaago Jesucristo. 6Ko jamee kain ná, xraa nakua thee chujni sinthusayeꞌe ná Ndo Dio, Ndudee Nchaa ná Jesucristo.
Thi jian juajnee Jesucristo kai tsiꞌin ni jeꞌa judío
7Ko inchin Cristo bayáa ná, jañaa kaxon dayeꞌe choo ra. Ko jañaa sinchesayeꞌe ra Ndo Dio. 8Jaꞌan ndathjo ra ixin Cristo juii bincheꞌe xra ngain chujni judío ni bagithikaon xruꞌe diꞌi circuncisión, ko jiꞌi xraguxin ixin Ndo Dio ncheyaꞌa ndo ko kuꞌen thi ndachro ndo ngain ni ndo dachriꞌa ná xrachrjen. 9Ko kai juii ndo ixin chujni jeꞌa judío sinchesayeꞌe na̱ Ndo Dio ixin jeꞌe ndo kuiakunueꞌe ndo na̱ inchin ndachro Xruen Ndo Dio:
Mexinxin jaꞌan sinthasayaꞌa ngayee chujni jeꞌa judío
ko rutsje na ixin sinthasayaꞌa.
10Ko kai ndachro:
Chaꞌa ra kain ra xro jeꞌa judío ra ngain ni rajnee ndo.
11Ko kai ndachro:
Nchesayeꞌe ra Ndo Dio, kainxin ra xro jeꞌa judío ra
ko kain rajna runichja ixin thi juachaxin jeꞌe chunda.
12Ko Isaías dikji̱n:
Tsunkjiꞌi naa thi sachrjeninxin chujnii Isaí,
ko jeꞌe tsetuꞌen kain rajna te nguii ngataꞌa nunthe;
ko chujni jeꞌa judío ruchunthia na̱ ngain jeꞌe.
13Ko Ndo Dio, thi chunthia ra, ruchjaa ra thi chrjuin tsunuꞌe ansean ra ko ruchaꞌa ra ixin dithikaon ra ngain jeꞌe ndo. Ko jañaa icha ruchunthia ra kunixin juachaxiin Espíritu Santo.
14Jaꞌa ra xro choo ná, jaꞌan jian nuna ixin jaꞌa ra anto thjengijna ra icha chujni ko jian chunxin ra juajnee Jesucristo, ko nuꞌa ra kexreen sinchesatheꞌe choo ra are naa chujni jianꞌa jincheꞌe. 15Ko kji̱ꞌan ra ixin jian tsinxin ra ko rutjañaꞌa ra thi ukuetuꞌan ra ko jiꞌi nthaꞌa ixin Ndo Dio kuetunna 16ko jañaa nthaꞌa xree Jesucristo ngayee chujni jeꞌa judío ixin tsjaago juajnee Ndo Dio. Ko jañaa ni teꞌi tsji na̱ xraa naa thi nchendusen ni ngain Ndo Dio ko sinchexruxiꞌin ndo ixin Espíritu Santo binchekjan na̱ chujni jian.
17Jaꞌan chunda keꞌe tsainxin ñaꞌo ixin nthaꞌa xree Ndo Dio ko Jesucristo jii ngajin na. 18Jaꞌan jeꞌo runichja kexreen binchegunda na Jesucristo ngain chujni jeꞌa judío ixin sithikaon na̱ Ndo Dio. Ko jiꞌi binthaꞌa jeoꞌa ixin thi nichja, kai ixin thi binthaꞌa. 19Ko binthaꞌa thi xra bagikunxinꞌa chujni ko banthaxruan chujni niꞌi kunixin juachaxiin Espíritu Santo. Ko jaꞌin kjuiꞌan juajnee Jesucristo ko kuexianxin Jerusalén ko baso ngain nuntheꞌe Ilírico ko kain rajna te ngandajin. 20Ko jaꞌan bakee ngain ansenna rukjiꞌan juajnee Jesucristo ngain rajna xra bakinꞌa na̱ ko bechunxinꞌa na̱ juajna. Ixin irugundaꞌa tsjaago juajna jiꞌi, thi udikjaago na̱ juajna. 21Ko icha jian tsuꞌen inchin jitaxin ngain xruen Ndo Dio:
Chujni xra naꞌa kuiꞌin juajna ixin jeꞌe, sikon na̱;
ko chujni xra naꞌa kuiꞌin ixin jeꞌe, ni teꞌi tsinxin na̱.
Pablo xraxaon tsji Roma
22Ko ixin xra jiꞌi, jaꞌan chroꞌa basutsjaꞌa ra maski tsjé nthiꞌa binaꞌo rugasutsjaꞌa ra. 23Aro jai ujuexin xrana ngain rajna teꞌi. Ko utsjé nano jaꞌan rinaꞌo sasutsjaꞌa ra, 24ko are satho nthi̱ꞌa̱ sasutsjaꞌa ra are tsji España. Ko are usariꞌi ngajin ra ko ruchaa ná kanxion nchaꞌon, jaꞌan chuan ixin jaꞌa ra tsjengijna ni ra ixin ruruaa nthiana. 25Aro jai jaꞌan tsji Jerusalén ixin tsjiꞌan tumi ngain chujni dithikaon Jesucristo. 26Ixin ni niꞌngo Macedonia ko Acaya xraxaon na̱ bajon na̱ tumi ixin ruaꞌan na̱ ngain chujni nua ubithikaon Jesucristo nthi̱ꞌa̱ Jerusalén. 27Jeꞌe na̱ bincheꞌe na̱ jiꞌi ixin bachrjexin ngain anseen na̱, aro jikininxin sincheꞌe na̱ jiꞌi; ixin ni judío bayéxin ni jeꞌa judío thi jian juajna juixin ngain Ndo Dio, jañaa kai ni jeꞌa judío jikininxin na̱ sajon na̱ tumi tsjengijnaxin na̱ ni judío. 28Ko are tsjexin xra jiꞌi ko sajon tumi ngain chujni te Jerusalén, kuthimejan satsji España ko are mee satho sasutsjaꞌa ra kai. 29Jaꞌan nuna jian ixin are jaꞌan saso rajna Roma, jaꞌan tsjé tsekiꞌan ra ixin kexreen binchenchaon ná, thi jian juajnee Jesucristo.
30Jaꞌa ra xro choo ná kunixin juachaxiin Nchaa ná Jesucristo ko thi thjueꞌe choo ná inchin kjuagua ná Espíritu Santo, nthatsaꞌan ñao ra thjengijna ni ra ko nichjeꞌe ra Ndo Dio ixin jaꞌan. 31Nchetseꞌen ra ñao Ndo Dio tsjengijna na ixin xruꞌin sincheꞌe na chujni dithikaonꞌa Jesucristo nthi̱ꞌa̱ Judea. Ko chujni dithikaon Jesús nthi̱ꞌa̱ Jerusalén jian sayée na̱ tumi tsjian na̱. 32Ko are sasutsjaꞌa ra, ja̱ Ndo Dio sajon juachaxin, jaꞌan anto ruchaꞌna ko anto chrjuin tsununa ko sinthajugaꞌa nthi̱ꞌa̱ ngajin ra. 33Ko Ndo Dio, thi dajon thi chrjuin tunuꞌe anseen ni, seꞌe ngajin ra. Jañaa tsuꞌen.
© 2017, Wycliffe Bible Translators, Inc. All rights reserved.