Romanos 1
1
Pablo dajon juajna ngain ni romano
1Jaꞌan Pablo na, thi ncheꞌe xree Jesucristo, ko jeꞌe thi bayaꞌna ko kuinchieꞌna ixin tsjiꞌan juajnee Ndo Dio ngain kain chujni.
2Ko are usee Ndo Dio ubinchegayee juajna jiꞌi ni bagayee juajnee ndo ko kji̱n na̱ juajna, 3ko juajna jiꞌi thi jinichja ixin Jesucristo, Xeꞌen Ndo Dio. Ko ixin nthiꞌi ngataꞌa nunthe, Jesucristo thi bachrjeninxin rey David. 4Aro Ndo Dio binchexechon Jesucristo kunixin juachaxiin Espíritu Santo, ko jañaa xraago ixin Jesucristo Xeꞌen Ndo Dio. 5Ko ixin Jesucristo kuinchieꞌna ná ko binchekininxin ná tsjiꞌan ná juajnee Ndo Dio nguixin ngataꞌa nunthe ko chujni sithikaon na̱ ngain ndo. 6Ko ngayee kain ni teꞌi, te ra jaꞌa ra kai ixin rukjan ra xeꞌen Jesucristo.
7Mexinxin jaꞌan rikji̱ꞌan ra xroon jiꞌi, jaꞌa ra xro te ra ngain rajna Roma, xro anto thjuaꞌa ra Ndo Dio ko bayaꞌa ra ndo ixin rukjan ra chujni tsinthuꞌe thi jianꞌa ko dithikaon ndo. Ko jaꞌan danchiaa Dio Ndudaa ná, kunixin Nchaa ná Jesucristo, sinthanchaon ra ko ruchjaa ra thi chrjuin tsunuꞌe ansean ra.
Pablo rinao sitsjeꞌe chujni te nunthe Roma
8Saꞌo thexruxian Ndo Dio kunixin juachaxiin Jesucristo ixin jaꞌa ra ixin nguixin nunthe nichja na̱ kexreen jaꞌa ra dithikaon ra Jesucristo. 9Ko ngain ansenna dachrjexin nthaꞌa xree Ndo Dio ixin thjiꞌan juajnee Xeꞌen ndo, ko Ndo Dio nuꞌe ndo jian ixin jaꞌan nanao nthatsaan ñao ndo ixin jaꞌa ra. 10Ko kain nchaꞌon nthatsaan ñao Ndo Dio ixin ja̱ jeꞌe ndo sinao ndo ruchjana ndo juachaxin sasutsjaꞌa ra. 11Ixin jaꞌan rinaꞌo sikon ra ko tsjaguꞌa ra kexreen sithikaon ra Jesucristo icha jian, 12jiꞌi ruchro ixin jaꞌa ra ko jaꞌan tsjengijna choo ná ixin suthikaon ná Jesucristo.
13Rinaꞌo tsunuꞌa ra, jaꞌa ra xro bithikaon ra Jesucristo, ixin tsjé nthiꞌa xraxaꞌon rugasutsjaꞌa ra, aro ditjanxinꞌa thi tajandaꞌa na sasutsjaꞌa ra. Jaꞌan rinaꞌo saso nthi̱ꞌa̱ Roma ixin tsjaguꞌa ra juajnee Jesucristo ixin tsjé chujni sithikaon na̱ inchin bithikaon na̱ ngain ikanxion nunthe. 14Ko jaꞌan tununa ixin rugunda tsji sinthanua kain chujni ixin juajnee Jesucristo, ngain ni griego ko ni jeꞌa griego, ngain ni nuꞌe xroon ko ngain ni nueꞌa xroon. 15Mexinxin anto rinaꞌo saso Roma ixin runichja juajnee Jesucristo.
Juajnee Jesucristo chunda jié juachaxin
16Jaꞌan tusuanaꞌa ixin juajnee Jesucristo, ixin juajna jiꞌi thi juachaxiin Ndo Dio ixin kain thi thiꞌin ko dithikaon kjan inaa chujni naruaxin, ko juajna jiꞌi saꞌo kjui ngain chujni judío kuthejan ngain ni jeꞌa judío. 17Ko juajnee Jesucristo jiꞌi thi tjagua ná kexreen bitjañaa ná kain thi jianꞌa binthoꞌo ná. Inchin jitaxin ngain Xruen Ndo Dio: “Ko thi ni Ndo Dio juinchetjañeꞌe ko chunthia na̱ ngain ndo, ni teꞌi sinthechon na̱ kain nchaꞌon.”
Chujni dithikaonꞌa Ndo Dio
18Jaꞌan ná nua ná ixin thi anto suji jie̱e̱ Ndo Dio thixin ngajni ngataꞌa chujni jianꞌa ko chujni ncheꞌa thi jikininxin. Ko ixin thi jianꞌa ncheꞌe na̱ tajandaꞌa na̱ tununxin thi ndua. 19Kain chujni nuꞌe na̱ ixin jii Ndo Dio ixin jeꞌe ndo kjuague ndo na̱. 20Ixin maski chroꞌa dukon ná Ndo Dio, aro nchao satsuan ná ndo ixin kain thi juinchechjian ndo. Ko thi jié juachaxin chunda ndo xruꞌin nchaꞌon tsjexin, mexinxin chujni jianꞌa chroꞌa rundachro na̱ ixin xruꞌin Ndo Dio jii. 21Ko kain chujni teꞌi maski bechunxin na̱ Ndo Dio, kuexruxinꞌa na̱ ndo ko binchesayeꞌa na̱ ndo inchin jikininxin ko tabitjaan na̱ ngain juaxraxauen na̱ ko anseen na̱ ndatjajin ko bincheꞌe na̱ juxon thi jianꞌa. 22Ko ndachro na̱ ixin anto benuꞌe na̱ aro nduaꞌa ixin xruꞌin bechunxin na̱. 23Ixin ijuinchesayeꞌa na̱ Ndo Dio, thi ndo xruꞌin nchaꞌon seꞌen, ko juinchesayekua na̱ thi diuchjan nchechjian xii, thi te xraa chujni, xraa kunthua, xraa kuxiigo chunda noo ruthee ko thi te xraa kunchee.
24Mexinxin Ndo Dio kuajanda na̱ sincheꞌe na̱ thi sitaꞌa jaa na̱ ko thi jianꞌa juaxraxauen na̱ banchexraxaon na̱ thi jié juasuaxin bincheꞌe na̱. 25Ko jañaa jeꞌe na̱ ibithikaonꞌa na̱ thi ndua ndachro Ndo Dio, ko icha bithikaon na̱ thi nduaꞌa. Ko icha juinchesayekua na̱ kain thi juinchechjian ndo ko ijuinchesayeꞌa na̱ jeꞌe ndo, ndo jikininxin rukusayeꞌe kainxin nchaꞌon. Jañaa tsuꞌen.
26Mexinxin Ndo Dio kuajanda na̱ sincheꞌe na̱ thi sitaꞌa jaa na̱ ko ni nchrii ixraxaonꞌa rugejuakaꞌo na̱ naa xii ko xraxaon na̱ binthejuakaꞌo choo na̱ nchrii ko nchrii. 27Ko jañaa kai ni xii basingixin xa ko ixraxaonꞌa bejuakaꞌo xa ni nchrii, ko teche xa sincheꞌe xa thi rinao xa ixin sejuakaꞌo choo xii ko xii, ko anto jié juasuaxin ncheꞌe xa, mexinxin nthauꞌe xa detan tangi ixin thi jianꞌa ncheꞌe xa.
28Ko ixin chujni teꞌi juinaoꞌa bithikaon na̱ Ndo Dio, mexinxin jeꞌe ndo takuajanda na̱ sincheꞌe na̱ thi jianꞌa xraxaon jaa na̱. 29Ko chujni teꞌi ncheꞌe na̱ thi jikininxinꞌa, ko anto jianꞌa na̱ ko thiakuꞌen na̱ thi jii ngataꞌa nunthe. Ko ni teꞌi chjueꞌe na̱, duen na̱ chujni, nchexruxiꞌin na̱ theto na̱, chjeeya na̱ ko nichja na̱ thi nduaꞌa. 30Ko nichja na̱ jianꞌa ixin icha chujni, ningakuꞌen na̱ Ndo Dio, tjanua na̱ chujni, taꞌin ñao na̱, tunuꞌe na̱ anto renthe na̱ ko juxon texraxaon na̱ kexreen sincheꞌe na̱ thi jianꞌa ko dithikaonꞌa na̱ ni nduꞌe na̱. 31Ko rinaoꞌa na̱ thinxin na̱, ncheꞌa na̱ thi ndachro na̱, xruꞌin chujni thjueꞌe na̱, nueꞌa na̱ nchetjaaña na̱ ko nueꞌa na̱ thiakunueꞌe na̱ chujni. 32Ko jeꞌe na̱ nuꞌe na̱ jian ixin Ndo Dio kuetuꞌan ndo ixin kain chujni ncheꞌe thi jianꞌa jikininxin seꞌen na̱, aro maski jamee, jeꞌe na̱ xrabancheꞌe na̱ thi jianꞌa ko bachee na̱ bagikon na̱ icha chujni bancheꞌe thi jianꞌa.
© 2017, Wycliffe Bible Translators, Inc. All rights reserved.