Hechos 28
28
Pablo jii ngain nunthe Malta
1Ko are ibenꞌa ná ni naa ná ko kain ná jian te ná, kuthejan kununa ná ixin nunthe jiꞌi diꞌin Malta. 2Ko chujnii nunthe teꞌi anto jian bayeꞌna ná na̱, aro jichjee chrin ko anto jitunkin. Mexinxin jeꞌe na̱ juinchekaon na̱ naa xruꞌi ko ndachjejin ná na̱ ixin ruxixruna ná. 3Ko Pablo batse inchín ntha niꞌo ko jidankathe nthaniꞌo xruꞌi, are bachrjengindekjio naa kunchee sajithingeꞌe ba xruꞌi ko juineꞌe ba ko taberianda ba nganito raa Pablo. 4Are bikon ni nunthe jiꞌi ixin kunchee tajirianda ba nganito raa Pablo ndache choo na̱:
—Xii jiꞌi achrujan chujni buen xa, maski benxinꞌa xa ngain ndachaon, jie̱e̱ Ndo Dio tajandaꞌa xa sechon xa.
5Aro Pablo kuntsjenga raa ko banka ba ngathe xruꞌi. Ko xruꞌin kuꞌen Pablo. 6Ko kain na̱ techuꞌen na̱ tarugatjue raa ko rugetsingakjio ko ndarugeꞌen, aro anto chuꞌen na̱ ko are bikon na̱ ixin xruꞌin kuꞌen, basingixin na̱ thi xraxaon na̱ ko kuexiꞌin na̱ ndachro na̱ ixin Pablo naa dio.
7Ko nthi̱ꞌa̱ chiaon beꞌe kainxion jngi ko thi jngiꞌi biꞌin Publio ko xi jiꞌi xi icha baketuꞌan ngain nunthe Malta. Ko jeꞌe xa anto jian bayeꞌna ná xa ko chjana ná xa thi bundana ná nii nchaꞌon. 8Ko are mee ndudee Publio bagingathjenꞌa ndo ixin anto suji sua ko thi thiin tseꞌe bechunda ndo. Kuthejan Pablo kjui bitsjeꞌe ndudee Publio ko kuentaꞌa raa ngataꞌa ndo ko nichjayee Ndo Dio ko ndaxingameꞌe. 9Ko are kunuꞌe kain ni beniꞌi binthe ngain nunthe jiꞌi ixin ndudee Publio xingameꞌe, kjui na̱ bikjee na̱ Pablo, ko kain na̱ xingameꞌe na̱. 10Kuthejan anto tsjé binchethunꞌna ná na̱, ko are sakjui ná chjana ná na̱ kain thi rugundana ná.
Pablo biji Roma
11Ko nii kunithjao binthe ná ngain nunthe Malta. Kuthimejan kuanito ná inaa ntha barko bathuexin kunithjaue kin nthi̱ꞌa̱, ntha jiꞌi juixin Alejandría. Ko ntha jiꞌi benganito yoo diuchjan banchegiꞌin na̱ Cástor ko Pólux. 12Ko baso ná ngandeꞌe rajna Siracusa. Ko nthi̱ꞌa̱ bithunna ná nii nchaꞌon. 13Ko nthi̱ꞌa̱ sakjuixin ná nuxon ngandeꞌe ndachaon ko baso ná rajna Regio ko nduexin kuexiꞌin kjua chrintho juixin sur. Ko yoo nchaꞌon basuxin ná rajna Puteoli. 14Ko nthi̱ꞌa̱ betan ná kanxion ni ubagithikaon Jesús, ko jeꞌe na̱ ndachjejin ná na̱ ixin rugithuna ná yaato nchaꞌon ngain na̱, kuthejan baso ná Roma. 15Ko kain ni bagithikaon Jesús binthe nthi̱ꞌa̱ ngain rajna Roma ubenuꞌe na̱ ixin jaꞌan ná rugaso ná. Mexinxin bigetanxin ná na̱ ngain ndaasin diꞌin Foro de Apio ko ikanxion na̱ ngain nunthe diꞌin thi Nii Taberna. Ko are bikon ná ni teꞌi, Pablo kuexruxiꞌin Ndo Dio ko anto chrjuin kunuꞌe. 16Ko are baso ná Roma, xi thetuꞌan xi soldado bajon xa kain ni bintheaxiꞌin ngain inaa xi thetuꞌan xi soldado nthi̱ꞌa̱ Roma, aro Pablo chjee na̱ naa nchia thi beꞌe jeꞌo, ko nakua xi soldado bagenda.
Pablo kjuaago juajnee Ndo Dio nthi̱ꞌa̱ Roma
17Ko are batho nii nchaꞌon ko ubaso ná Roma, Pablo ruaꞌan juajna xrathe kain ni judío icha renthe te nthi̱ꞌa̱ Roma, ko are uxrathe na̱, Pablo ndachro:
—Jaꞌa ra xro choo ná, xro rajna judío ná, jaꞌan xruꞌin thi jianꞌa juinthaꞌa ngain rajnaa ná ko xruꞌin thi jee kjuaago inchin ubenuꞌe ni ndo dachriꞌa ná xrachrjen, ko maski jamee, kanxion ni judío tse na na̱ ko bajon na na̱ ngain ni romano. 18Ko ni romano juinchekenduenꞌna na̱ ñaꞌo ko kuiꞌin na̱ ixin jaꞌan xruꞌin thi jianꞌa juinthaꞌa ko juinao na̱ rukajanda na na̱. 19Aro ni judío chroꞌa na̱. Mexinxin jaꞌan banchia ixin xi thetuꞌan Roma sinchena jie̱. Ko nduaxin rinaoꞌa ruxraxinthe ni naa chijni ni rajnana. 20Mexinxin jaꞌan bayaꞌa ra ixin juinaꞌo rugikon ra ko rukekiꞌan ra ixin jaꞌan kai richunthia thi chunthia kain ni Israel, mexinxin jichriaxin rana kunixin chia teꞌi.
21Kuthejan jeꞌe na̱ ndachro na̱ ngain Pablo:
—Jaꞌan ná xruꞌin xroon kji̱nꞌna ná ni te nthi̱ꞌa̱ Judea ixin jaꞌa, ko ni juixin nthi̱ꞌa̱ ni naa na̱ nichjaꞌa na̱ jianꞌa ixin jaꞌa. 22Aro jaꞌan ná rinaꞌo ná tsununa ná kexreen xraxaon jaꞌa ixin thi ni dithikaon Jesús, ixin thian ná nichja na̱ jianꞌa ixin jeꞌe na̱.
23Kuthejan ni xrathe nthi̱ꞌa̱ bakeꞌe na̱ naa nchaꞌon ixin ruxrathe na̱ inaa ko anto tsjé chujni xrathe ngain nchia beꞌe Pablo. Ko jeꞌe kjuaago juajnee Ndo Dio nguii nchaꞌon mee. Kuexinxin kjuaago ngain ley Moisés ko kain thi dikji̱n ni bayée juajnee Ndo Dio ixin juinao runchegatsuan na̱ juajnee Jesús. 24Ko jngujngujnio na̱ bithikaon na̱ thi ndachro Pablo aro ni icha bithikaonꞌa na̱. 25Aro chroꞌa kuinxiꞌin choo na̱ ko kuexiꞌin na̱ sakjui na̱, ko Pablo ndache na̱:
—Anto ndua thi ndachro Espíritu Santo ngain ni ndo dachriꞌa ná xrachrjen are nichja Isaías, ko ndachro:
26Thji ko ndache rajna jiꞌi:
Maski icha tsiꞌin na̱, jeꞌe na̱ tsinxinꞌa na̱.
Maski icha sikon na̱, aro satsunꞌa na̱ thi sikon na̱;
27ixin anseen chujni teꞌi ndakuncha,
ko ndakuaꞌa thiꞌin na̱
ko tatejee jmakon na̱
ixin sikunxinꞌa na̱ jmakon na̱.
Ko thinxinꞌa na̱ ixin ndatsjuen na̱,
ko chroꞌa tsinxin na̱ ixin anseen na̱,
ko rinaoꞌa na̱ kjan na̱ ko rinaoꞌa na̱ ixin jaꞌan sinthaxruaan na̱.
28Ko Pablo kai ndachro:
—Mexinxin tunuꞌa ra jian ixin jai tsexinxin Ndo Dio sinchetjañeꞌe ndo kain thi jianꞌa bincheꞌe chujni jeꞌa judío ko jeꞌe na̱, jaan, tsinxin na̱.
29Ko are juexin nichja Pablo kain jiꞌi, sakjui kain ni judío ko anto kuyauthe choo na̱ ixin thi kuiꞌin na̱.
30Ko Pablo tabeꞌe yoo nano ngain nchia bakjengaꞌa ꞌna. Ko nthi̱ꞌa̱ bagayexin kain chujni bagitsjeꞌe. 31Ko Pablo banichja juajnee Ndo Dio ko bakjaago thi bincheꞌe Jesucristo ko xruꞌin chujni bangakuen.
© 2017, Wycliffe Bible Translators, Inc. All rights reserved.