Santiago 2

Xrajeꞌo sincherenthe ni kain chujni

1Jaꞌa ra xro choo ná, xro chunthia ra Nchaa ná Jesucristo thi chunda kain juachaxin, jaꞌa ra chroꞌa sincherenthe ra jeꞌo chujni sinao ra. 2Ixin ja̱ ngain ningua ra sixiꞌin naa chujni anto jian luntho jingaa kunixin kuchianingo anto renthe, ko kai sixiꞌin naa chujni nua ko jingaa naa luntho nthalinchrjen, 3ko ja̱ icha ncherenthe ra thi jingaa luntho jian ko rundachro ra ngain: “Jaꞌa nthiꞌi dariꞌi”, ko ngain chujni nua rundachro ra: “Jaꞌa yaa daringathjinkua, o dariꞌi ngatakua nunthe”, 4are jañaa tencheꞌe ra, ¿a jeꞌa jeꞌo tencherenthe ra chujni icha rinao ra, ko tetsjeꞌo ra kunixin naa jianꞌa juaxraxaon chujni nua?

5Jaꞌa ra xro choo ná, xro anto thjuaꞌa ra, thiꞌin ra: Ndo Dio kuinchieꞌe chujni nua ngataꞌa nunthe jiꞌi ixin icha ruchunthia na̱ ngain Jesucristo, ko sayée na̱ thi ndachro Ndo Dio sajon ndo ko sinthe na̱ ngain thi thetuꞌan ndo, jañaa inchin ndachro ndo. Ko jiꞌi sayée kain chujni thjueꞌe ndo. 6Aro jaꞌa ra anto ncherentheꞌa ra chujni nua. ¿A jeꞌa chujni anto chunda anto nthanthaꞌa ra na̱ xra, ko xra dichro na̱ jie̱ ixin jaꞌa ra? 7Ko, ¿a jeꞌa chujni teꞌi, chujni nichja jianꞌa ixin Nchaa ná, thi jaꞌan ná chunthia ná?

8Ja̱ ndua dithikaon ra thi thetuꞌan Ndo Dio, jian tencheꞌe ra inchin jitaxin ngain Xruen ndo: “Thjueꞌe ra icha chujni jañaa inchin thjueꞌe ra nthauꞌa ra.” 9Aro ja̱ texion chujni ncherenthe ra, tencheꞌe ra thi jianꞌa ixin tencheꞌa ra inchin thetuꞌan Ndo Dio. 10Ixin thi chujni ncheꞌe kain thi thetuꞌan ley Ndo Dio, aro ja̱ bincheꞌa kunixin nakua thi thetuꞌan ndo, chujni mee xraa bithikaonꞌa kain thi kuetuꞌan ndo. 11Ixin thi ndachro: “Darichrikoꞌa nchri jeꞌa chriꞌa, o xi jeꞌa xixiꞌa”, kai ndachro: “Duenꞌa chujni.” Ko ndua richundaꞌa nchri kuxaꞌa o xi kuxaꞌa, aro buꞌen naa chujni, jiꞌi ruchro ixin bithikaonꞌa kain thi thetuꞌan ley ndo. 12Mexinxin nichja ra ko ncheꞌe ra jian inchin chujni jikininxinꞌa sueꞌen jie̱ ixin ley Ndo Dio binthakjan ná jian chujni ixin buthikaon ná Jesucristo. 13Ixin Ndo Dio tsiakunueꞌa chujni thiakunueꞌa inaa chujni. Ixin thi thiakunueꞌe ni chujni, sinthagacha ná are suan ná jie̱.

Rugunda ruchunthia ni ko sincheꞌe ni thi jian

14Jaꞌa ra xro choo ná, ja̱ chrujan thi rundachro ixin chunthia ko xruꞌin thi jian ncheꞌe, ¿a jeꞌo ixin chunthia, nchao rukjan inaa chujni narua? 15Ja̱ chrujan xan choo ná, xan nchrii o xan xii, chundaꞌa xan luntho dengaa xan ko thi jine xan, 16ko ja̱ jngujngujni ra rundache ra xan: “Jian tsjiꞌa ra; jian dinthetsii ra ko jian jinthe ra ko tsujaꞌa ra”, aro dajonꞌa ra thi rugundeꞌe xan, xruꞌin xree thi jeꞌo nichja ra. 17Jañaa kai ja̱ jeꞌo chunthia ra ko xruꞌin thi jian ncheꞌe ra, xruꞌin xree.

18Aro chrujan chujni rundathjo: “Jaꞌa chunthia ngain Jesucristo, ko jaꞌan nthaꞌa thi jian.” Mexinxin tjaguꞌna: “Kexreen nchao chunthia ni ngain Jesucristo ko ncheꞌa ni thi jian, ko jaꞌan tsjaguꞌa ixin chunthia ixin thi jian nthaꞌa.” 19Ja̱ dithikaon ixin nakuaxinxon Ndo Dio jii, jaꞌa jian rincheꞌe, aro kai nchiijin dithikaon, ko xranga ixin juaxraon. 20Dariꞌa xraja; thinxin jian ixin thi chunthia ni xraago ixin thi jian ncheꞌe ni ixin ja̱ jeꞌo ruchunthia ni ko ncheꞌa ni thi jian, mee xruꞌin xree. 21Ndudaa ná Abraham kjan jian chujni ngathexin kon Ndo Dio, are binchendusen xan Isaac ko ruguen xan ngataꞌa xro ruchetaxin xan. 22¿A ubikon ixin thi bincheꞌe Abraham kjuaguxin thi chunthia? Ko thi anto chunthia xethja ko kurenthe ixin thi bincheꞌe. 23Ko jaꞌin kuꞌen ixin xethja thi ndachro Xruen Ndo Dio: “Abraham bithikaon ngain ndo, ko jeꞌe ndo ndachro ndo ixin Abraham kjan jian chujni”. Ko biꞌin xi jian dakao ndo.

24Ubikon ra ixin Ndo Dio nthakjan ná jian chujni ixin thi jian nthoꞌo ná, ko jeoꞌa ixin thi chunthia ná. 25Ko xrajeꞌo kuꞌen Rahab, thi nchrii bakuchji ngain xii. ¿A jeꞌa Ndo Dio binchejian nchra ixin thi jian bincheꞌe nchra?, ixin bajon nchra nchia thi bithuꞌe ni bitsaaya ko ixin ndachro nchra ixin ujee nthiꞌá sarunthekingaxin na̱. 26Ko jañaa kai nthauꞌe ni, ja̱ koꞌa espíritu ngain nthao ndadigeꞌen nthao, jañaa kai thi chunthia ni ndadigeꞌen, ja̱ ncheꞌa ni thi jian.

Currently Selected:

Santiago 2: plsNT

Highlight

Copy

Compare