Hebreos 13

Thi rugunda sincheꞌe ni dithikaon Jesucristo

1Thinthueꞌa ra thi thjueꞌe choo ra kainxin nchaꞌon. 2Ko xruꞌin nchaꞌon tjañaꞌa ra ixin jian dayéꞌe ra chujni diji ngain nchiandui ra. Ixin kaixion chujni bincheꞌe jañaa, maski jeꞌe na̱ benueꞌa na̱ ixin bayée na̱ angeel Ndo Dio ngain nchianduꞌa na̱.

3Ko xraxaon ra ixin kain chujni teaxiꞌin ngain nduꞌa xiiso, xraa inchin jaꞌa ra rugiaxiꞌan ra kai. Kai xraxaon ra ixin chujni bikaon ixin Jesús, xraa inchin jaꞌa ra rugikaon ra ko nthauꞌa ra rukiin kai.

4Kain ra xro ukuthaꞌa ra, ncherenthe ra thi thutheꞌe ni, ko dinthechrikoꞌa ra ngataꞌa sauan ra thi jeꞌa chriꞌa ra ko thi jeꞌa xixiꞌa ra ixin Ndo Dio sincheꞌe jie̱ kain chujni dejuakaꞌo choo ko xra thutheꞌa ko kain chujni chunda xi kuxeꞌe o nchri kuxeꞌe.

5Thiakuenꞌa ra sinthechunda ra tsjé tumi, icha jian chaꞌa ra kunixin jeꞌo thi utechunda ra ixin Ndo Dio ndachro ndo: “Jaꞌan xruꞌin nchaꞌon tsinthuaꞌa jaꞌo, ko xruꞌin nchaꞌon satsjixin ngajin.” 6Mexinxin jai jaꞌan ná ixin chunthia ná ngain ndo, nchao rundachro ná:

Ndo Dio thjengijna na jaꞌan;

ko ruxraonꞌa na ngain chujni rinao sinchegatho na tangi.

7Ko xraxaon ra ixin thi ni dakuꞌan ra jaꞌa ra xro chujni niꞌngo ra, ni ndathjo ra thi jian juajnee Ndo Dio. Kai xraxaon ra kexreen bancheꞌe na̱ ixin bechunthia na̱. Jaꞌa ra kai chunthia ra inchin jeꞌe na̱ chunthia na̱ ngain Ndo Dio.

8Jesucristo dasingixinꞌa ixin jeꞌe xrajeꞌo jna, jai, ko kainxin nchaꞌon. 9Jaꞌa ra dithuaxinꞌa ra ixin icha chujni sinthakuaꞌan ra na̱ inaa juajna nichja thi nduaꞌa. Icha jian tsusuji ansean ná ixin thi thjuaa ná Ndo Dio, ko suthikaonꞌa ná chujni jeꞌo tjaago ixin keꞌe nchao sine ni ixin chujni dithikaon jeꞌo thi dituꞌen na̱ jiꞌi, mee xruꞌin thjengijna na̱.

10Ko Jesucristo xrajon beꞌen ixin jaꞌan ná, aro thi daana xrajincheꞌe inchin thetuꞌan ley bayée Moisés xruꞌin juachaxin chunda na̱ sayée na̱ thi dajon Cristo. 11Ixin thi daana judío icha renthe xranxiꞌin jnii kuxiigo ngaxiꞌin Lugar Santísimo ngain ningue na̱, ko jni mee thi dajon daana ngain Ndo Dio ixin ditjañeꞌe thi jianꞌa ncheꞌe kain chujni judío. Aro nthauꞌe kain kuxiigo mee che nthao nthi̱ꞌa̱ ngandeꞌe rajna. 12Jañaa kai Jesús, betan tangi are ndabeꞌen nthi̱ꞌa̱ ngandeꞌe rajna ixin binchekjan jian kain chujni kunixin jnii jeꞌe. 13Mexinxin jaꞌan ná digutan ná jeꞌe nthi̱ꞌa̱ ngandeꞌe rajna, maski chujni runichja na̱ anto suaxin ixin duthikaon ná ngain jeꞌe. 14Ixin ngataꞌa nunthe nthiꞌi jaꞌan ná chundaꞌa ná naa rajna tsunchrjeꞌen kainxin nchaꞌon, ko jaꞌan ná tethjee ná thi rajna tsunchrjeꞌen kainxin nchaꞌon, thi utuin tsii. 15Mexinxin kainxin nchaꞌon nthusayeꞌe ná Ndo Dio kunixin juachaxiin Jesucristo. ¡Rugunda sinthunduxiꞌin ná ndo thi rutsjetheꞌe ná ndo ko nthusayeꞌe ná ndo kunixin ruꞌa ná! 16Ko xruꞌin nchaꞌon tjañaꞌa ra ncheꞌe ra jian ko thjengijna ra icha chujni xruꞌin chunda kunixin thi chunda ra ixin mee thi rugunda sinthundusen ná ngain Ndo Dio ixin yaa thi rinao ndo ixin sinthoꞌo ná.

17Dithikaon ra chujni thetuꞌan ngain ningua ra, ko ncheꞌe ra thi jeꞌe na̱ rundachro na̱, ixin jeꞌe na̱ dakuꞌen na̱ ansean ra ko ja̱ chrujan tsuꞌan ra Ndo Dio sanchiangiꞌi na̱ ixin jaꞌa ra. Mexinxin ncheꞌe ra jian ixin ruchee na̱ sincheꞌe na̱ xra ngajin ra ko ncheꞌa ra ixin sechiin na̱ ixin thi ndakuaꞌa ncheꞌe ra, ixin ja̱ jeꞌe na̱ sechiin na̱, mee xruꞌin tsjengijna ra.

18Nchetseꞌen ra ñao Ndo Dio ixin jaꞌan ná, ixin jaꞌan ná nuna ná ixin jian te ná ngathe kon Ndo Dio, ko rinaꞌo ná jian sinthaꞌa ná kain xra. 19Jaꞌan anto danchiaꞌa ra ixin nchetseꞌen ra ñao Ndo Dio ixin jeꞌe ndo ruchjana ndo juachaxin rukjan na tuin sasutsjaꞌa ra inaa.

Nthiꞌi thjexinxin xroon jiꞌi

20Ndo Dio, thi nchekunuꞌe chrjuin ngain anseen ni, ndo binchexechon Nchaa ná Jesucristo ngayee ni ndadigeꞌen, thi dakuan ná inchin thi icha jian thingaria kulekuchjeꞌen, ko jeꞌe kuejexin kunixin jnii thi narua kjuauthexin ndo ko xruꞌin nchaꞌon tsjexin. 21Ko jaꞌan danchia ixin jeꞌe ndo sinthakjan ra ndo jian chujni ko jañaa sincheꞌe ra thi rinao ndo, ko Jesucristo sincheꞌe ngajin ná inchin jeꞌe sinao. ¡Nthusayeꞌe ná Jesucristo kainxin nchaꞌon! Jañaa tsuꞌen.

22Nthatsaꞌan ñao ra xro choo ná, thinna ra ko thinxin ra jian juajna jiꞌi, thi nchion kji̱ꞌan ra jiꞌi ixin sinthasuji ra. 23Jaꞌan rinthanuꞌa ra ixin xan choo ná Timoteo ubachrjexin xan ngain nduꞌa xiiso. Ja̱ jeꞌe tsii nthiꞌi tuin, jaꞌan sasukian are jaꞌan sasutsjaꞌa ra inaa.

24Chjeꞌe ra juajna kain chujni thetuꞌan ngain ningua ra, ko kain chujni dithikaon ngain Jesucristo. Kai kain chujni dithikaon Jesucristo nthiꞌi ngain nuntheꞌe Italia ruaꞌan ra na̱ juajna.

25Ndo Dio sinthanchaon ra kain ra. Jamee tsuꞌen.

Currently Selected:

Hebreos 13: plsNT

Highlight

Copy

Compare