Hebreos 12

Rugunda rutsjeꞌe ná jian thi bincheꞌe Jesucristo

1Kainxin chujni bithikaon are saꞌo, kjuagua ná na̱ kexreen chunthia ni ko jai tatetsjaa ná na̱, mexinxin jai jaꞌan ná rugunda tsinthuꞌe ná kain thi xruꞌin xree ko kain thi jianꞌa ditaꞌa ná ixin sinthoꞌo ná. Ko jañaa tsixian ná sinthoꞌo ná xree Jesucristo, thi xra uchunda ná. 2Jaꞌan ná rugundaa ná rutsjeꞌe ná jian ngain Jesucristo ixin jeꞌe thi tjagua ná chunthia ná, ko jeꞌe thi thjengijna ná chunthia ná kain nchaꞌon ngain Ndo Dio. Jesús betan tangi nganito ntha cruz, ko jeꞌe kusueꞌa batho jié juasuaxin are beꞌen nganito ntha cruz, ixin jeꞌe ubenuꞌe ixin are rukjexin thi tangi, jeꞌe chrjuin rukunuꞌe ixin sabigeꞌe ngain rajianxiin thi thjen Ndo Dio.

3Mexinxin jaꞌa ra xraxaon ra jian thi kuꞌen ko bincheꞌe Jesús, ixin jeꞌe anto tangi kuꞌen are beꞌe ngayee chujni bancheꞌe thi jianꞌa ko baningakuꞌen na̱. Mexinxin jaꞌa ra tunchrjenꞌa ra ko thinthueꞌa ra nthiee Jesucristo. 4Ixin maski jaꞌa ra tangi tedathuꞌe ra ngain thi jianꞌa, aro xra xruꞌin ra xro nthaxengi ra na̱ jni ixin tethixiꞌan ra ngain thi jianꞌa. 5Aro jaꞌa ra xraa undatjañaꞌa ra thi ndathjo ra Ndo Dio ixin jaꞌa ra inchin xeꞌen ndo, ko ndachro ndo:

Jaꞌa xanꞌna, ningakuenꞌa Ndo Dio are nthagatho ndo tangi ixin itsanchrjandaꞌa ndo icha ngain thi jianꞌa,

ko darichinꞌa are jinthasathaꞌa ndo.

6Ixin Nchaa ná tanchrjandaꞌa ni naa chujni thjueꞌe ixin sincheꞌe na̱ thi jianꞌa,

ko nchegatho tangi kain chujni dayée inchin xeꞌen ndo.

7Thixiꞌan ra thi tangi nthagatho ra Ndo Dio, ixin jiꞌi ncheꞌe ndo ngajin ra ixin jaꞌa ra xeꞌen ndo. ¿Ko keꞌe chjan rugintjaꞌa ndudee xan are ncheꞌe xan thi jianꞌa? 8Aro ja̱ Ndo Dio sinthagathuꞌa ra tangi inchin thi tangi nchegatho kain xeꞌen ndo, yaa ruchro ixin jeꞌa xeꞌen ndo. 9Kai are jaꞌan ná nchinnchin bunthe ná, ndudaa ná, ndo nthiꞌi ngataꞌa nunthe, bagintja ná ndo ko jaꞌan ná banthusayeꞌe ná ndo. Ko, ¿unda suthikaonꞌa ná icha jian Ndudaa ná thjen ngajni, ko jañaa rukjan ná inaa chujni narua? 10Are saꞌo ni ndui ná, tsjeꞌa nchaꞌon bintja ná na̱ inchin jeꞌe na̱ xraxaon na̱ ixin jañaa rukangi ná thi jian. Aro Ndo Dio nthagato ná ndo tangi ixin thjengijna ná ndo, ko sinthajian ná ndo inchin jeꞌe ndo jian ndo. 11Jaan, ndua ixin thi tangi nthagatho ná ndo nthaxruxianꞌa ná are tetuan ná thi tangi mee, ko anto tadunthechiin ná: aro ja̱ tethinxin ná unda tedatho ná tangi mee, chrjuin tsunuꞌe ansean ná ko tsangi ná sinthoꞌo ná thi jian.

Thi tsuꞌen chujni dithikaonꞌa thi ndachro Ndo Dio

12Maski anto tangi tuꞌan ra, chunthia ra ngain Ndo Dio ko tusuji ra ko idinthechinꞌa ra. 13Ko thjee ra nthiꞌá nao ko thinthueꞌa ra nthiꞌá, ko chujni ichunthiaꞌa jian jai, sikon na̱ thi jaꞌa ra tencheꞌe ra ko rukjan na̱ ruchunthia na̱.

14Ncheꞌe ra ixin chrjuin dakjiꞌo ra kain chujni, ko thinthuꞌe ra kain thi jianꞌa, ixin chujni thinthueꞌa thi jianꞌa chroꞌa sikon Ndo Dio. 15Ko tanchrjandaꞌa ra ixin xruꞌin kensen tsinthuꞌe thi jian dajon Ndo Dio, ko tanchrjandaꞌa ra ixin seꞌe ngayaꞌa ra chujni juxon ncheketo chujni, ko ni mee inchin naa ka tsja nchexruxinꞌa chujni. 16Ko tsjeꞌe ra ixin xruꞌin kensen sejuakaꞌo choo ko xra thutheꞌa, ko ndachroꞌa ra ixin xruꞌin renthe thi chjee ni Ndo Dio inchin bincheꞌe Esaú ixin jeꞌe binchekji thi juachaxin jeꞌe bechunda ixin jeꞌe saꞌo guan. Ko Esaú binchekji juachaxin mee ixin naa laato ndaxra. 17Ko jaꞌa ra nuꞌa ra ixin are Esaú binao ixin ndudee runchenchaon ndo, ndudee ichroꞌa ndo. Maski jeꞌe Esaú anto tsjanga aro jeꞌe ibithjaꞌa kexreen rukentuxiꞌin thi jeꞌe bincheꞌe.

18Jaꞌa ra kunchienꞌa ra ngain naa jna nchao kathe ni inchin bincheꞌe chujni Israel are kunchieꞌen na̱ ngain jna Sinaí thi jiche xruꞌi ko anto naxinthui xeꞌe ko anto suji tungiixin ko jidanuthe chrintho. 19Kai kuinꞌa ra are suji kuiꞌin na̱ thi banua na̱, ko kai kuinꞌa ra are nichja Ndo Dio ngain na̱. Ko kain chujni kuiꞌin tha mee, binchetseꞌen na̱ ñao Moisés ixin irunichjaꞌa Ndo Dio jañaa ngain na̱. 20Ixin ikuixinꞌa na̱ bithikaon na̱ thi kuetuꞌan Ndo Dio are ndachro ndo: “Kexeꞌo chujni o kuxiigo tsingachje ngagaꞌa jna jiꞌi, jaꞌa ra naduenxon ra chujni mee o kuxiigo mee kunixin xro o kunixin naa lanza.” 21Kain na̱ anto xraon na̱ ixin thi bikon na̱ ngain jna mee, ko kai Moisés ndachro: “Jaꞌan jixrangaxin na juaxraon.”

22Aro jaꞌa ra kunchieꞌen ra ngain jna Sión ko ngain rajnee Ndo Dio, ndo jichon, ko mee rajna Jerusalén thi jii ngajni, ko ngain thi jii tsjé no̱ ángel. 23Ko kai kunchieꞌen ra ngain chujni saꞌo kjan xeꞌen Ndo Dio ko jitaxin na̱ nthi̱ꞌa̱ ngajni; ko jaꞌa ra ukunchieꞌen ra ngain Ndo Dio, ndo sincheꞌe jie̱ kain chujni, ko ukunchieꞌen ra ngain kain espiritue chujni jian ixin Ndo Dio binchejian na̱. 24Kai kunchieꞌen ra ngain Jesús, thi nichjaxin ná ngathexin kon Ndo Dio ixin thi narua kjuauthexin runcheꞌe ndo, ko chunthia ra ngain jnii Jesús, thi jni jeꞌe kuinthji ixin binthajian ná; ko jnii Jesús icha jian ke jnii Abel.

25Mexinxin jaꞌa ra ndachroꞌa ra ixin rinaoꞌa ra tsiꞌin ra thi nichja. Ixin Ndo Dio anto suji bincheꞌe jie̱ ngain chujni Israel are bincheꞌa na̱ thi ndachro ndo nthi̱ꞌa̱ ngain jna Sinaí. Icha jaꞌan ná keꞌe sitsingeꞌe ná jie̱, ja̱ sinthoꞌa ná thi jindathjuxin ná ndo nthi̱ꞌa̱ ngajni. 26Are Ndo Dio nichjexin ni Israel nthi̱ꞌa̱ ngain jna Sinaí, are mee thee ndo binchexranga nunthe, aro jai ndachro ndo: “Jeoꞌa sinthaxranga nunthe inaa, kai sinthaxranga ngajni.” 27Are jeꞌe ndo ndachro ndo “inaa”, jaꞌan ná thinxin ná ixin are mee ruxanthe kain thi binchechjian ndo ko mee kain thi thingi, ko jeꞌo sigeꞌe thi chroꞌa tsingi. 28Aro thi jichjaa ná Ndo Dio ko thi jeꞌe ndo thetuꞌan ndo, mee xruꞌin sinchekingi. Mexinxin jaꞌan ná thexruxiꞌin ná ndo ixin kain jiꞌi, ko nthusayeꞌe ná ndo inchin jikininxin ndo, jañaa kunixin juasaaya rinao ndo, 29ixin Ndo Diua ná inchin naa xruꞌi nchexanthe kain.

Currently Selected:

Hebreos 12: plsNT

Highlight

Copy

Compare