Gálatas 5

Irukjanꞌa ná thi bantsjexin ná Cristo

1Incheꞌa ra thi thetuꞌan ley ixin Cristo ukjuengijna ná ko ithetuanꞌa ná ley. Ko ikjanꞌa ra ncheꞌe ra thi bancheꞌe ra are baketuꞌan ra ley.

2Jaꞌan Pablo na ko thiꞌin ra thi rindathjo ra ixin ja̱ sayéꞌe ra xruꞌe diꞌin circuncisión, jaꞌa ra incherentheꞌa ra thi bincheꞌe Cristo ixin jeꞌe beꞌen ngain ntha cruz ixin jaꞌa ra. 3Ko kjan na rindachrjan inaa ixin kain chujni dayée xruꞌe, rugunda sincheꞌe na̱ kain thi thetuꞌan ley. 4Ko kain chujni jii ngayaꞌa ra ni xraxaon ixin Ndo Dio sinchetjañeꞌe na̱ jie̱ jeꞌo ixin dithikaon na̱ ley, mee ruchro ixin chunthiaꞌa na̱ ngain Jesucristo ko binchexruxinꞌa na̱ thi jian thixin ngain Ndo Dio. 5Aro xra ncheꞌe Espíritu Santo ngajin ná thjengijna ná chunthia ná ixin Ndo Dio sayáa ná inchin chujni jian. 6Ko ngathexin kon Cristo, jai irentheꞌa ja̱ chunda ni xruꞌe o chundaꞌa ni xruꞌe. Ko thi renthe ixin chunthia ná ngain Jesucristo, ko mee thi thjengijna ná ixin ruthjueꞌe ná kain chujni.

7Jaꞌa ra atho jian bagithikaon ra. ¿Kensen binthayaꞌa ra ixin ndakuinthuꞌe ra thi jian juajna? 8Jeꞌa Ndo Dio thi binthayaꞌa ra ixin jeꞌe ndo bayáꞌa ra ndo ixin sithikaon ra ndo. 9Xraxaon ra ixin “nchion levadura nchegeꞌen nguii nchue niuthja.” 10Aro jaꞌan chunthia ngain Ndo Dio ixin tsjengijna ra ndo ixin ruxraxaon ra inchin jaꞌan, aro Ndo Dio sincheꞌe jie̱ chujni jinthayaꞌa ra ko kexeꞌo chujni jinthayaꞌa ra sueꞌen jie̱.

11Ko jaꞌa ra xro choo ná ixin dithikaon ra Jesucristo, ja̱ xra ruketuan chujni ixin rugayee na̱ xruꞌe diꞌin circuncisión, chujni judío iruningakunaꞌa na̱ ko iruguñaoꞌa na̱ are rukiꞌin na̱ thi juajna ndachrjan ixin unda Cristo beꞌen nganito ntha cruz. 12Aro thi chujni nthayaꞌa ra ixin sayéꞌe ra xruꞌe, ¡ncho tunchrijin na̱ nthauꞌe na̱ jeꞌo na̱!

13Jaꞌa ra xro choo na̱ ixin dithikaon ra Jesucristo, Ndo Dio bayáꞌa ra ixin ley itsetuanꞌa ra, aro jiꞌi ruchroꞌa ixin sincheꞌe ra thi rinao nthauꞌa ra. Icha jian thjueꞌe choo ra ko thjengijna choo ra. 14Ko kain thi ndachro ley ixin sincheꞌe chujni, xethjaxin jaꞌin: “Thjueꞌe choo ra inchin thjueꞌe ra nthauꞌa ra.” 15Aro ja̱ tencheꞌe ra inchin kuxiigo chrintho ixin neꞌe choo ba ko jine choo ba, ko ja̱ jañaa tencheꞌe ra, jaꞌo ra ndatsjaꞌa choo ra.

Thi ncheꞌe nthauꞌe ni ko thi ncheꞌe Espíritu Santo

16Mexinxin ndathjo ra: Ncheꞌe ra inchin rinao Espíritu Santo, ko jañaa isincheꞌa ra thi jianꞌa rinao nthauꞌa ra. 17Ixin thi jianꞌa rinao nthauꞌe ni, mee rinaoꞌa Espíritu Santo. Ko thi rinao Espíritu Santo, mee rinaoꞌa nthauꞌe ni, ko kayui ningakuꞌen choo, mexinxin chroꞌa ncheꞌe ra thi rinao ra. 18Aro ja̱ Espíritu Santo thetuꞌan ra, ley bayée Moisés ixruꞌin juachaxin chunda ngajin ra.

19Ko tangiꞌa datsuan ni chujni ncheꞌe thi rinao nthauꞌe ixin chujni mee dejuakaꞌo nchrii jeꞌa chriꞌi, ko te na̱ dinthejuakaꞌo choo na̱ ko dikutheꞌa na̱, ko te na̱ ncheꞌe na̱ tsjé thi jianꞌa thiakuꞌen nthauꞌe na̱ ko jianꞌa xraxaon na̱. 20Te na̱ nchesayeꞌe na̱ diuchjan dikunchjianxin xro o nthaa, dantunga choo na̱, ningakuꞌen choo na̱, theto na̱, tunchjio na̱, duñaunkjio na̱, ni nchexruxiꞌin theto, ncheketo na̱ chujni ko tunchjeeya na̱ chujni. 21Te na̱ chjueꞌe na̱, te na̱ naduenxon choo na̱, te na̱ anto kuan na̱, te na̱ dakeꞌe na̱ kiai nchexin na̱ tsjé thi jianꞌa ko jii icha jianꞌa ncheꞌe na̱. Ko jaꞌan xra rundathjo ra inchin undathjo ra ixin kain chujni nchexruxiꞌin ncheꞌe jiꞌi chroꞌa sixiꞌin na̱ nthi̱ꞌa̱ thi thetuꞌan Ndo Dio.

22Aro xro chunda ná Espíritu Santo: Espíritu ncheꞌe ixin jaꞌan ná ruthjueꞌe ná kain chujni, jeꞌe ncheꞌe ixin anto ruchaa ná, ncheꞌe ixin chrjuin tsunuꞌe ngain ansean ná, ncheꞌe ixin tsuñaunkuaꞌa ná, ncheꞌe ixin chrjuin runichjee ná kain chujni, ncheꞌe ixin ngain ansean ná sachrjexin ixin tsjengijna ná icha chujni, ncheꞌe ixin ruchunthia ná ngain Ndo Dio, 23kai ncheꞌe ixin tsainꞌa ñao ná, kai ncheꞌe ixin sinthoꞌa ná thi rinao nthauꞌa ná. Ko xruꞌin ley ncheꞌe jie̱ ngain thi nchencheꞌe ni Espíritu Santo. 24Ko thi chujni dithikaon Cristo, chujni mee ncheꞌa na̱ thi jianꞌa rinao nthauꞌe na̱ ko ncheꞌa na̱ thi jianꞌa xraxaon na̱.

25Ja̱ Espíritu Santo bindakjan ná inaa chujni narua, jañaa rugunda sithikaon ná kain thi thetuan ná Espíritu. 26Ko tsainꞌa ñao ná, sunthuñaoꞌa choo ná ko xruꞌin thi tunchjueꞌe ni seꞌe ngajin ná.

Currently Selected:

Gálatas 5: plsNT

Highlight

Copy

Compare