Popular Bible Verses from Gálatas 5

Share

Aro xro chunda ná Espíritu Santo: Espíritu ncheꞌe ixin jaꞌan ná ruthjueꞌe ná kain chujni, jeꞌe ncheꞌe ixin anto ruchaa ná, ncheꞌe ixin chrjuin tsunuꞌe ngain ansean ná, ncheꞌe ixin tsuñaunkuaꞌa ná, ncheꞌe ixin chrjuin runichjee ná kain chujni, ncheꞌe ixin ngain ansean ná sachrjexin ixin tsjengijna ná icha chujni, ncheꞌe ixin ruchunthia ná ngain Ndo Dio, kai ncheꞌe ixin tsainꞌa ñao ná, kai ncheꞌe ixin sinthoꞌa ná thi rinao nthauꞌa ná. Ko xruꞌin ley ncheꞌe jie̱ ngain thi nchencheꞌe ni Espíritu Santo.

Mexinxin ndathjo ra: Ncheꞌe ra inchin rinao Espíritu Santo, ko jañaa isincheꞌa ra thi jianꞌa rinao nthauꞌa ra.

Ja̱ Espíritu Santo bindakjan ná inaa chujni narua, jañaa rugunda sithikaon ná kain thi thetuan ná Espíritu.

Ko thi chujni dithikaon Cristo, chujni mee ncheꞌa na̱ thi jianꞌa rinao nthauꞌe na̱ ko ncheꞌa na̱ thi jianꞌa xraxaon na̱.

Ko tangiꞌa datsuan ni chujni ncheꞌe thi rinao nthauꞌe ixin chujni mee dejuakaꞌo nchrii jeꞌa chriꞌi, ko te na̱ dinthejuakaꞌo choo na̱ ko dikutheꞌa na̱, ko te na̱ ncheꞌe na̱ tsjé thi jianꞌa thiakuꞌen nthauꞌe na̱ ko jianꞌa xraxaon na̱. Te na̱ nchesayeꞌe na̱ diuchjan dikunchjianxin xro o nthaa, dantunga choo na̱, ningakuꞌen choo na̱, theto na̱, tunchjio na̱, duñaunkjio na̱, ni nchexruxiꞌin theto, ncheketo na̱ chujni ko tunchjeeya na̱ chujni. Te na̱ chjueꞌe na̱, te na̱ naduenxon choo na̱, te na̱ anto kuan na̱, te na̱ dakeꞌe na̱ kiai nchexin na̱ tsjé thi jianꞌa ko jii icha jianꞌa ncheꞌe na̱. Ko jaꞌan xra rundathjo ra inchin undathjo ra ixin kain chujni nchexruxiꞌin ncheꞌe jiꞌi chroꞌa sixiꞌin na̱ nthi̱ꞌa̱ thi thetuꞌan Ndo Dio.

Jaꞌa ra xro choo na̱ ixin dithikaon ra Jesucristo, Ndo Dio bayáꞌa ra ixin ley itsetuanꞌa ra, aro jiꞌi ruchroꞌa ixin sincheꞌe ra thi rinao nthauꞌa ra. Icha jian thjueꞌe choo ra ko thjengijna choo ra.

Ixin thi jianꞌa rinao nthauꞌe ni, mee rinaoꞌa Espíritu Santo. Ko thi rinao Espíritu Santo, mee rinaoꞌa nthauꞌe ni, ko kayui ningakuꞌen choo, mexinxin chroꞌa ncheꞌe ra thi rinao ra.

Ko kain thi ndachro ley ixin sincheꞌe chujni, xethjaxin jaꞌin: “Thjueꞌe choo ra inchin thjueꞌe ra nthauꞌa ra.”

Ko tsainꞌa ñao ná, sunthuñaoꞌa choo ná ko xruꞌin thi tunchjueꞌe ni seꞌe ngajin ná.

Incheꞌa ra thi thetuꞌan ley ixin Cristo ukjuengijna ná ko ithetuanꞌa ná ley. Ko ikjanꞌa ra ncheꞌe ra thi bancheꞌe ra are baketuꞌan ra ley.