2 Timoteo 4

Tjaago juajnee Ndo Dio

1Ngathexin kon Ndo Dio ko ngathexin kon Jesucristo, thi tsii inchin thi thetuꞌan ko sincheꞌe jie̱ ngain kain chujni maski undabeꞌen na̱ o xrathechon na̱, jaꞌan rithetuꞌan: 2Tjaago thi jian juajna, maski sinaoꞌa na̱ tsiꞌin na̱ juajna mee, ko nchegikon na̱ thi jianꞌa ncheꞌe na̱, ko tjaguꞌe na̱ thi rinao Ndo Dio, ko thjengijna na̱ ixin sithikaon na̱, ko duñaoꞌa are sinchekueꞌen na̱ thi jian juajna. 3Ixin tsii nchaꞌon are chujni isinaoꞌa na̱ tsiꞌin na̱ thi jian juajna ko jeꞌe na̱ sinao na̱ tsangi na̱ thi jeꞌe na̱ rinao na̱ ko tsjee na̱ tsjé xi tjaago ixin ruxrague na̱ thi jeꞌe na̱ sinao na̱ tsiꞌin na̱. 4Ko isinaoꞌa na̱ tsiꞌin na̱ thi ndua, ko icha sinchexruxiꞌin na̱ tsiꞌin na̱ thi chijni thekin chujni. 5Aro jaꞌa rueꞌe thi jian juajna kainxin nchaꞌon, ko thixiꞌan thi tangi tsuꞌan, ko kainxin nchaꞌon tjaguꞌe chujni thi jian juajna, ko jian ncheꞌe xra chjaa Ndo Dio.

6Uchiaon juii nchaꞌon ruxrajon na inchin kuxiigo banchekininxin na̱ Ndo Dio, ko utuin satsjixin nthiꞌi. 7Ko jaꞌan kuixinna kain thi tangi ixin bithikaꞌon Ndo Dio, ko ubinthaꞌa kain thi kuethunna ndo, ko kainxin nchaꞌon chunthia Jesucristo. 8Ko jeꞌo richuan ixin sayáa naa corona ixin jian binthaꞌa ngathexin Ndo Dio, ko ngain Nchaa ná, thi jian ncheꞌe jie̱ ko jeꞌe ruchjana corona mee, ko jeoꞌa jaꞌan sayáa corona, kai kain chujni chuꞌen ko chunthia ixin Jesucristo tsii inaa.

Juajna kji̱n Pablo ixin Timoteo

9Nthatsaꞌan ñao sitsjena tuin, 10ixin Demas ndakuinthuna ixin icha binao kain thi jii ngataꞌa nunthe ko sakjui ngain rajna Tesalónica. Ko Crescente sakjui nuntheꞌe Galacia ko Tito sakjui nuntheꞌe Dalmacia. 11Ko jeꞌo Lucas thi jii ngajin na, ko jaꞌa Timoteo thjee Marcos ko sikuꞌna ixin jeꞌe nchao tsjengijna na ngain xra chjaa ná Ndo Dio. 12Ixin jaꞌan ruaꞌan Tíquico ngain rajna Éfeso. 13Ko are jaꞌa siꞌi, sikuꞌna thi daritsaꞌa ixin jaꞌan kuinthua nthi̱ꞌa̱ nchianduꞌa Carpo ngain rajna Troas, ko kai sikuꞌna xrunna aro icha rinaꞌo xroon kunchjianxin ruee kuleko.

14Ko thi xii diꞌin Alejandro, thi tjaaga chia, anto tsjé jianꞌa banchena. Aro Nchaa ná tsjengeꞌe ꞌna ixin kain thi jeꞌe banchena. 15Ko jaꞌa chunthiaꞌa are runichjaꞌa Alejandro ixin jeꞌe anto ningakuꞌen thi jaꞌan ná tjaago ná.

16Ko thi saꞌo nichja ngathexin kon ni thetuꞌan ixin xruꞌin runchena na̱, xruꞌin chujni kjuengijna na; ko ndakuinthuna na jaꞌon, aro Ndo Dio sinchetjañeꞌe na̱ thi bincheꞌe na̱. 17Aro Jesucristo beꞌe ngajin na ko binchesuji na ixin rundachrjan thi jian juajna ko rukiꞌin kain ni jeꞌa Judío. Ko jañaa Jesucristo kuanchrjandaꞌa na ixin rujine na kuleón. 18Ko jaꞌan nuna ixin Ndo Dio tsanchrjandaꞌa na ngain thi jianꞌa ko jeꞌe ndo sayakunna ndo tsjija ngajni thi jii ndo. ¡Ko jeꞌo Nchaa ná jikininxin tsusayeꞌe kain nchaꞌon! Jañaa tsuꞌen.

Pablo juexin kji̱n xroon ko ruaꞌan juajna

19Jaꞌan ruaꞌan juajna ixin Prisca ko Aquila ko ngain ni nduꞌa Onesíforo. 20Ko Erasto bithuꞌe ngain rajna Corinto, ko Trófimo beniꞌi ko kuinthua rajna Mileto. 21Ko jaꞌa tsjéꞌe kexreen sincheꞌe ixin siꞌi icha saꞌo ke kunithjaue kin. Ko kai Eubulo chjaa juajna, ko Pudente, ko Lino, ko Claudia ko kai ruaꞌan juajna kain ni niꞌngo nthiꞌi.

22Ko Jesucristo sinthanchaon ko Ndo Dio, ndo anto thjuaa ná, seꞌe ngajin ra kainxin nchaꞌon. Jañaa tsuꞌen.

Currently Selected:

2 Timoteo 4: plsNT

Highlight

Copy

Compare