Tito 1

Pablo dajon juajna ngain Tito

1Jaꞌan Pablo na, thi ncheꞌe xree Ndo Dio ko thi kuinchieꞌe Jesucristo. Ko jeꞌe ruaꞌan na ixin tsjengijna chujni ukunchieꞌen Ndo Dio ixin ruchunthia na̱ ngain jeꞌe ko satsuan na̱ thi ndua inchin bithikaon ná 2ixin jaꞌan ná chunthia ná ixin thi techunxin na̱ xruꞌin nchaꞌon seꞌen. Ko Ndo Dio ncheyaꞌa ndo, ko jiꞌi undachro ndo kuthejan kunchjian kain thi dukon ná. 3Ko ngain nchaꞌon ndachro ndo ixin rukuꞌen, jeꞌe ndo binthagatsuan ná ndo juajnee ndo. Ko Ndo Dio, thi binthakjan ná inaa chujni narua, jeꞌe ndo kuetunna ndo tsjaago juajna mee. 4Jaꞌa Tito, jaꞌa inchin xanꞌna ixin chunthia Jesucristo inchin jaꞌan chunthia. Jaꞌan danchiaa Ndo Dio Ndudaa ná ko Nchaa ná Jesucristo ixin sinthanchaon ko chrjuin sinchekunuꞌe ansean.

Thi bituꞌen Tito sincheꞌe nthi̱ꞌa̱ Creta

5Jaꞌan kuinthuꞌa nthi̱ꞌa̱ Creta, nunthe jii ngusine ndachaon, ixin runchekjexin xra bitjaan rukunchjian, ko ixin rugakee ngain nanaa rajna ni rukethuꞌan niꞌngo, jañaa inchin kuetuꞌan. 6Ko thi tsetuꞌan ngain niꞌngo sincheꞌe jian ixin xruꞌin chujni runichja jianꞌa ixin jeꞌe, ko nakua nchrii sekaꞌo, ko xeꞌen sithikaon Jesucristo ko chujni runichjaꞌa ixin anto ncheꞌe xan jianꞌa o dithikaonꞌa xan thi dituꞌen xan. 7Ko thi thetuꞌan ngain niꞌngo jian sincheꞌe kain ixin jeꞌe bituꞌen xree Ndo Dio, ko sincheꞌa xraa chujni jeꞌo turenthe ko ncheꞌe thi rinao, tsuñaunkuaꞌa, rukuanꞌa, tsetukaoꞌa chujni ko tsiakuenꞌa tumi dachaxin na̱ ngain thi jianꞌa. 8Icha jian jeꞌe sayée chujni ngain nchianduꞌa, sinchexruxiꞌin sincheꞌe thi jian, jian ruxraxaon thi sincheꞌe, sincheꞌe thi jikininxin, ko kain nchaꞌon sinao seꞌe jian ngathexin kon Ndo Dio ko tsji naa xii ncheꞌe jian. 9Ko tsji naa xii tsjaago jian inchin kuangi ngain juajnee Ndo Dio, ixin jañaa sinchegatsuan icha chujni thi jian juajna ko sinchetenkua thi chujni xraxaon ixin anto nuꞌe ko dithikaonꞌa Jesucristo.

10Ixin jii tsjé chujni dithikaonꞌa thi jian juajna, ko chujni jiꞌi nichjakua ko ncheyeꞌe na̱ chujni kunixin thi tjaago na̱, ko ngayaa ná xrajii chujni ndachro ixin ni jeꞌa judío rugunda sayée na̱ xruꞌe diꞌin circuncisión. 11Ko kain chujni mee sinthutenkua ná na̱ ixin nchetjajin na̱ chujni ko ni nchianduꞌe na̱, ko ixin jeꞌo tjaago na̱ thi jeꞌa ndua ixin jañaa dachaxin na̱ tumi.

12Ko naa profetee ni Creta ndachro: “Kain ni nunthe Creta kainxin nchaꞌon jeꞌo ncheyaxon na̱, ko te na̱ inchin kuxiigo te ngagaꞌa jna, ko juxon ne na̱ ko anto seꞌe na̱.” 13¡Ko thi nichja na̱ jiꞌi, jaan ndua! Mexinxin jaꞌa nchesatheꞌe na̱ suji ixin jañaa icha ruchunthia na̱ ngain thi jian juajna, 14ko tsinꞌa na̱ ko sithikaonꞌa na̱ thi chijni thekin ni judío ko thi thetuꞌan chujni idithikaonꞌa thi jian juajna.

15Thi chujni jian juaxraxauen, kain thi ncheꞌe na̱ jian. Aro thi chujni jianꞌa juaxraxauen ko xruꞌin dithikaon na̱ ko jeꞌo xraxaon na̱ thi jianꞌa, ko ixruꞌin tunuꞌe na̱ ixin thi jianꞌa jii ngain juaxraxauen na̱. 16Ko ndachro na̱ ixin chunxin na̱ Ndo Dio, aro kain thi jianꞌa ncheꞌe na̱ tjaago ixin nduaꞌa thi ndachro na̱. Ko chujni teꞌi ningakueꞌen na̱ ko dithikaonꞌa na̱ Ndo Dio ko chroꞌa ncheꞌe na̱ thi jian.

Currently Selected:

Tito 1: plsNT

Highlight

Copy

Compare