2 Corintios 5

1Jaꞌan ná nua ná ixin are ndaseꞌen ná, nthauꞌa ná ndaruxanthe xraa naa nchia tunchrjenꞌa see. Aro Ndo Dio ruchjaa ná naa nchia, aro dikunchjianꞌa nchia ixin raa chujni, ko nchia jiꞌi xruꞌin nchaꞌon tsjexin nthi̱ꞌa̱ ngajni. 2Ko ixin nchia jiꞌi daaba ná ko xraa ruginaunka na̱ ruginthexiꞌin ná ngain nchia jii nthi̱ꞌa̱ ngajni, 3ixin are sayée ná nchia mee, isuntheꞌa xraa chujni xruꞌin luntho jingaa. 4Ko ixin xratechon ná ngain nthauꞌa ná, thi nchiandui ná. Ko xradaaba ná ko ta ná juachjaon, ko jeꞌa ixin rujinaꞌo ná ruginthe ná xraa chujni xruꞌin luntho jingaa, icha jian rinaꞌo ná nchia narua, ko jañaa thi ndadeꞌen ni sinchetjaan ngain thi sunthechon ná kainxin nchaꞌon. 5Ko Ndo Dio binthachjian ná ixin jañaa sathueꞌe ná. Ko jeꞌe ndo uchjaa ná ndo Espíritu Santo, ko jiꞌi ruchro ixin uchjaa ná ndo thuꞌa thi sayée ná.

6Mexinxin jaꞌan ná kain nchaꞌon chunthia ná. Ko nua ná ixin are xra te ná ngain nthauꞌa ná, jaꞌan ná xra teꞌa ná ngain Nchaa ná. 7Ko maski dukonꞌa ná, chunthia ná ngain jeꞌe. 8Ko chunthia ná ko icha rujinaꞌo ná rugachrjexin ná ngain nthao jiꞌi ko ruginthe ná ngain Nchaa ná. 9Mexinxin rinaꞌo ná sinthaꞌa ná thi nchexruxiꞌin Jesucristo, ja̱ xratechon ná o ndaseꞌen ná. 10Ixin kainxin ná sunthe ná ngathexin kon Jesucristo, nthi̱ꞌa̱ thi sinthaa ná jie̱, ko jañaa nanaa ná sayée ná thi jikininxin binthoꞌo ná, are bunthe ná ngain nthauꞌa ná.

Thi juajna nchekjan chujni ngain Ndo Dio

11Ko ixin unua ná, ixin Nchaa ná ruchundeꞌe ná juasaaya, mexinxin nthukinxin ná chujni ixin sithikaon ná ngain jeꞌe. Ko Ndo Dio chunxin ná ndo jian, ko kaxon chuan ná ixin jaꞌa ra chunxin ni ra. 12Jaꞌan ná nichjaꞌa ná jian ixin jaꞌon ná, thi jaꞌan ná rinaꞌo ná ixin jaꞌa ra ruchaꞌa ra ixin jaꞌan ná. Ko jañaa ruchunda ra thi rundache ra chujni taꞌin ñao jeꞌo ngain nthauꞌe ko jeꞌa ngain anseen. 13Ja̱ ndadixenga ná ixin nthaꞌa xree Ndo Dio, ko ja̱ dixingaꞌa ná, mee ixin jaꞌa ra. 14Ko thi thjuaa ná Jesucristo thetuan ná. Ko jaꞌan ná nua ná ixin jeꞌe beꞌen ixin kainxin chujni, kuthimejan kain ná beꞌen ná. 15Ko Cristo beꞌen ixin kain ná, ko chujni bithikaon Jesucristo isincheꞌa ná thi jeꞌe na̱ rinao na̱, icha jian sinthechon na̱ ixin thi beꞌen ko xechon ixin jeꞌe na̱. 16Jaꞌan ná isunthurentheꞌa ná chujni inchin jaꞌan ná ruxraxaon ná. Ko are saꞌo jañaa banthurenthe ná Jesucristo, jaꞌan ná isunthoꞌa ná jañaa. 17Ko ja̱ chrujan chujni bithikaon Jesucristo, chujni mee kjan inaa chujni narua, ixin kain thi bancheꞌe na̱ are saꞌo ubatho, ko jai kainxin kjan narua.

18Kain jiꞌi thixin ngain Ndo Dio, ko ixin Cristo kjanxin ná ngain jeꞌe ndo, ko chjaa ná ndo xra ixin sinthukjan ná chujni ngain jeꞌe ndo. 19Jiꞌi ruchro ixin Ndo Dio nchekjan ndo chujni te ngataꞌa nunthe ngain ndo ixin Jesucristo. Ko jeꞌe ndo itsjeꞌa ndo kain thi jianꞌa bincheꞌe na̱. Ko jaꞌan ná kuetunna ná tsjaago ná juajna sinchekjan chujni ngain Ndo Dio. 20Ko Jesucristo kuetunna ná bikian ná juajnee ngajin ra. Ko Ndo Dio banchegunda ná ndo ko xraa jeꞌe ndo jinichjaꞌa ra ndo ixin jaꞌan ná. Mexinxin kunixin juachaxiin Jesucristo, nthatsaꞌan ñao ra dithuaxin ra kjan ra ngain Ndo Dio. 21Jesucristo xruꞌin thi jianꞌa bincheꞌe, aro ixin jaꞌan ná Ndo Dio binchekjan Jesucristo xraa naa chujni ncheꞌe jianꞌa, ko ixin duthikaon ná ngain jeꞌe kjan ná inchin chujni xruꞌin jianꞌa bincheꞌe ngathexin kon ndo.

Currently Selected:

2 Corintios 5: plsNT

Highlight

Copy

Compare