2 Corintios 4

1Mexinxin tunchrjenꞌa ná ixin Ndo Dio kuiakunuaa ná ndo ko chjaa ná ndo juachaxin nthoꞌo ná xra jiꞌi. 2Jaꞌan ná kuinthua ná thi anto suaxin ko jimao ncheꞌe ni, nthayaꞌa ná chujni ko dasingixinꞌa ná juajnee Ndo Dio, jeꞌo ndachrjan ná thi ndua, ko jañaa tjaguxin ná ixin jian nthaꞌa ná ngathexin kon Ndo Dio ko ngathexin kon kain chujni. 3Ja̱ thi juajnee Ndo Dio jaꞌan ná tjaago ná, xraa jijanthe naa manta, jeꞌo jijanthe ixin chujni jiditjaan 4ixin nchiijin, thi thetuꞌan ngain nunthe jiꞌi kuanchrjandaꞌa kuinxin chujni dithikaonꞌa teꞌi, mexinxin dikonꞌa na̱ thi chrjuin nchengasaan juajnee Jesucristo, thi kai Ndo Dio. 5Ko jaꞌan ná tjagoꞌa ná thi jaꞌon ná nuna ná, jaꞌan ná tjaago ná ixin Jesucristo Nchaa ná, ko jaꞌan ná inchin ni nchexraa ra ixin thjuaa ná Jesucristo. 6Are Ndo Dio binchechjian ndo nunthe, kuetuꞌan ndo ixin rukununxin xruꞌi ngain thi naxin xeꞌe. Kai xrajeꞌo Ndo Dio mee thi binchengasaan ngain ansean ná, ko xruꞌi mee satsuanxin ná thi anto chrjuin ixin Ndo Dio, ko kai thi anto chrjuin mee dikon ni ngain Jesucristo.

Thi nthoꞌo ná ixin chunthia ná Jesucristo

7Ko thi renthe chunda ná jiꞌi, jii ngajin ná, xraa thi dechjian ngain naa chi. Ko jañaa sikunxin ni ixin juachaxin jiꞌi thixin ngain Ndo Dio ko jeꞌa ngajin ná. 8Mexinxin maski tangi dathuꞌe ná, aro xruꞌin nchaꞌon dunthechiin ná ixin Ndo Dio thjengijna ná. Ko maski tsjé rugundana ná, aro taꞌa ná juachjaon ixin xruꞌin chunda ná, 9maski chujni chungina ná na̱, aro jaonꞌa ná te ná, bintjana ná na̱, aro guenꞌa ná na̱. 10Ko kain thi thji ná, chujni dikon na̱ ixin tangi dathua ná xraa bathuꞌe Jesús, ko jañaa ruxraguxin ngajin ná inchin bechon Jesús. 11Ko jaꞌan ná, xro techon ná, kain nchaꞌon chujni rinao na̱ suen ná na̱ ixin tjaago ná juajnee Jesucristo, ko jañaa ruxraguxin inchin bechon Jesús ngain nthauꞌna ná thi ndadeꞌen. 12Ko thi ndadeꞌen ni rinao suen ná, ko ngajin ra diji thi techon ni.

13Ngain Xruen Ndo Dio ndachro: “Jaꞌan chunthia, mexinxin nichja.” Ko jañaa kai jaꞌan ná chunthia ná, mexinxin nichja ná. 14Ko nuna ná ixin Ndo Dio binchexechon Nchaa ná Jesús, ko kai jaꞌan ná sinthaxechon ná ngain Jesús. Ko jaꞌa ra ko jaꞌan ná, tsjiꞌo ná Jesucristo ngathexin kon Ndo Dio. 15Ko kain thi tangi tunna ná jiꞌi, thixinna ná ixin thjuaꞌa ra. Ixin icha tsjé chujni sayée thi chjaa ná Ndo Dio, ko jañaa kai tsjé chujni tsexruxiꞌin Ndo Dio ko sinchesayeꞌe na̱ ndo.

16Mexinxin jaꞌan ná tunchrjenꞌa ná, maski jaꞌan ná ndatethjexin ná, aro espirituna ná icha tusuji nchaꞌon ko nchaꞌon. 17Ko kain thi tangi tuꞌen ni nthiꞌi ngataꞌa nunthe, seꞌa tunchrjeꞌen, aro jiꞌi thjengijna ná ko chjaa ná thi anto chrjuin ko xruꞌin nchaꞌon tsjexin. 18Ko jaꞌan ná tetsjeꞌa ná thi nchao dikon ni, jaꞌan ná rutsjeꞌe ná thi chroꞌa dikon ni, ixin kain thi nchao dikon ni, mee tuin ndathjexin, aro kain thi chroꞌa dikon ni, mee xruꞌin nchaꞌon tsjexin.

Currently Selected:

2 Corintios 4: plsNT

Highlight

Copy

Compare