1 Pedro 3

Thi rugunda sincheꞌe ni tekaꞌo choo

1Kai jaꞌa ra xro nchrii ra, are usinthekoꞌo ra xixiꞌa ra, dithikaon ra thi tsetuꞌan ra xa, ixin ja̱ xradithikaonꞌa xa juajnee Jesucristo, jeꞌe xa sithikaon xa ixin thi jian sincheꞌe ra ko rugundaꞌa tsjaguꞌe ra xa 2ixin jeꞌe xa sikon ra xa inchin naa nchrii jian ncheꞌe ko nchesayeꞌe nchra Ndo Dio. 3Ko thi chrjuinxin te ra, sikonꞌa ni jeꞌo ngama ra ixin dinchejijin jaa ra anto najni, o ixin tethia ra chia oro o ixin tengaꞌa ra luntho anto renthe. 4Icha jian thi chrjuin te ra mee thi chrjuin juaxraxaon seꞌe ngain ansean ra ko xruꞌin nchaꞌon tsjexin. Ko mee ruchro ixin jaꞌa ra naa nchrii chrjuin nuꞌe ko jian ncheꞌe nchra, ko jiꞌi anto renthe ngathexin kon Ndo Dio. 5Ixin are usee, kain nchrii bechunthia ngain Ndo Dio, jañaa chrjuin bancheꞌe nchra, ko bakjaago nchra thi chrjuin bagithikaon nchra xixiꞌi nchra. 6Jañaa bincheꞌe Sara ixin bithikaon nchra Abraham. Ko Sara banchegiꞌin Abraham, “suixin nchana.” Ko jaꞌa ra rukjan ra inchin xeꞌen Sara ja̱ sincheꞌe ra thi jian ko xruꞌin ruxraguꞌen ra.

7Kai jaꞌa ra, xro xixiꞌi nchra, rugunda chrjuin thinxiꞌin ra nchra ko chundeꞌe ra nchra juasaaya inchin jikininxin nchra ixin jeꞌe nchra maski sujiꞌa nchra aro Ndo Dio kai ubinchekininxin nchra ixin kjan nchra inaa chujni narua thi xruꞌin nchaꞌon tsjexin, jañaa inchin kjan ra jaꞌa ra. Ko ja̱ jañaa sincheꞌe ra, Ndo Dio, jaan, tsiꞌin ndo thi jaꞌa ra sanchieꞌe ra ndo.

Thi rugunda sincheꞌe chujni chunthia Jesucristo

8Ko rugunda xrajeꞌo juaxraxaon ruchunda ra kain ra, ko thiakunueꞌe choo ra, ko thjueꞌe choo ra xraa nakua ndudaꞌa ruchunda ra. Thjengijna ra chujni ko jian dakjiꞌo ra na̱. 9Thjengexinꞌa ra thi jianꞌa ncheꞌe chujni ngajin ra, kai thjengexinꞌa ra thi jianꞌa nichja na̱ ngajin ra. Icha jian danchieꞌe ra Ndo Dio sinchenchaon na̱ ixin jeꞌe ndo kuinchiaꞌa ra ndo ixin sinthanchaon ra ndo. 10Ixin ngain Xruen Ndo Dio ndachro:

Thi chujni ngain anseen dachrjexin ixin rinao seꞌe jian ko sikon chrjuin sathuꞌe kain nchaꞌon tsii,

rugunda tsangi runichjakuaꞌa thi jianꞌa,

ko runichjaꞌa thi jeꞌa ndua.

11Rugunda isincheꞌa thi jianꞌa ko sincheꞌe jeꞌo thi jian;

ko tsjee kexreen tsunuꞌe chrjuin ngain anseen, ko jamee sincheꞌe kainxin nchaꞌon.

12Ixin Nchaa ná tsjeꞌe ko jinda chujni ncheꞌe jian

ko jeꞌe thiꞌin are nichjee na̱,

aro kain thi chujni ncheꞌe jianꞌa, Nchaa ná tuñao ngain na̱.

13¿Kensen sincheꞌe jianꞌa ngajin ra, ja̱ kainxin nchaꞌon sincheꞌe ra thi jian? 14Aro anto chrjuin ja̱ tangi tuꞌan ra ixin ncheꞌe ra thi jian. Xruꞌin kensen xraguꞌen ra ko tanchrjandaꞌa ra ixin seꞌe juaxraon ngajin ra. 15Icha jian nchesayeꞌe ra Cristo ngain ansean ra ixin jeꞌe Nchaa ná, ko kain nchaꞌon tunuꞌa ra jian keꞌe satheꞌe ra ngain kain chujni sanchangiꞌa ra ko chrjuin datheꞌe ra na̱ ko duñaunkuaꞌa ra ngain na̱, are sanchiangiꞌa ra unda chunthia ra Cristo. 16Ko jañaa ncheꞌe ra thi jian ko tunuꞌa ra chrjuin ngain ansean ra ixin jamee kain chujni nichja jianꞌa ixin jaꞌa ra xro chunthia ra Cristo, jeꞌo na̱ tsusuee na̱ ixin thi jeꞌe na̱ nichja na̱. 17Icha jian dathuꞌe ra thi tangi ixin tencheꞌe ra thi jian, ja̱ Ndo Dio jañaa dajon ndo juachaxin, ke tedathuꞌe ra thi tangi ixin tencheꞌe ra thi jianꞌa.

18Ixin Cristo beꞌen ko kjuenga ꞌna nakua nthiꞌa thi jianꞌa jaꞌan ná nthoꞌo ná. Cristo xruꞌin jianꞌa bincheꞌe, aro jeꞌe tangi kuꞌen ixin jaꞌan ná xro nthoꞌo ná jianꞌa, ko jañaa binthachaan ná ngain Ndo Dio. Ko nthauꞌe Cristo tangi kuꞌen ko beꞌen, aro ixin Espíritu, jeꞌe kjan xechon. 19Ko ixin Espíritu jiꞌi, jeꞌe kjui ngain thi biaxiꞌin kain espiritue ni ndadigeꞌen ixin bindachro ixin ubacha. 20Ko espíritu teꞌi, kjui espiritue ni bithikaonꞌa Ndo Dio ngain nchauen Noé. Are Noé binchechjian arca, Ndo Dio chuꞌen ixin kain chujni rugithikaon na̱, aro bithikaonꞌa na̱ ko jeꞌo jni chujni bixiꞌin na̱ ngain arca ko benꞌa na̱. 21Ko jinda mee ruchro thi digithe ni jai; ko thi digithe ni jai mee jeꞌa ixin dantsjeꞌe kitja ngama nthauꞌa ná. Jiꞌi ruchro ixin kjuathexin ná Ndo Dio ixin jian sunthe ná ngathexin kon ndo ixin jaꞌan ná ukjan ná inaa chujni narua ixin Jesucristo xechon, 22ko jeꞌe sakuajiin nthi̱ꞌa̱ ngajni ko tabeꞌe ngain rajianxiin Ndo Dio ko jeꞌe thetuꞌen kain ángel ko kain thi thetuꞌan ko chunda juachaxin nthi̱ꞌa̱ ngajni.

Currently Selected:

1 Pedro 3: plsNT

Highlight

Copy

Compare