1 Pedro 4

Sunthoꞌo ná inchin Jesucristo kjuagua ná

1Jañaa, inchin anto tangi kuꞌen Jesucristo ngain nthauꞌe, jañaa jaꞌa ra kai xraxaon ra ixin rugunda setan ra tangi. Ixin thi chujni detan tangi ngain nthauꞌe ixin chunthia ngain Jesucristo, chujni mee incheꞌa thi jianꞌa, 2ko kain nchaꞌon xra seꞌe na̱ ngain nunthe jiꞌi jeꞌo sincheꞌe na̱ thi rinao Ndo Dio, ko isincheꞌa na̱ thi jianꞌa rinao nthauꞌe na̱. 3Jaꞌa ra anto see bincheꞌe ra thi nchexruxiꞌin kain chujni dithikaonꞌa Ndo Dio ixin anto bancheꞌe ra thi jianꞌa bakiakuꞌen nthauꞌa ra, bakuan ra, bakiin ra kiai ixin banchexin ra tsjé thi jianꞌa, ko thi icha jianꞌa bancheꞌe ra ixin banchesayeꞌe ra diuchjan dikunchjianxin xro o nthaa. 4Ko jai kain chujni bakuankoꞌo ra ko bakato ra ixin bancheꞌe ra thi jianꞌa, jeꞌe na̱ thinxinꞌa ná unda jaꞌa ra incheꞌa ra kain yaa, mexinxin nichja na̱ jianꞌa ixin jaꞌa ra. 5Aro jeꞌe na̱ rundachro na̱ thi bincheꞌe na̱ ngain Ndo Dio, ndo sincheꞌe jie̱ kain chujni xrajichon ko kain chujni undabeꞌen. 6Mexinxin Cristo kjuague chujni undabeꞌen thi jian juajna ixin kuthimejan Ndo Dio sincheꞌe jie̱ ngain na̱ inchin dueꞌen jie̱ kain chujni ko espiritue na̱ seꞌe ngain ndo.

7Ujitunchiaon nchaꞌon ndatsjexin kainxin thi jii. Mexinxin xraxaon ra jian kain thi ncheꞌe ra ko nichjeꞌe ra Ndo Dio kain nchaꞌon. 8Ko thi icha rugunda sincheꞌe ra, mee thi anto ruthjueꞌe choo ra ixin thi thjueꞌe choo ni, jiꞌi nchetjaaña tsjé thi jianꞌa ncheꞌe ni. 9Are chujni siji nchiandui ra, chrjuin dayéꞌe ra na̱ ko nichjakuaꞌa ra ixin jeꞌe na̱. 10Ndo Dio chjaa ra jejee xra ixin tsjengijna choo ra. Ko thi xra bithuanxin ra sincheꞌe ra, jian ncheꞌe ra xra. 11Ja̱ chrujan chujni nichja, ncho nichja inchin ndachro juajnee Ndo Dio; ko thi sincheꞌe xra, ncho ncheꞌe xra kunixin juachaxin bayéxin ngain Ndo Dio. Ko kain thi jian sincheꞌe ra, ncheꞌe ra ixin tsusayeꞌe Ndo Dio ixin thi bincheꞌe Jesucristo, ko jeꞌe jikininxin ixin kain chujni sinchesayeꞌe ko jikininxin kain juachaxin kainxin nchaꞌon. Jamee tsuꞌen.

Thi tangi tuꞌen chujnii Jesucristo

12Kain ra xro choo ná, xro anto thjuaꞌa ra, xraonꞌa ra are anto tangi tedathuꞌe ra ixin jañaa tuꞌen kain chujni chunthia Jesucristo, ko xraonꞌa ra ixin thi jituꞌan ra ixin jeꞌa thi xranaꞌa tuꞌen chujni inchin jaꞌa ra. 13Icha jian chaꞌa ra are tsuꞌan ra thi anto tangi, inchin kuꞌen Jesucristo ixin jañaa icha ruchaꞌa ra are sikon ra tsii Jesucristo inaa kunixin thi chrjuin ko jié juachaxiin. 14¡Anto chrjuin ixin jaꞌa ra are chujni chrjuinꞌa nichja na̱ ixin chunthia ra Jesucristo! ixin Espíritu Santo, thi anto jian, jii ngajin ra. Ko jeꞌe na̱ nichja na̱ jianꞌa ixin Espíritu Santo, aro jaꞌa ra tenchesayeꞌe ra Espíritu. 15Ko ja̱ chrujan ra sathuꞌe ra tangi, jeꞌa ixin guꞌen ra naa chujni, o ixin kueꞌe ra, o ixin anto jianꞌa ncheꞌe ra o kai ixin bixinthe ra ngain chijnii inaa chujni. 16Aro ja̱ chrujan ra tedatho ra tangi ixin dithikaon ra Cristo, tusuaꞌa ra ixin mee, icha jian thexruxiꞌin ra Ndo Dio ixin dithikaon ra ngain Cristo.

17Ujuii nchaꞌon ixin Ndo Dio tsexiꞌin sincheꞌe jie̱ ngain chujnii ndo, ko ja̱ ngajin ná jithexinxin ndo jincheꞌe jie̱, ¿mee kexreen tsuꞌen are sincheꞌe ndo jie̱ ngain chujni dithikaonꞌa juajnee ndo? 18Ixin ja̱ chujni ncheꞌe jian tangi rukjan na̱ inaa chujni narua, ¿mee kexreen tsuꞌen chujni dithikaonꞌa ko ncheꞌe thi jianꞌa? 19Mexinxin xro tedatho ra tangi ixin ncheꞌe ra thi rinao Ndo Dio, xrancheꞌe ra thi jian ko dakee ra ansean ra ngaa raa ndo, ndo binthachjian ná ko ncheꞌe ndo kain thi ndachro ndo.

Currently Selected:

1 Pedro 4: plsNT

Highlight

Copy

Compare