Luka 6
6
Yesu Wa Kni Owo Abmazhinyi Wa Wu Ɓa Nya
1Nwyihoi n Satiwyi, sanu Yesu n wo abara yi ɓei duya n awyizhin, ɓa bma awyi tukwo ɓai wuya ɓai gyi. 2Amma A Farisiyi ho ɓa cige, “deye kwoto wulo dai-dai m. Ai oho abara lo ɓai do wyi nu. Ko to bmiya lo a zhin lonu n Satiwyi m.” (Wato oɓa sun-sun wyi nu.)
3Yesu wa ci ɓa ge, “Fye to shin ba n litafi nya n Dawuda ɓo zhin ɓedo n wa zai, sanu miknu ɓo gun ɓa nyi ko? 4Dawuda ɓo lo dna n tent, wa la bredi nkwo ɓei tu n Shekwoyi abye nyi wa gyi kwo. Ɓedo n waʼazai. Ai deye toɓo bmiyan ko?” 5Yesu wa je ɓa gna ge, “Omi nu zhin Satiwyi ye Dagayi.”
6Njesun n Satiwyi dohoi Yesu dna n ɓa aduwa nyakun woi wu ɓa nya. Oza ho wa ɓe dna ɓo ce n bwai sha-shayi. 7A farisiyi ɓedo na malami ɓa shiwa wye zun ɓa gye kwo wo ɓa ka zayi gna n wyihi. Gama ɓa ɓei ce pma ɓa bwa nyaho nwo tukwo.
8Amma Yesu ɓo kpe oɓa bugba ye sarai. Wa ci nyasan yi ge “ɓe ha gni ya, zaho-zahoyi wa gye ho.”
9Nsayi Yesu wa ci a Farisiyi ɓedo n na malami ge, “Mi ce pma ma nya fye ɓoho. Ko bmiya lo oza zhin ɓo manayi n Satiwyi, kwo kwa ɓo nukwoyi? Ko bmiya lo a gni oza wyewyeyi kwo kwa a wu kwo?”
10Wa shi ɓa wye laɓa wa ci za yi ge, “ta oho bwa ya.” She wo ɓei ze zhin lonu kwa wu dai-dai. 11Sai a Farisiyi ɓa gyi minagyi sosai. Har ɓai ye ɓa wuwo.
12Nwyihoi, Yesu wa lo epe sepa wa zhin aduwa har efye kwa gyi. 13N labmi-la bmi yi, Yesu wa yi owo aviyi zhi, wakni owo abara nnabai ɓa knusun n woi.
14-16 Oɓa ye nyi, Siman (a jewo yi ge Bitrus) Andrawus (woɓei zhin Siman zado nu) Yakubu, Yohanna, Filibus Barthamiw, Matta, Tomma, Yakubu (Alfeaus ɓi) Siman (wo ɓei dna n na za kampani nɓa gyi ʼBe nyi) Yahuda (Yakubu ɓi) ɓedo Yahuda Iskariot (owo nu ɓo kun Yesu).
17-18 Sanu n ɓa ɓei shin ɓe n epe yi, ɓa ɓe sarari ho kwo shiko nyi ɓa ɓei ye kpe n pe nu, owo abara ɓe vivi n woi. Aza n mwa-begye ɓa shewo kna njesun. Gama aza ɓo la kun ɓe n nabai gbo-gbo. Ɓa kun n Urushelima, Tayor Sidom yi n na bai a ka ɓa gna. Wa kun alijenu ya n naza mwa njesun. 19Ezaho-zahoyi ye wa to wo bwa, gama sanu n ɓa towo bwa ɓa kagna.
20Nsayi wa gna owo abara ge, “Fye dagma nfye to nyabwai yi m, gama Shekwoyi be mi zhin fye nyanu. 21Fye dagma of ye amikun da gama nubo ɓa fufye. Fye dagma ofye abwiciyi, gama osa ɓelo n fye ɓei masan sosai. 22Fye dagma of ye n naza ta yefye yi m, ɓai kpe fya gye ɓai da aɓo nukwoyi doho-dohoyi ntuge fye vi mi. 23Fye dagma sosai gama fye ɓo bwa lada dnagmai n She mi. Ai ɓaɓo zhin anabawa kwo-kwoyi n lo nu nu.
24“Amma anyabwa yito n bugbafu yi io m, gama ɓa ku agmada pma bwa ya.
25“Ba wye-wyeyi lo n saiye, amma miknu lo kwoi pmi ɓa na bye. Oɓa san ma ɓei la ze bwici. 26Njesun bugbawu lo na ʼzayi na ciɓa n saiye nyi, ntu ge azhin a ci anabi katai nlo nu-nu ci ci.
27“Fye wo ofye viyan, fye ye nfya nuwuyi, fye zhin ɓa aɓo manayi. 28Fye zhin aduwa ga aza nɓa ta ye fye m, nge Shekwoyi wo tu ɓa anabarka.
29“Oza nu wa dnaho agnayi pmi, ha jewo ɓayi ga. Oza nu wa gwoho gbedo, ha gawo bace ɓedo. 30Ga ezaho-zahoi enya n wa nyaho kwo ɓo. Sanu na gaho nyaho njesun, to ye ge ha jekwo gwo m. 31Zhin aza ɓo she ho cei pma ɓa zhin ho ce.
32“Fye gye ge kwo bmiya lo fya ye aza nɓa ɓa ka fye ye kawai? Kni lada yi nu nfye ɓa bwa? Ai a Shetan da zhin ɓa zhin lonu. 33N fya ye aza nɓa ye fye ce mi gye ɓe mana bo? Ai a Shetan da zhin ɓa zhin lo nu ce. 34Nfya ga azanu gyiwye mwi kawai n ɓa ɓami ɓa gba fye ta, mi gye ɓe mana o?
35“Fye ye efya nuwun yi, fye zhin ɓa ɓe manayi, fye gaɓa nyamwi to ha gni hoi gye ge ɓa ɓa je ho gba m. Nsayi nu n ho lada ɓa mwa n she mi, fye ɓa ze Shekwoyi aɓi, gama wo zhin aza nɓa ta zhin godiya m ɓemanayi njesun n azai n ɓa zhin aza nukwoyi.
36“Zhin kokari ha wu aza yeye she oho dada eshe nya zhin wa wu nyi. 37To gyi aza kutu-kutu m, ko kuwa ha da za ɓo nukwoyi m. Gama ko ɓei bwa jeze kpe ho nu. Zhin aza ɓemana ɓahin ɓa zhin ho ce. 38Gama n ha ga, hoɓa bwa. Ho ɓa bwa lada n mwa oho mudu ɓa nu har koi knaya. Mudu n ha mwi n cei a ɓei ka ho mwi n koi nu.”
39Yesu wa ga ɓa a misali ye, “Wyebuayi ta mi wa bma wyebuayi do zhi m, tile ɓa kaya fi nbwo n gnisun. 40Eza ɓa kpe nya ye ndu wo malami? Amma wo ɓa mi wa tumwi har wa ze ngye owo male ce.
41“Kni nu zhin hoi la damu ntu obyasukwo ɓo n kwo dna lo n ho ʼzado wye nyi, hoi gnilo n shiwan knunu yi dna n ho nya?
42“Ho ɓa mi nwuna ha gna ho zado emi zado fa ma gmi ho byasukwo ya nho wye, to hoi mi ho gye shinwan-knunu nkwo dna nho wye nyi ma? Zakwocednai, la Shinwan knunu gmiya nho wye kpa, ha mi ha gye wyeba sarai, ha gmi ho zado byasukwo ya nwo wye.
43“Shinwa manayi ta mi kwa ga ampanyi nukwoyi m. Shinwa nukwoyi kwa ta mi kwa ga ampanyi manayi m. 44Azhin a kpe shinwa i manayi ye nkwo gyi-gyi nu. Ata taba a gye shinwa manayi n gyikpe n aknawuyi m. 45Oza manayi zhin wa zhin aɓo manayi. Aɓo manayi zhin ɓa knu n wo bugba nu. Oza nukwoyi kwa wa zhin aɓo nukwoyi. Ɓa kun n wo bugba nu ce. Nya kwo dna bugba a zhin a gye kwo nɓeda.
46“To, kni nu zhin fyei yi mi ge, ‘Shekwoyi’ to fyei vi mi ɓeye ma? 47-48 Oza ho-zahoi nwa ɓe maba wa wo mi ɓeda har wa zhin kwo, wo wu ngye oza nu n wo mi nyakun tu napma. Sanu nase ci ncei, kwo ta shashan gama kwo mi gni lo sosai.
49“Amma aza nɓa wo mi to ɓai zhin biyaya m, ɓa wu ngye aza nu n wo mi nyaknu ntna fandeshe manayi. Sanu n ase a ci n cei kwo zhin kwa miya butuu.”
Currently Selected:
Luka 6: GAW
Highlight
Share
Copy
Want to have your highlights saved across all your devices? Sign up or sign in
Alkawali Woiwoyi
(Gbagyi New Testament)
Copyright © 1997 by Biblica, Inc.®
All rights reserved worldwide.