Luka 5
5
Yesu Wa Yi Abara
1N wyihoyi woi gni woi zhin waʼazi n nuwan zundna gbe n na yi ko ge Genesarit nyi, aza ɓe dawo n mwabegye ntu ge ɓa wo Shekwoyi ɓeda. 2Yesu wa gye aya ho ngun aba, n nuwan gbe. Anyada ɓei fi ɓai zhan awyisala wan nya ya. Aza to ɓei fi n ya m. 3Sanu Yesu ɓo lodna n ya mi, wa nya Siman nyada ɓo n nabai wa lo nkoi vivi n nuwan ʼgbe, n nabai n wo ɓami wa daɓo n nazayi dai-dai.
4Sanu n wo ɓei ku ɓeda zoda wa gna Siman ge, “Lo aba nko loloyi lo hoi she aburiji. Hoɓa wan abmiya n mwa.”
5Siman wa ciwo ge, “Shekwo mwasa, ai akuyi ɓe nu zhi. Dna n sukwo vinya, yi to mi yi wan nyaho-nyahoi m. Amma she ho ku gna ge yi zhin nyi, yi ɓa tumwi ya gye.”
6Sanu n wo ɓei zhin lonu, owo aburiji ʼwa abmiya n mwa har ɓai saya. 7Ba yi oɓa zaje ntuge ɓa bma ɓa zhin. A kole-kole yi ngun aba, ɓaku nu n na wyesalai, har ngye ɓa shin fi n nuwan.
8She Siman Bitrus ɓei gye ɓo kwa zhin, wa ce ako-ko shi n Yesu aba wa cige, “Dagayi, fa yi ha lo ho nya mito kunce lo ma gni n ho aba m.” 9Gama Siman n wa ʼzajeyi, ceɓo wo ɓa n awyesala n ɓa ɓei wan nyi. 10Siman azaje wato Yakubu n Yohanna yi a Zebadi aɓi ca wo ɓa ce. Yesu wa ci ɓa ge, fye to wo dna m, gama fye ɓa zhin aza-wan yi nu nsayi (ɓa ɓe maɓa.)
11Sanu n ɓaɓo kun nuwan kwa ɓa fa aza vinya ɓa vi Yesu nsa-sayi.
Aza Nmwa Begye Ɓa Bwa Kagna
12Nwyihoi Yesu dna n zhi ho, oza ho n kuturu nyasan yi, kwoi lawo mwa so-sai wa gye Yesu. Wa miya zhi n kni wa gyi Yesu wye nge wo kawo gna. Wa ci Yesu ge, “Dagayi, Suku-suku kami gna sarai.”
13Yesu wa tabwaya wa towo bwa. Wa cige, “Milaye, la kagna n nyasan ve.” Kuturu nyasan yi kwa fawo Nsai-sayi.
14Yesu wa gna wo ge, wo lo to wa da laɓa nya nkwo ku zhin m, n nabai a pirist ɓa dna wo wye. Wa ci Kuturu yi ge lo hoi zhin sadaka ntu kagna ɓo shi Musa owa da. Deye ɓa wu zaho-zahoi ge lalle ho la kagna. 15Nabari ye kwa laɓa npye-pyei har aza ɓa ɓe n mwa ntuge ɓa wo owo waʼazi a ka ɓa gna n jesun. 16Amma Yesu ɓei zhin wa wyiya cici wa lo zhabui ntuge wa zhin aduwa.
17Nwyihoi sa nu Yesu ɓo gni woi wu aza nya, a Yahudiyayi atukwoda ho ɓedo a Farisiyi ɓa ɓe ɓa ku sase zhi vivi (aɓei zhin ai gye ngye azayezhi ye ɓo kun n akauye nu n Galili, n Yahudiya yi, har ma n Urushelima yi.) Yesu kwa wo ɓei nunu yi n iko kagna nya yi.
18-19 Kni ɓa zhia! Sai azaho ɓai zabmazhi latu n pece, ɓai ye ɓa duya to ɓa min. Sai ɓa gun kpe n nyakun she. Ɓa kma nyakunya ɓa shin wo ɓe cei aba Yesu ɓei gni nyi.
20She Yesu ɓo gye ɓa gaiciya ga wa cige, “Emi nugundo aku gafara zhin ho.” 21A farisiyawa yi ɓa kuka zhi n minagyi yi ɓa cige, “Zeye gye ge wo zhin nyikado na? Ai deye zhin laifi dnagmayi nu. Zaho-zahoyi ta mi wa zhin za gafara m, sai Shekwoyi gmanyi.”
22Yesu ɓo ku kpe anya ʼɓa zhin nubo ncei. Wa nyaɓa ge, “Kni nu na zhin koi ze laifi dnagmay a? 23-24 Omi, oza tnu-tnu yi (Kristi) mi ikoi lo ma zhin aza gafara n anyi ye. Amma ntuge ma wu fye ge mida gaiciyanu mi ka nyasai ye gna.” Nsayi wa gna zabmazhi yi ge, “Ku ha pece ha lo api gama hola lafiya bwa.”
25Nsai-sayi kwa zaho-zahoi gni woi gye zabmazhi ʼgye a gnana wa ku a pece wa lo api woi ci Shekwoyi. 26Zaho-zahoyi n wo ɓo gni ɓo wa ce ndna woyi, sai ɓa ci Shekwoyi ɓai cige, “Yi ku aɓo wowoyi gye n naiye.”
27Sanu n Yesu ɓei fa zhi yi, wa gye gadu goyi sasetu woi gwo gadu, (a gadu goyi ɓo zhin aza gyifi yi zanu.) Ai yi wo ge Lawi. Yesu wa ciwo ge, “Ɓe ha ze mi bara.” 28Nsai-sayi, Lawi wa lakala wa fa nyaho-nyahoi wa vi Yesu.
29Sai Lawi wa yi aza nyagyi-gyi n wo puwa. Wo ɓei yi ko ntuge wa wu Yesu owo agmada nu. Lawi ɓei la owo anugnudo yi n na zai mwabegye njesun.
Akpezhinyi Ɓai Ce A wyi
30Amma A Farisiyi ɓa gyi minagyi sosai. Ɓa nya owo abara ɓo, nya kwo zhin wo gyi nyagyi n laifi da yi lonu.
31Yesu wa ciɓa ge “ai oza n wo n nyasai owo nu zan shigbeda zanyi, to ge oza n wo lafiya yi m. 32Emi ɓe mwi nu ge ma yi alaifida, ɓa fa ʼɓa laifi, amma toge ma bma aza zhin nɓa ta kpe lo ge ɓa zhin alaifida nu m.”
33Afarisiyi ɓa je ɓo nya, nya kwo zhin Yesu abara ɓai gyi nyagyi maimakon ɓa zhin azumi. “Ɓa cige Ai Yohanna abara ta gyi nyagyi lo m. Ɓa ce ɓai zhin aduwa nu kawai. Amma kni nu zhin oho abarai ce ɓai dagma nuʼa?”
34Yesu wa nya ɓa ge. “Oza nwo dagma wo zhin wa zhin azumi? Aza nɓa zhin amula ʼɓa nugundo ɓa zhin ɓa zhin ntna nyagyi? 35Amma osa ɓelo n na ɓei wu mula ɓa n sayi nu n ɓa to ɓei gyi nyagyi m.”
36Nsayi Yesu wa zhin misali ge, “Ata zhin a la eje woi-woyi a ci eje ko-kwoi n cei m, gama eje kwo-kwoyi ta mi n woi-woi shi m. Kwo ta da wye-gyen ma. 37Njesun ata zhin a fi oje woi-woyi n apa kwo-kwoyi m, gama oje woi-woyi ɓa sa apa kwo-kwoyi ya har kwa zeya zhi laɓa. 38Ko zhin dole nu a fi je woi-woi n apa woi-woi ce. 39Amma eza to lo m n wo ku oje kwo-kwoyi sin, n wo cei pma wa je woi-woyi si m. Ɓa zhin ɓa cige, ‘Zokwo kwo-kwoyi gna bmiya.’ ”
Currently Selected:
Luka 5: GAW
Highlight
Share
Copy
Want to have your highlights saved across all your devices? Sign up or sign in
Alkawali Woiwoyi
(Gbagyi New Testament)
Copyright © 1997 by Biblica, Inc.®
All rights reserved worldwide.