Aba Loma 8

Pakuba nubumi ukwendela mu Muzimu Umuzelu

1Polelo abantu babo bakumamatilana poka nu Kilisitu u Yesu, ilelo yitalipo nayimoyimo inongwa iyakubasusya nayo. 2Pakuti indaghilo izya Muzimu Umuzelu zizyo zikutupa aswe ubumi ukwendela mwa Kilisitu u Yesu, zinyabuye ku ndaghilo izya mbibi na kubufwe bulo. 3U Chala akabomba zizyo Indaghilo izya Mozesi zikapotwa pakubomba, pachifukwa ichakuti ubuntu ubwa mbibi butakaba na maka. Akapota imbibi mu buntu ubwa mbibi pakutuma u Mwana wache mwene na mwene, yuyo akiza nu buntu ngati bwitu twe bantu abambibi, ukuti abanje chakwiyipa icha mbibi. 4U Chala akabomba zinizi ukuti ubwanaloli bubo Indaghilo izya Mozesi bukulonda buboneke mu aswe twe bantu babo tutakukonka ubuntu bwitu ubwa mbibi, loli tukumwivwila u Muzimu Umuzelu.

5Abantu babo bakukonka ubuntu bwabo ubwa mbibi, bakubika inyinong'ono zyabo pa vinyonywa ivya mubili. Loli abantu babo bakumwivwila u Muzimu Umuzelu, bakubika inyinong'ono zyabo pavintu vivyo u Muzimu Umuzelu akuvilonda. 6Nanti umuntu akubika inyinong'ono zyache pabuntu ubwa mbibi, ubumalilo bwache, bo bufwe bwene. Loli nanti umuntu akubika inyinong'ono zyache pavintu vivyo u Muzimu Umuzelu akuvilonda, ubumalilo bwache, bo bumi nu mutende. 7Nanti umuntu akubika inyinong'ono zyache pabuntu ubwa mbibi, we mulwani uwa Chala pakuti atakukonka Indaghilo izya Chala, naloliloli atangavwilapo nalumo. 8Abantu babo bakubika inyinong'ono zyabo pabuntu ubwa mbibi, batangamuhobosya u Chala.

9Amwe mutakukonka sona ubuntu bwinyu ubwa mbibi. Loli mukukonka zizyo u Muzimu Umuzelu akubabuzya—naloli nanti, u Muzimu uwa Chala akwikala mumwinyu. Loli nanti umuntu ate nu Muzimu uwa Kilisitu, yunuyu ate wa Kilisitu. 10Loli nanti u Kilisitu ali mumwinyu, kokuti umuzimu winyu ghuli nubumi pakuti u Chala abanena pakuba bagholosu pantazi papache, napapo amabili ghinyu ghakwiza pakufwa pachifukwa icha mbibi. 11#1 Kol. 3.16Sona nanti umuzimu uwa Chala yuyo akamuzyusya u Yesu kubufwe ali mumwinyu, po wepe yuyo akamuzyusya u Kilisitu kubufwe akwiza pakughapa amabili ghinyu ubumi, ghagho ghakufwa, ukwendela mu Muzimu wache yuyo ali mumwinyu.

12Polelo bakamu bane, tuli ni nkongole, loli inkongole yache yite yakuti tubombele nayo vivyo ubuntu bwitu ubwa mbibi bukulonda, awe. 13Pakuti nanti mukukonka ubuntu bwinyu ubwa mbibi, mukwiza pakufwa. Loli nanti u Muzimu Umuzelu akubavwa pakughogha imbombo zyinyu izya mubili, mukwiza pakuba nubumi. 14Pakuti abantu babo bakulongoziwa nu Muzimu uwa Chala, bo bana aba Chala. 15#Mlko. 14.36; Gal. 4.6, 4.5-7Pakuti u Muzimu yuyo mukapokela ate wakuti abapele pakuba bazya pakunyila. Loli u Muzimu yula akubapela pakuba bana aba Chala, sona ukwendela mumaka ghache, aswe tukulila kwa Chala ukuti, “Tata, we Tata wane!” 16Umwenecho u Muzimu Umuzelu akusimikila poka nu muzimu witu ukuti aswe twe bana aba Chala. 17Po nanti aswe twe bana aba Chala, tukwiza pakupokela nabo ulusayo lulo abasungiye abantu bache. Sona tukwiza pakupokela poka nu Kilisitu ulusayo lulo u Chala amusungiye. Pakuti nanti tukugabana intamyo nu Kilisitu, tukwiza pakugabana poka nawe ubuchindamu bwache.

Nizya buchindamu ubwa muntazi

18Nkupima ukuti intamyo zizyo tuli nazyo losi ulu zitangafwanikiziwa napo panandi nu buchindamu bubo bukwiza pakuvumbuliwa kukwitu. 19Ivipeliwa vyosi amaso ghabo ghali kuzila pakulindilila ukuti u Chala abavumbule abana bache. 20#Ubw. 3.17-19Ivipeliwa vikapeliwa ukuti vibaghiye pakusita pakuba ni mbombo, chite chifukwa ichakuti vikalondagha ukuti vibanje bulabula, loli pachifukwa ichakuti u Chala akaba weyuyo akalonda ukuti vibanje bulabula. Loli pakaba ulusubilo 21ulwakuti ivipeliwa vyosi vikwiza pakusatuliwa kubuzya ubwa bubozu nukupokela ubusatuke nu buchindamu ubwa bana aba Chala.

22Pakuti tuzimenye ukuti mupaka pakabalilo aka ivipeliwa vyosi vikukoloma nu bubavu ngati mukolo pakabalilo akakusayiwa. 23#2 Kol. 5.2-4Loli vite vipeliwa vyene vivyo vikukoloma; aswe twe tuli ni seke izyakwanda izya Muzimu Umuzelu, naswe tukukolomela mukasikasi, bo tukulindilila ukuti u Chala utupele pakuba twe bana bache, sona nukughapoka amabili ghitu ghosi. 24Pakuti lukaba lusubilo lwitu lulo tukapokiwa nalo. Loli ulusubilo lulo lukuboneka na maso, lute lusubilo. Nkimba muntu wenu yuyo akusubila ichintu chicho akuchennya na maso ghache? 25Loli nanti tukulindilila chicho tutakuchennya na maso, tukuchilindilila nu bololo.

26Umwakuyana bulo, wepe u Muzimu Umuzelu akutwavwa aswe twe bantu abadedebazu. Pakuti tutamenye namumo tubaghiye pakwiputila, umwenecho u Muzimu Umuzelu akutwiputila kwa Chala nukukoloma, kuko kutanganeniwa na mazyu. 27Sona u Chala yuyo akwenelezya mukasi mumoyo ghitu, azimenye mumo zibeleye inyinong'ono izya Muzimu Umuzelu pakuti u Muzimu Umuzelu akubiputila abantu bache abazelu ukuyana nu bwighane bwache.

28Tuzimenye ukuti ivintu vyosi vikubendela akiza abantu babo bamughanite u Chala, babo bitiziwa ukuyana nu bwighane bwache. 29Pakuti abantu babo u Chala akabasala kale, akabapaghula pakuba ngati we Mwana wache, umwakuti u Mwana wache abanje ngati we katote mu bakamu abinji. 30Po sona abantu babo u Chala akabapaghula, bope akabitizya, sona babo akabitizya, bakaneniwa pakuba bantu bagholosu pantazi papache, sona akagabana nabo ubuchindamu bwache.

Ulughano ulwa Chala ukwendela mwa Kilisitu u Yesu

31Muvyosi vinivi, po nkimba tungati choni? Nanti u Chala ali kulubazu lwitu, wewenu angatususya? 32Ate we Chala, awe, yuyo atakatwima u Mwana wache, loli akamubika ukuti chibanje chakwiyipa pachifukwa icha twebosi! Akatupa u Mwana wache, nkimba atangatupa sona pabulo ivintu vyosi? 33Nkimba wewenu akwiza pakubasusya abantu abasaliwa aba Chala? Umwenecho u Chala weyuyo akubanena ukuti bate ninongwa pantazi papache! 34Po wewenu akwiza pakunena ukuti bali ninongwa? Ate we Kilisitu u Yesu awe, yuyo akafwa, nkaninkani yuyo akazyuka kubufwe nukuba nubumi, sona ali kunyobe indilo iya Chala. Akutwiputila aswe kwa Chala! 35Nkimba wewenu angatusabulannya nu lughano ulwa Kilisitu? Fwandi intamyo pamo amayimba, pamo ukuvwimiwa, pamo izala, pamo ubupina, pamo ivyakoghofya, pamo ubufwe? 36#Mas. 44.22Pakuti Amasimbo ghakuti,

“Pachifukwa icha wewe,

tukukomana nu bufwe isiku lyosi.

Tuli ngati zyo ng'ozi zizyo zikubuka pakuboliwa.”

37Awe, loli muvintu vyosi vinivi twe bapoti ukwendela mu yuyo akatughana aswe. 38Pakuti naloli inzimenye ukuti nachimochimo chicho chingatusabulannya aswe nu lughano lwache. Napapo ubufwe pamo ubumi, napapo abantumi aba kumwanya pamo abalaghili aba kumwanya pamo abamaka, napapo ivintu vivyo vilipo ilelo pamo vivyo vikwiza muntazi, 39napapo ichisu icha kumwanya pamo ichisu ichapasi—chitalipo nachimochimo muvipeliwa vyosi chicho chingatusabulannya aswe nu lughano ulwa Chala, lulo lwitu ukwendela mwa Kilisitu u Yesu u Mwene witu.

Currently Selected:

Aba Loma 8: LMBNT2016

Highlight

Copy