Aba Loma 16

U Pabuli akubalamuka abitiki

1Nkumubika u Febe, umuyemba witu munyobe zyinyu, sona yuyo mubombi uwa chipanga icha mu Kenkeleya. 2Mumupokele akiza mwitabwa ilya Mwene, ukuyana namumo abantu abazelu aba Chala babaghiye pakubombela, sona mumwavwe ni vintu vivyo akusobelwa navyo pakuti umwene akabavwa abantu abinji poka nane bulo.

3 # Imbo. 18.2 Mundamukileko u Pulisika nu Akwila, ababombi abamwitu mumbombo iya Kilisitu u Yesu, 4babo bakabika ubumi bwabo pachulu ukuti bampoke ane. Inte nene nemwene nkubapalizya, awe, loli ni vipanga vyosi ivya bantu babo bate ba Yuda. 5Mundamukileko sona na bantu babo bakukomana munyumba zyabo pakwiputa.

Mundamukileko umughaniwa wane u Epaneta, yuyo akaba muntu wakwanda muchigaba icha Asiya pakumusubila u Kilisitu. 6Mundamukileko u Maliya, yuyo akiyula nkani pakubabombela amwe. 7Mundamukileko sona nu Andoloniko nu Yuniya,#16.7 Yuniya: Pamo Yuniyasi. Amasimbo ghamo aghakale ghasimbite ukuti Uliya. babo bakaba poka nane mujele. Abene bantu bamanyikwe nkani pakasi pa batumiwa, sona bakaba bakwanda pakuba bakilisitu, bo nane inchili.

8Mundamukileko u Ampiliyati, umughaniwa wane mwa Mwene. 9Mundamukileko sona nu Ulubana, umubombi uwamwitu mumbombo iya Kilisitu, sona nu Sitaki, yuyo mughaniwa wane. 10Mundamukileko u Apele, yuyo muntu umusubiliwa nkani pambombo iya Kilisitu; mundamukileko abamunyumba iya Alisitobula. 11Mundamukileko u Helodiyoni, umukamu wane.

Mundamukileko abakilisitu bosi abamunyumba iya Nalikisi, babo bantu ba Mwene.

12Mundamukileko u Tilifena nu Tilifosa, abakolo babo bakwiyula nkani pambombo iya Mwene.

Mundamukileko umughaniwa wane u Pelesi, umukolo yuyo iyula nkani pambombo iya Mwene. 13#Mlko. 15.21Mundamukileko u Lufu, umusaliwa uwa Mwene, sona nu nyina, yuyo ali ngati we mayi wane. 14Mundamukileko u Asinkilita, nu Filegoni, nu Helemesi, nu Patiloba, nu Helima, sona na bakamu bosi babo bali poka nabo. 15Mundamukileko u Filologa nu Yuliya, sona mundamukileko u Neliya nu muyemba wache, sona nu Olimpa, poka na bantu abazelu aba Chala bosi babo bali poka nabo.

16Mulamunkanaye mwebene pakulanjizya ulughano ulwenecho. Ivipanga vyosi ivya Kilisitu vikubalamuka.

Ukulayizya ukwabumalilo

17Mwee bakamu bane, nkubalaba ukuti muchebaye na bantu babo bakubagabannya abantu, sona na babo bakubika ivipunulo muzila zyinyu pakumanyisya ivimanyisyo vivyo vilekanite na vivyo mukamanyisiwa. Epako kukwabo! 18Pakuti abantu banaba batakumubombela u Mwene witu u Kilisitu, loli bakuvibombela ivinyonywa vyabo. Sona na mazyu ghabo manoni, sona mazimbuli bakubazimbula abantu babo batamenye nachimochimo. 19Abantu bosi bivuye nizya kwivwila kwinyu, po ane nahoboka nkani pachifukwa icha mwemwe. Loli nkulonda ukuti mubanje bamahala pachintu chicho chiza, sona nukuti mutakinong'onelayeko ni mbibi. 20Po u Chala umwenecho uwa mutende akwiza pakumusya u Satana ni nyayo zyinyu. Ichisa icha Mwene witu u Yesu Kilisitu chibanje namwe.

21U Timoti, umubombi uwamwitu, akubalamuka. U Lusiyasi nu Yasoni, sona nu Sosipateli, aba Yuda abamwitu bope bakubalamuka.

22Ane ne Telitiyo, umusimbi bulo uwa kalata uyu, nkubalamukila mwa Mwene.

23 # Imbo. 19.29; 1 Kol. 1.14; 2 Tim. 4.20 Wepe nu Gayi bulo, yuyo ampokelite ane poka ni chipanga chosi munyumba yache, akubalamuka. U Elasita, umusungi uwa ndalama izya kaya akakulu nkani, sona nu mukamu witu u Kwaliti bakubalamuka.#16.23: Amasimbo ghamo aghakale ghonjelezya: 24 Ichisa icha Mwene witu u Yesu Kilisitu chibanje namwe mwebosi. Ameni. Aghanji ghonjelezya amazyu ghanagha ukufuma ivesi ilya 29.

Amapalo aghabumalilo

25U Chala achindikiwanje. Ali na maka pakubakazya mulwitiko lwinyu, ukuyana na Mazyu Amiza agha Yesu Kilisitu ghagho nalumbilila, sona ukuyana nu buvumbuli ubwa vintu izyakubusyefu vivyo vikafisiwa ukwanda kale. 26Loli, ilelo vyavumbuliwa pabuzelu ukwendela mu masimbo agha balaghuzi; sona ukwendela mu malamulo agha Chala uwa bwila na bwila vyavumbuliwa ku bantu abaluko losi, umwakuti basubile nukwivwila.

27Kwa Chala mwene, yuyo we Chala uwamahala ghosi, kubanje ubuchindamu bwila na bwila ukwendela mwa Yesu Kilisitu! Ameni.

Currently Selected:

Aba Loma 16: LMBNT2016

Highlight

Copy