Zakaráya 9
9
Ikpe l'ee-kpe ndu ọhogu Ízurẹlu
1Ọ waa bụ okfu, Onye-Nwe-Ọha kfuru l'eli ishi alị Hadụraku; okfu ono jekwawho l'a-tukoru Damásukọsu l'ishi. O noo l'ẹnya Onye-Nwe-Ọha bẹ dụ l'ẹhu ụnwu-eliwhe ẹgube ono ọ dụ l'ẹhu ikfu Ízurẹlu. 2Ẹnya iya bẹ dụ l'ẹhu obodo Hámatu, bụ obodo, whẹ l'alị Hadụraku narụ ọnu-ẹgu, dụ l'ẹhu obodo Taya, bya adụkwawho l'ẹhu obodo Sáyịdonu, t'a gụfukwaro lẹ whẹ marụ ome nka shii. 3Obodo Taya gudeekwa mgbodo tụ-whee onwiya mgburumgburu. Mkpọla-ọcha b'ọ kụberu o nyiru g'ọo ẹja, kụbe mkpọla-ododo o nyiru g'ọo ikpọzu, dụ l'agụga echi-ụzo. 4Obenu lẹ Onye-Nwe-Ọha bẹ l'a-nafụ iya iwhe ono, o nweru, nwuru ẹku iya ye l'eze-ẹnyimu. Ọku adzụa obodo ono dzụfu l'ishi.
5Obodo Ashikelọnu l'a-whụ iwhe ono, egvu aba iya; obodo Gaza awhụkwa ya whọ taa kpọkpo-kpọroro l'iwhe-ọtsulanu. O nokwawho gẹ l'ọo-dụ obodo Ẹkuronu ndono; iwhe o shi ele ẹnya iya l'a-bụru iya nke mmaanụ. Onye eze nke Obodo Gaza l'a-nwụhu anwụhu, ọwhube Ashikelọnu abụru ẹka madzụ l'ẹte ebuhe ebubu. 6Ndu l'e-buru lẹ Ashịdodu bụ ndu a nakọru ụtu mmee nwụa, ekuku ono, ndu Fílistiya l'eku onwowhe abụru kperemu. 7Mu l'e-me t'ọnu whẹ ba akpajẹhe l'anụ-mmee, whẹ ahaa ori nri, l'aasọ nsọ. Ndu wuduru l'ime iya l'a-bụru nke Chileke anyi, ya adụ g'ọo ẹkali ikfu Juda, Ẹkuronu abya adụ gọo ndu Jebusu. 8Ọle mu l'a-nọ-whe ụlo mu mgburumgburu chelahaa ya nche t'ọ bọ dụhe onye l'e-buru fafafa bata iya, ya adụhe onye l'akpapyashịjekwadu ndibe mu ishi nkele mu gudewaa ẹnya mu whẹ ẹbo-ẹbo whụkotawaa gẹ l'ọonwuru ndibe mu.
Abyabya eze Záyọnu
9Gụbe nwada Záyọnu, tee ẹswa teshia ya ike!
Gụbe nwada Jerúsalẹmu, tụa ụzu ẹhu-ụtso!
Lekwa onye bụ eze ghu gẹ l'ooje abyakfuta ghu.
Ọ bụ onye dụ chịriri, bụru onye l'adzọje madzụ.
O wozeru onwiya alị, nokoru l'eli nkakfụ-ịgara eje abya,
mbụ l'ọ nọ l'eli nwa nkakfụ-ịgara.
10Mu l'e-wofu ụgbo-ịnya-ọgu l'alị Ífuremu,
wofu ịnya-ọgu lẹ Jerúsalẹmu,
wofukwawho ụta e gude alwụ ọgu.
Onye eze unu ono l'a-rya iya
aryarya sụ tẹ mba lile buru l'ẹhu guu.
Alị-eze iya l'e-shi l'eze-ẹnyimu
ọwa sechia lụfu l'eze-ẹnyimu ọdo,
shikwawhọ l'ẹnyimu Yufurétisu
nọo jeye l'ẹka mgboko beru.
Odobewhu ndibe Chileke azụ l'ọnodu whẹ
11“A -bya l'ẹka gụbedua nọ, mu l'e-kwobe iswi ọgbandzu
ono mu lẹ ghu gude mmee-anụ gbaa, haa ndibe ghu ono,
nọ lẹ mkpọro iduma, mini l'adụa ono
tẹ whẹ nweru onwowhe.
12Unu lawhu azụ lẹ agbarara unu,
unubẹ ndu mkpọro ono, ẹnya tọru l'ụzo.
Iwhe mu l'ekfuru unu ntanụ bụ
l'iwhe lile bẹ mu l'e-me t'ọ
lwadzukotaru unu nkwere labọ.
13O noo lẹ mu l'e-kwe Juda g'ọo onye kweru ube,
mu emee Ífuremu t'ọ bụru akfụ e gude agba iya.
Mu l'a-kpatsu unwoke Záyọnu
tẹ whẹ bụru ọgu swiru unwoke Giríku.
Mbụ lẹ mu l'e-me tẹ whẹ dụ g'ọo
ogu-ịgba, ndu ojọgu gude alwụ ọgu l'ẹhu whẹ.”
14Nteke ono bẹ Onye-Nwe-Ọha l'a-whẹshihuru ndibe iya,
ya atụfu akfụ iya whaa g'ọo ebemu-igwe.
Nnajị-Ọha, bụ Onye-Nwe-Ọha l'e-gbu opu-ọgu,
ya anọdu l'oke whẹrewhere,
shi l'ụzo ọhuda adzọnga ije adzọnga.
15Onye-Nwe-Ọha, bụ
Onye-ishi-igwe-ọgu l'e-gbobuta ndibe iya.
Whẹ emebyishia iwhe ndu
mgbẹka ono, bụ ndu ọhogu whẹ, lwụ-gbua whẹ.
Whẹ l'a-tụ ụzu g'ọo ndu mmẹe l'atsụ.
Whẹ ewhekaa mmee ndu ọhogu
whẹ ono, ya asọkoo ẹka lile
g'ọo mmee anụ, e gburu gude gwaa iwhe.
16Mbọku ono bẹ Onye-Nwe-Ọha bụ Chileke whẹ
l'a-dzọfuta whẹ,
nkele whẹ bụ atụru iya bụru ndibe iya.
Whẹ l'a-nọ enwu ẹnya demudemu l'alị ono g'ọo okpu-eze,
e gude ẹwhuru, l'enwu ẹnya
demudemu memaa emema.
17Alị ono dụnukakwa ree bụru iwhe manụkaru ụma.
Ereshi alị ono l'e-me t'ụnwu-okorọbya deru yọkoo,
mmẹe ọ̀whúú emekwaawho
t'ụnwu-ada nwụa ọnu-ọchi.
Currently Selected:
Zakaráya 9: Ezaa
Highlight
Copy
Compare
Share
Want to have your highlights saved across all your devices? Sign up or sign in
© 2014, Wycliffe Bible Translators, Inc. in cooperation with Abakaliki Literacy and Translation Trust
