Zakaráya 11

1Gụbe ugvu Libanọnu, gụfu ụzo ghu ghebe ọnu

nke ọwhu ọku l'e-kepyashi oshi sida ghu ekepyashi!

2Gụbe oshi payịnu, ryaa ẹkwa tsọo kụrukuru,

nkele oshi sida bẹ whọfuwaru bya adaa.

Oshi ono, bụ oshi dụ-gee biribiri bẹ lakọtawaru l'iswi.

Gụbe achị ono gvuru l'alị

Báshanu, ryaa ẹkwa tsọo kụrukuru,

nkele oke ọswa b'a sụkashiwaru.

3Ngabẹdawho nchị lẹ mkpu ndu l'eche atụru l'akpọ,

nkele ẹka ono whẹ l'echeje atụru b'e mebyishigewaru.

Ngabẹdawho nchị l'ụja ono ụnwu oduu-gburu-agụ l'agbọ,

nkele oke ẹtsukala ono nọ l'agụga

ẹnyimu Jọ́danu b'e mewaru o gheru karawhongu.

Uzhi ụmadzu labọ, l'eche atụru

4Onye-Nwe-Ọha bụ Chileke mu bẹ sụru agha: “Unu wata oche atụru ono e doberu nke egbugbu t'ọ tajia ẹwho. 5Ndu ono, l'abyajẹ azụa ya, l'azụje iya gbua egbu, a haa whẹ ẹwoma. Ndu ọwhu l'ere anụ iya ere nọdu whẹ asụ: ‘T'ajaja bụkwaru nke Onye-Nwe-Ọha, o noo l'anyi nwewaa iwhe.’ Ndu l'eche atụru ono te enwedu obu-imiko l'ẹka atụru ono nọ. 6Ọo ya bụ lẹ mu ta abyahẹdu l'a-whụru ndu bu l'alị-a imiko ọdo. O nokwa iwhe Onye-Nwe-Ọha l'ekfu ndono. Mu l'e-me tẹ madzụ daba ibe iya l'ẹka, mee tẹ madzụ daba l'ẹka onye eze iya. Whẹ egwee mgboko aryaka-eryune, ọ tọ dụdu onye mu l'a-dzọta l'ẹka whẹ.”

7Ọo ya bụ, mu bya awata oche atụru ono e doberu nke egbugbu. Ndu mu l'echeru iya bụ ndu l'eme nke atụru. Mu nweru mkpụru labọ, mu gude eme nke atụru ono. Mkpụru ono nnanụ bẹ mu gụru Iwhe-Ọma, gụa ọwhunalanu Atụgbabe. Mu bya awata oche atụru ono. 8O nweru ụmadzu ẹto ọdo, mu lẹ whẹ tụkoru eche atụru ono bụ ndu kpọru mu ashị. Ụmadzu ẹto ono bẹ mu chigburu l'ime ọnwa lanụ nkele mu ta adụdu ike gudepyabe onwomu l'ẹka whẹ nọ. 9Mu ghachi bya asụ atụru ono sụ iya: “Mu te echehekwa unu ọdo. Tẹ ndu ọwhu l'a-nwụhu nụ nwụhukwa, ndu ọwhu l'a-la l'iswi alaa ya, ndu ọwhu wuduru eria anụ ibe whẹ.” 10Mu bya apata mkpụru mu ono, l'aza Iwhe-Ọma nyajihu ẹbo gude mebyia ọgbandzu, mu lẹ ndiwhe l'owhu gbarụ. 11Ọo ya bụ, mu nọdu mbọku ono mebyia ọgbandzu ono. Ndu ono, l'eme nke atụru ono, bụ ndu l'ele mu l'ẹnya bebe marụ l'ọo Onye-Nwe-Ọha bẹ gude iwhe ono, mu meru nno ekfu okfu. 12Mu sụ whẹ: “Ọ -bụru l'ọ dụ unu ree, unu akfụa mu ụgwo mu, nteke l'ọodua unu egudekwa iya roo.” Whẹ bya akfụa mu ụkporo mkpọla-ọcha lẹ mkpọla-ọcha iri.

13Tọ dụ iya bụ, Onye-Nwe-Ọha sụ mu: “Je eye okpoga ono l'ẹka l'eeyeje okpoga, mbụ igbidi okpoga ono, whẹ sụru l'ọo iwhe aswa iya ha g'ọo ya.” Mu kwee chịta ụkporo mkpọla-ọcha lẹ mkpọla-ọcha iri ono je eye l'ẹka l'eeyeje okpoga l'eze-ụlo Onye-Nwe-Ọha. 14Mu byakwawhọ anyajia mkpụru mu nke ẹbo ono, l'aza Atụgbabe, shi nno mebyia abụbu ono Juda yẹle Ízurẹlu bụ nwune.

15Onye-Nwe-Ọha bya asụ mu: “Ngwa chilia ngwa-ọru ọdo je abụbaaru onye l'eche atụru. Nke ugbo iya-a bẹ l'ịi-bụru ọ-ga-lẹ-mkpa. 16O noo lẹ ntaa bẹ mu bya l'ewofuta onye l'eche atụru l'alị-a, bụ onye l'ẹte abyaa l'a-kpa ishi atụru ọwhu l'ala l'iswi, tọ bya l'achọ ndu ọwhu l'etuwhahu etuwhahu, tọ bya l'emebe ndu ọwhu iwhe mekaru ọgvu, tọ bya l'anụ ndu ọwhu ẹhu gbashịru ike nri. Iwhe l'a-bụru ẹhu iya bụ tẹ ya taa anụ ndu ọwhu gbarụ ẹba, aswọshi whẹ akụ-ọkpa. 17Nshọbukwa ọga-lẹ-mkpa onye l'eche atụru ono, mbụ onye ono, l'apajẹru atụru ono haa! T'ogu-ịgba yebufukwa iya ẹka mẹe ẹnya ẹka-ụtara! T'ẹka iya l'owhu nwụhukotakwa anwụhu, ishi abyarụ iya l'ẹnya ẹka-ụtara!”

Currently Selected:

Zakaráya 11: Ezaa

Highlight

Copy

Compare