Zakaráya 12
12
Ndu ọhogu Jerúsalẹmu bẹ l'aa-la l'iyi
1Ọ waa bụ okfu, Onye-Nwe-Ọha l'ekfu l'eli ishi ndu Ízurẹlu. Onye-Nwe-Ọha ono, bụ iya tụsaru akpamigwe atụsa, bụru iya tụru ukfu mgboko bya eye madzụ ume l'ẹhu bẹ sụru agha: 2“Leenu, mu bya l'e-me Jerúsalẹmu t'ọ bụru ntiko mmẹe, ndu buwheru iya mgburumgburu l'a-ngụtaje ada bẹbeji. Whẹ l'e-yebuta Juda, yebutakwawho Jerúsalẹmu. 3Nteke ono bẹ mu l'e-me Jerúsalẹmu t'ọ bụru agbụgaragbu ẹwhuru l'ẹhu mba gẹ mba ha. Mba jeru iya apali l'e-buta onwiya ejo ebuta. Mba lile, nọ lẹ mgboko l'a-kpakọ akpakọ bya etso iya ọgu. 4Nteke ono bẹ mu l'e-me tẹ ịnya-ọgu tsụlahaa egvu, mee t'ọgvu byarụ ndu l'agba iya nụ. O nokwa iwhe Onye-Nwe-Ọha l'ekfu ndono. Mu l'e-me tẹ ịnya ndiwhe kpukota ishi. Obenu l'ọzo-ụlo ndu Juda bẹ mu l'a-nwụberu ẹnya. 5Nteke ono bẹ ndu ishi ndu Juda l'a-nọ ekfukaa l'ime onwowhe sụ: ‘Ọkpehu, dụ ndu bu lẹ Jerúsalẹmu bẹ shikwa l'ẹka Onye-Nwe-Ọha bụ Onye-ishi-igwe-ọgu, bụ Chileke whẹ.’
6“Nteke ono bẹ mu l'e-me ndu ishi ndu Juda tẹ whẹ chaa gbarara g'ọo mbeji e shiberu l'ọku, l'ata kfụkfukfu, mbụ g'ọo ọku, l'aba whowhowho l'ẹswa ereshi. Whẹ ekegbushia ndu nọ-wheru whẹ mgburumgburu l'ụzo ẹka-ụtara mẹe l'ụzo ẹka-ịcha. Ndu Jerúsalẹmu anọdulekwaa gẹ whẹ nọ l'alị whẹ, ya eje adụ iwhe l'e-me whẹ nụ.
7“Ndu Onye-Nwe-Ọha l'e-vu ụzo dzọta bụ ndu Juda, nke ọwhu ugvu, l'aa-kwabẹ ọzo-ụlo Dévidi yẹle ndu bu lẹ Jerúsalẹmu ta akadụ nke ndu Juda shii. 8Nteke ono bẹ Onye-Nwe-Ọha l'e-gbobuta ndu bu lẹ Jerúsalẹmu, onye kagee arwụhu l'ime whẹ l'e-nwe ọkpehu g'ọo Dévidi, ọzo-ụlo Dévidi awata whẹ edudu g'ọo Chileke, mbụ g'ọo ndu o vutaru ụzo mbụ Ojozhi imigwe shi l'ẹka Onye-Nwe-Ọha. 9Nteke ono bẹ iwhe mu l'a-nọ achọkashi ụzo iya bụ gẹ mu l'e-shi mebyishia mba l'etso Jerúsalẹmu ọgu.
10“Ọzo-ụlo Dévidi mẹe ndu bu lẹ Jerúsalẹmu bẹ mu l'a-wụru ume eze-iwhe-ọma mẹe nke okfu anụ Chileke nke ọwhu whẹ l'a-palije ẹnya lee onye ono whẹ nmarụ arwa, whẹ awata ọrya ẹkwa iya g'ọo onye l'arya ẹkwa nwa lanụ o nweru, gbabuhuru nwụhu, mbụ whẹ atsọru iya gbụdagbuda g'ọo onye ọkpara iya nwụhuru. 11Nteke ono bẹ ụzu-ẹkwa l'a-swọtobe lẹ Jerúsalẹmu g'ọo ụzu-ẹkwa, a tụru l'iswi Hedadu Rimọnu ono, dụ lẹ barịkiti alị Megido. 12Ẹkwa l'a-swọtobe l'alị ono, a rya iya l'uwhu l'uwhu. Ẹnya-uwhu ndu ọzo-ụlo Dévidi l'a-nọ arya nkewhe, unyomu whẹ arya, ẹnya-uwhu ndu ọzo-ụlo Nétanu arya nkewhe, unyomu whẹ arya. 13Ẹnya-uwhu ndu ọzo-ụlo Lívayi arya nkewhe, unyomu whẹ arya, ẹnya-uwhu ndu ọzo-ụlo Shimeyi arya nkewhe, unyomu whẹ arya. 14Ẹnya-uwhu ndu ọwhunalanu gẹ whẹ ha, mbụ l'ẹnya-uwhu nọnu l'a-nọ arya nkewhe, unyomu whẹ arya.
Currently Selected:
Zakaráya 12: Ezaa
Highlight
Copy
Compare
Share
Want to have your highlights saved across all your devices? Sign up or sign in
© 2014, Wycliffe Bible Translators, Inc. in cooperation with Abakaliki Literacy and Translation Trust
