Mátiyu 7

Okpe ndu ọdo ikpe

(Luk. 6:37-38,41-42)

1“Unu be ekpekwa ndu ọdo ikpe nggẹ Chileke te ekpekwaro unu ikpe. 2Ishi iya bụru l'ọo iwhe unu gude kpee ndu ọdo ikpe bẹ l'ee-gude kpee unubẹdua. Ọ bụru iwhe unu gude tụru iwhe nụ ibe unu bẹ Chileke l'e-gudekwawho tụru nụ unubẹdua. 3?Ndẹe iwhe meru l'ịiwhuje nwa mkpaba dụ nwanna ghu l'ẹnya, ọle ị tịi whụkwanu ọwhu ha g'ọo osweru, dụ ghu l'ẹnya nke ghu? 4Ọdo bụ, ?ndẹkwanu gẹ l'ịi-gbee sụ nwanna ghu ono: ‘Gebe tẹ mu whụfu ghu mkpaba ono dụ ghu l'ẹnya,’ l'ẹka ọwhu ha g'ọo osweru dụkwa ghu-a l'ẹnya nke ghu? 5Gụbe iwe-l'obu-ọchi-l'ọnu-eze! Vuadaru ụzo mefuada osweru ono dụ ghu l'ẹnya nke ghu, nggẹ ị dụ ike whụ-rweta ụzo whụfu mkpaba dụ nwanna ghu l'ẹnya.

6“T'unu be ewojekwaru iwhe dụru Chileke nsọ tọgboru nkụta, a nọnyadaawho whẹ ghakọbe bya anmabushilahaa unu anụ anmabushi. Unu be ewojekwaru ákà unu, bụ iwhe vu aswa shii, tọgboro ezhi, a nọnyadaawho ezhi ono gude ọkpa dzọpyashia ya, ghakọbe bya alaa unu nwịrinwiri.

Ọnu iwhe, ọcho iwhe ọwaa ọku ẹka l'ụzo

(Luk. 11:9-13)

7“Unu kfujee t'a nụ unu iwhe, aa-nụ iya unu! Unu chọjee iwhe, unu l'a-chọta iya! Unu kụjee ẹka l'ụzo, aa-gụharu iya unu. 8O noo l'iwhe bụ onye sụru t'a nụ iya bẹ l'aanụjekwa, onye chọru nụ l'aachọtaje, onye kụru ẹka bẹ l'aa-gụharu ụzo. 9Tẹ ?ndẹe g'unu ha dụ onye ọwhu nwa iya l'a-sụ iya t'ọ nụ iya buredi, ya eje eworu ẹwhuru nụ iya? 10Nteke bụ l'ọo ẹma b'ọ sụru t'ọ nụ iya, ya achịru agwọ nụ iya? 11Ọo ya bụ, ọ -bụru l'unubẹdua, bụ ndu l'eme ejo-iwhe l'amajẹ nụ ụnwu unu iwhe dụ ree ?o chianu Nna unu ono, bu l'imigwe ta amadụ nụ unu ọkpobe iwhe, mbụ unubẹ ndu sụru t'ọ nụ iya unu?

12“Ọo ya bụ, t'unu mejeeru ndu ọdo iwhe bụkota-gezhia iwhe dụ unu tẹ ndu ọdo meeru iya unu. O noo iwhe bụ iya chịkotaru iwu Mósisu mẹe iwhe ndu nkfuchiru Chileke kfuru.

Ọnuzo, dụ nwa wẹrere

(Luk. 13:24)

13“Unu shia ụzo ọwhu dụ nwa wẹrere bahụ. O noo l'ụzo ọwhu bụ: madzụ -shia ya onye ọbu alaa l'iyi bẹ ọnu iya ha whosaa, ogborogbo ụzo iya ka ntse eshishi, ọ bụru iya b'a dụ l'igwe awụ eshi. 14Ọle ụzo ọwhu l'eduje madzụ bahụ lẹ ndzụ, o noo bẹ ọnu iya dụ nwa wẹrere tẹhenu ụzo iya l'atsụ l'anụ eshishi, ndu whụru iya nụ habekwa nwa-ahabe.

Oshi ọmi yẹle akpụru iya

(Luk. 6:43-44)

15“Unu zelajekwaaru ndu ono l'anọje adzụshi ejire lẹ whẹ bụ ndu nkfuchiru Chileke. Mbụ ndu l'anọje eme ódòò gẹ whẹ bụ atụru; e je ama lẹ whẹ bụ ágụ́, l'adzugbu atụru. 16Unu l'e-gudewaro umere whẹ marụ ọga madzụ, whẹ bụ. ?Aawọtaje akpụru-ẹra-nwata l'agarambo? ?Tẹ l'aawọtaje ujiru l'oshi uke? 17O nokwawho g'iwhe bụ-zhia ọkpobe oshi l'amịtaje akpụru dụ ree. Ejo oshi l'amịtaje ejo akpụru. 18Ọ tọ dụkwa ọkpobe oshi mịtajeru mebyi, dụ ẹji. O nokwawho gẹ l'ọoto dụkwanua ejo oshi mịtajeru mebyi, dụ ree. 19Iwhe bụkota oshi l'ẹte amịa mebyi, dụ ree bẹ l'ee-gbutsu parụ chee l'ọku. 20Ọo ya bụ, l'unu l'e-gudewaro umere ndu ono, l'adzụshi ejire sụ lẹ whẹ l'ekfuchiru Chileke l'eme, marụ ọga madzụ whẹ bụ.

Mu ta amadụ onye unu bụ

(Luk. 13:25-27)

21“Ọ tọ bụgbabekwa gẹ l'aahajẹ eku mu: ‘Onye-Nwe-Ọha, Onye-Nwe-Ọha,’ bẹ Chileke bụ eze lẹ ndzụ whẹ. Onye ọ bụ eze lẹ ndzụ iya bụlekwawho onye meru iwhe dụ Nna mu ono bu l'imigwe ree. 22Mbọku ikpe ono bẹ l'aa-ha l'igwe sụ mụbe Jisọsu: ‘Onye-Nwe-Ọha-e! Onye-Nwe-Ọha-e! Mẹ anyi shikwa egudeje ẹwha ghu ekfuchiru Chileke, anyi shi egudejekwawho ẹwha ghu achịshi ọgvu, shi egudejekwawho ẹwha ghu emekota igweligwe iwhe-awhụrulenya.’ 23Nteke ono bẹ mu l'a-karụ whẹ sụ whẹ: ‘Mu ta amajẹkwa onye unu bụ ilile. Unu gbashikwa mu l'iwhu g'unu ha unubẹ ọ-karia-ẹka whẹ ono!’

Ụmadzu labọ, l'atụ ụlo

(Luk. 6:47-49)

24“Ọo ya bụ l'iwhe bụ onye l'anụkota okfu lile-e mu l'ekfushi-a, emekota iya eme bẹ l'a-dụ g'ọo nwoke marụ ágụ, gvumiru alị egvumi tụa ụlo iya l'eli ẹwhuru. 25Tọ dụ iya bụ l'igweli abya achịa oke mini, whẹrewhere whee, utso bya agbaa: ọ bụkotaru l'eli ụlo ono, ụlo ono ta ada, o noo nkele ọo l'eli ẹwhuru b'e gbuberu ukfu iya. 26Ọle onye l'anụ okfu-a, mu l'ekfu-a, onye ọbu te eme iya eme bẹ dụa g'ọo onye eswe, je je atụa ụlo iya l'eli nvẹja. 27Igweli bya achịa oke mini, utso bya agbaa, whẹrewhere whee: ọ bụkotaru l'eli ụlo ono, gụbe ụlo whọhunu daa gburugudu, daa nke ọwhu ọ dụ biribiri.”

Ike, shi Jisọsu l'ẹka

28Tọ dụ iya bu Jisọsu kfugelewho iwhe ono; iwhe ono, l'oozhi kpụbekota ndu nụru iya nụ ọnu okfu. 29O noo l'oozhi iwhe g'ọo onye ike dụ l'ẹka. O to zhidu iya g'ọo ndu o-zhi-iwu whẹ.

Currently Selected:

Mátiyu 7: Ezaa

Highlight

Copy

Compare