Mátiyu 24

Ee-megee kutsushia eze-ụlo Chileke

(Mak. 13:1-2; Luk. 21:5-6)

1Jisọsu shi l'eze-ụlo Chileke ono lụfuta, eme tẹ ya tụgbua jeshia iwhe l'ooje, ndu l'etso ụzo iya byakfuta iya tẹ whẹ bya egoshikota iya eze-ụlo Chileke ono l'owhu. 2Jisọsu sụ whẹ: “?Unu whụwaru iwhe lile-e g'ọ hakọta? Iwhe mu l'eme tẹ mu kfuru unu bụ lẹ: ee-megee kutsushigezhia iwhe lile ono akutsushi nke ọwhu bụ l'ọ tọ dụdu m'ọo ẹwhuru lanụ bya l'a-kpokfuru l'eli ibiya.”

Mkpamẹhu yẹle iwhe-ọtsulanu l'a-bya tẹmenu mgboko-o agvụ

(Mak. 13:3-13; Luk. 21:7-19)

3Jisọsu bya enyihu ugvu Ólivu je anọdu anọdu. Ndu l'etso ụzo iya byakfutashia ya nke iche. Whẹ bya asụ iya: “Karụ anyi nteke iwhe lile ono l'e-me. Gụ akafụkwaaru whọ anyi iwhe l'a-bụ iwhe l'ee-gude marụ nteke l'ịi-bya mẹe nteke mgboko-o l'a-gvụ.”

4Jisọsu yee ọnu sụ whẹ: “Ọlewho t'unu kwabẹkwaru onwunu ẹnya t'ọ bọ dụ onye l'e-duwhu unu. 5O noo l'igweligwe madzụ l'a-zarụ ẹwha mu bya. Onye ọwhu nọnu, ya asụ l'ọo ya bụ Kuráyisutu ọbu, whẹ egude nno duwhua ndu hakwa l'igweligwe. 6Unu l'a-nọkwa anụ akọ ọgu-egbe, l'aalwụ l'otẹnya mẹe ọwhu l'aalwụ l'ụkfu ntse, ọle t'obu be etekwa unu ete. Lẹ iwhe lile ono g'ọ ha mekotajekwa, ọle nteke mgboko l'a-gvụ teke erwukwaa. 7Mba lanụ l'a-gbeshi je alwụshi mba ọdo ọgu. Alị-eze agbeshikwawho je alwụshi alị-eze ọdo ọgu. Ejo mkpẹgu l'a-bya. Alị-ọnma-jijiji l'a-nma l'ẹka dụ l'iche l'iche. 8Ọle iwhe lile ono bẹ tụkokwaru bụru obebe iwhe-ọtsulanu, nọ ọnodu nteke nka beberu melahaa nwanyị ime l'eme ẹhuka.

9“O noo nteke whẹ l'a-kpụru unu nụ ndu ishi, a kpaa unu ẹhu gbushia unu. Mba lile dụ lẹ mgboko-o l'e-kwobe nke l'ọo l'unu bụ ndu nke mụbe Jisọsu kpọo unu ashị. 10O nokwawho nteke ikpoto madzụ l'a-ha ekwekwe, whẹ kweru nke Chileke gbẹeru iya azụ. Whẹ l'a-gbarụ ibe whẹ ye kpọo ibe whẹ ashị. 11Igweligwe ndu l'a-nọ adzụshikaa ejire l'ọo Chileke bẹ whẹ l'ekfuchiru l'a-bya lẹ mgboko bya eduwhushia igweligwe madzụ. 12Tẹmenu, eshi-ọwhu ejo iwhe l'a-kwata paa ẹka apaa nteke ono bẹ oye obu nke igweligwe madzụ l'e-jihu dẹe. 13Ọle onye dụ ike taa nshi nọpyabe mu l'ẹka jeye l'ikpazụ bẹ Chileke l'a-dzọfutalekwaa. 14Ozhi-ọma bẹ l'aa-rya aryarya ryadzuru iya mgboko l'owhu t'o rwua madzụ lile lẹ nchị, tẹ ndiwhe l'owhu nụ-dzuru ọkpobe-okfu ono, bụ lẹ Chileke l'eku whẹ tẹ whẹ bya tẹ ya bụru eze whẹ. Ọo ya bụ, e megee nteke ono, mgboko agvụ.

Ejo akpamara

(Mak. 13:14-23; Luk. 21:20-24)

15“Sụa, nteke unu whụleruwho ejo akpamara ọla-l'iyi gẹ l'oome l'ẹka dụru Chileke nsọ, mbụ ejo akpamara ono o kfuru unu okfu iya mbụ Daníyelu, bụ onye nkfuchiru Chileke. Tẹ gụbe onye l'agụ iwhe-e rịkwaa ọriri iwhe ọbu. 16Nteke unu whụleru iya whọ, tẹ ndu nọ lẹ Judíya gbalakwaa lashia l'ugvu ugvu. 17T'onye nọ l'eli ụlo#24:17 Ndu Ju bụ l'eli ụlo bẹ whẹ l'anọduje edzu ike ẹgube ono ndibe anyi l'anọduje l'ọkpoku edzu ike nke whẹ. iya edzuta ike be ejekwa ọgbaba l'ụlo, lẹ ya l'eje ogwota iwhe iya, dụ l'ụlo. 18T'onye ọwhu nọ l'ẹgu ba adawhuhekwa azụ bya ọchita ọkpobe uwe iya. 19Nshọo rọo ụnwanyi, dụ ime mẹe ndu ọwhu he nwata l'angụ ẹra nteke ono. 20T'unu kfuru nụ Chileke tẹ nteke ono, unu l'a-gba ọso ono ba abụ nteke oyi l'atsụshi ike, ọdo bụ t'ọ bọ bụ mbọku ọtuta-ume. 21O noo l'ejo iwhe-ọtsulanu l'a-dụ nteke ono, mbụ iwhe-ọtsulanu ọwhu ?ọ dụ g'ọ bụ iya l'ẹteke adụhaa eshi nkeshi Chileke meru mgboko byeye ntaa; ?ọ dụ g'ọ bụ iya ta abya l'a-dụ ọdo. 22Ọ -bụru l'ọo iwhe Onye-Nwe-Ọha l'ete egbua nteke eze iwhe-ọtsulanu ono mkpirikpi, o to nwekwa onye l'aa-dzọfuta. Ọle o kwobewaru iswi ẹhu ndu ono ọ họtaru gbua nteke ono mkpirikpi. 23O -rwua nteke ono, o -nweru onye sụru unu: ‘Unu lee Kuráyisutu ọbu,’ ọdua: ‘L'ọwhukwa iya l'ẹka whọ,’ unu be eyekwaru onye ọbu ọnu. 24Nkele ndu l'a-nọ adzụ ejire l'ọo whẹ bụ Kuráyisutu ọdua whẹ bụru ndu nkfuchiru Chileke l'a-dụ-gekwaa. Whẹ l'a-nọ emekaa eze iwhe-awhụrulenya, dụ-gee biribiri. Iwhe ono a-bụkota nggẹ whẹ duwhua ndiwhe, mbụkwa je akpaa lẹ ndu ono Chileke họtaru mẹ whẹ je l'a-dụ ike mekota iya. 25Ọle mu dụakwa mbụ kfuru iya unu ntaa, l'ọotoko nwụdee.

26“Ọo ya bụ, nteke o nweru ndu sụru unu: ‘Unu lee ya, l'ọ nọkwa l'echi-ẹgu’ t'unu be ejekwa ẹka ono. Nteke whẹ sụru unu: ‘Unu lekwa l'ọ nọkwa l'ime mkpu;’ t'unu be eyekwaru whẹ ọnu. 27L'ọ kwa gẹ ebemu-igwe l'emeje whoo l'ụzo ẹnyanwu-awata lọjaa akpamigwe jeye l'ụzo ẹnyanwu-arịba, o nokwa gẹ abyabya Abụbu-Ndiwhe l'a-dụ ndono. 28O noo l'ọo iwhe bụ ẹka odzu daburu bẹ udele l'e-dzukoje.

Abyabya Abụbu-Ndiwhe

(Mak. 13:24-27; Luk. 21:25-28)

29“Nteke oke iwhe-ọtsulanu ono bebeleruwho emege bẹ iwhu ẹnyanwu l'a-gbakọta ọochi, ọnwa anyịhu, ya anọhe echi echichi, kpokponde dụ l'igwe g'ọ ha eshi l'igweli adashị. Iwhe lile, dụkota l'igweli l'a-nmawokota anmawo sweshihu. 30O noo nteke l'aa-whụ iwhe-ọhubama nke Abụbu-Ndiwhe l'akpamigwe. Ọ bụru nteke ono bẹ mba gẹ mba ha, dụ lẹ mgboko-o kpaa-whuu l'a-rya ejo ẹkwa. O noo nteke whẹ l'a-whụ Abụbu-Ndiwhe g'ọ nọ l'urwukpu, shi l'imigwe egbu zaazaa gude ike, parụ ẹka abya. 31A bya egbua eze opyi-ọku ono, l'oo-gude zhi ndu ojozhi-imigwe iya, whẹ abya ejee l'ụzo iwhu, jee l'ụzo azụ, jee l'ụzo ẹka-ụtara, jee l'ụzo ẹka-ịcha jeye l'ẹka igwe beru, alị beru je edutakota ndu lile ọ họtaru.

Iwhe figu l'ezhi

(Mak. 13:28-31; Luk. 21:29-33)

32“Sụa, unu gudekwawho figu nwụta iwhe. Ọobuje nteke ọ lalẹruwho ẹkwo rwude irwu ọwhuu, unu amarụ l'okpomọku l'abyawaa. 33O nokwawho gẹ ọwa dụ: nteke unu whụleruwho iwhe lile ono l'oomekaa, unu amarụ lẹ Abụbu-Ndiwhe nọwaa ntse, mbụ l'ọ nọwa l'ọnoguzo. 34Sụa, tẹ mu kfukwaa ya t'o dorwee unu ẹnya, l'ọgbo elenu-a ta abyakwa l'a-gvụ jeye nteke iwhe lile ono g'ọ ha l'e-mekota. 35Igwe l'a-gvụkwa, alị agvụ, ọle okfu mu ta abyadụ l'e-rebuhu ire.

Ọ tọ dụdu onye marụ mbọku ọbu

(Mak. 13:32-37; Luk. 17:26-30,34-36)

36“Ọle ọ tọ dụdu onye marụ mbọku ọbu ọdua l'ọo oge awa iwhe ono l'e-mekota. Ọ tọ dụkwa m'ọo ndụ-ojozhi, bu l'igwe onye ọwhu marụ iya, Nwa Chileke ta ama iya.#24:36 Ụwhodu l'ẹkwo gbarụ lẹ mbụ, e deru l'okfu Giríku bẹ l'ẹte ededuaru Nwa Chileke yekobe iya ẹgube, e deru iya l'ẹka-a. Ọlewho Chileke, bụ Nna nwẹkiya bẹ bụ onye marụ iya nụ. 37Ọ kwa g'ọ dụ l'ọgbo nke Nowa lẹ ndụ-ichee bụ gẹ l'ọo-dụ nteke Abụbu-Ndiwhe l'a-bya. 38Lẹ nteke ndụ-ichee ono, nteke utso ono l'ẹteke abyaa bẹ ndiwhe shi eri angụ, alụ-whe nwanyị, ekewhe nwanyị ji jeye mbọku Nowa whẹ bahụru l'eze ụgbo ono, 39ndiwhe ta amarọo iwhe l'akọ akọ jeye nteke utso ono byabya agbakọta mgboko, tụko whẹ gẹ whẹ ha kpota. O nokwa gẹ l'ọo-dụ nteke Abụbu-Ndiwhe l'a-bya ndono. 40Nteke ono bẹ unwoke labọ l'a-nọdu l'ẹgu, a bya ezhikota onye lanụ, haa onye lanụ. 41Ụnwanyi labọ l'a-nọ atsụ nri, a bya ezhikota onye lanụ haa onye lanụ. 42Ọo ya bụ, t'unu cheje nche nkele unu ta amadụ mbọku, Onye-Nwe-unu l'a-bya. 43Ọle iwhe ọdo, unu l'a-ma bụ lẹ nggẹ l'ọo iwhe nwoke, nwe uwhu dụ mbụ marụ oge nteke iwhuru l'a-bya ibe iya mẹe ya eche nche. Ọ tọgo hakwa t'iwhuru ono tsufua ụlo iya bata. 44Ọo ya bụ, tẹ unubẹdua l'onwunu kwakọbekwa, o noo lẹ Abụbu-Ndiwhe l'a-bya l'oge nteke unu l'ete ele ẹnya iya.

Nwozhi, e gude ire iya ẹka

(Luk. 12:41-48)

45“?Ọo onye bẹ bụ nwozhi ono, goshiru lẹ ya gbarụ t'e gude ire iya ẹka, tẹhenu ọ bụkwaruwho onye marụ ágụ? Ọo ya bẹ bụ onye ono Onye-nwe-iya-nụ doberu t'o letaru iya ibe iya ẹnya, nụje ndibe iya oke nri whẹ lẹ mgbe iya. 46Ẹhu-ụtso bụ nke nwozhi ono, m'ọ -bụru lẹ Onye-nwe-iya-nụ ono l'a-lwa, bya awhụa ya gẹ l'oome iwhe ono e zhiru iya. 47Iwhe mu l'ekfuru unu bụ lẹ nwoke ono, nwe uwhu ono l'e-wota iwhe lile o nwe enwe yekota nwozhi ono l'ẹka. 48Ọle ọ -bụru lẹ nwozhi ono bụ ejo madzụ, ọ rịa l'obu iya sụ: ‘Ha! Onye-nwe-mu-nụ-a l'anọnukaakwa ọdu shii,’ 49ọ bya awata anọ echi ndu ozhi ibe iya iwhe, rilahaa g'ẹhu ha iya, tsolahaa ndu l'angụnuka mmẹe, wata ọongu mmẹe, 50Onye-nwe-iya-nụ l'a-lwa mbọku, l'ooto ole ẹnya iya mẹe nteke l'ọoto maa, 51bya asakahụ iya ẹbo gụru iya yeru ndu ọwhu bụ iwe-l'obu-ọchi-l'ọnu-eze, l'ẹka ono bẹ madzụ l'a-nọdu ryaa ejo ẹkwa taa ikireze.

Currently Selected:

Mátiyu 24: Ezaa

Highlight

Copy

Compare