Mátiyu 12

Mbọku ọtuta-ume ndu Ju

(Mak. 2:23-28; Luk. 6:1-5)

1Ọ bya ebe ujiku lanụ, mbọku ono bụru mbọku ọtuta-ume ndu Ju, Jisọsu l'aghata l'ẹgu ẹka a kụru iwhe ọbu dụ g'ọo akpe. Ndu l'etso ụzo iya gbukolahaa ishi-iwhe ono ata nkele ẹgu l'agụkwanu whẹ. 2Tọ dụ iya bụ lẹ ndu Fárisii awhụle whẹ whọ, whẹ sụ iya: “Leedanu mẹ ndu l'etso ụzo ghu bẹ l'emekwa iwhe dụru anyi lẹ nsọ ememe mbọku ọtuta-ume.” 3Jisọsu sụ whẹ: “Unu tẹke agụdua ẹkwo-okfu Chileke gụ-vu iwhe Dévidi meru nteke ẹgu l'agụ iya, agụ ndu yẹle iya lị? 4L'ọ bahụru l'ụlo Chileke je ewota buredi e doberu nsọ l'iwhu Chileke taa. Buredi ono te erwubedu Dévidi l'atata, t'o rwube ndu yẹle iya lị. Ọlewho ndu l'agbajẹ ẹja nụ Chileke b'o rwuberu kpụ. 5?Tọo l'unu tẹke aguvubukwaawho l'ẹkwo iwu Mósisu lẹ ndu l'agbajẹ ẹja nụ Chileke bẹ jeru ozhi l'eze-ụlo Chileke lẹ mbọku ọtuta-ume. Whẹ shi nno mebyia iwu mbọku ono, tọ hẹkwa l'ikpe nmarụ whẹ. 6Iwhe mu l'eme tẹ mu kfuru unu bụ l'iwhe ọwhu ka eze-ụlo Chileke ono ike nọkwa l'ẹka-a. 7Nggẹ l'unu marụ iwhe ọ fụtaru mbụ okfu ono Chileke kfuru sụ: ‘Iwhe l'agụ mụbe Chileke bụ t'unu mejeeru madzụ obu-imiko, ọ tọ bụkwa t'unu gwajẹ mu agwagwa.’ Nggẹ l'ọo iwhe unu marụ iwhe iwhe ono bụ, unu tẹge anọkwa anma ndu iswi dụ mma ikpe. 8O noo l'ọo Abụbu-Ndiwhe bẹ bụ Onye-nwe mbọku ọtuta-ume.”

Jisọsu l'eme t'onye iwhe lọnwuru ẹka lanụ mehu

(Mak. 3:1-6; Luk. 6:6-11)

9Jisọsu fụta l'ẹka ono tụgburu bahụ-shia l'ụlo-ndzuko ndu Ju. 10O nweruwho nwoke lanụ ọbu iwhe lọnwuru ẹka lanụ, nọ l'ẹka ono. Ndu nọ l'ẹka ono chọo iwhe whẹ l'a-sụ lẹ Jisọsu meru, whẹ jị iya sụ: “?Tọ bụdu nụ omebyi iwu m'e -mee t'onye ẹhu l'ẹte adụa mma mehu lẹ mbọku ọtuta-ume?” 11Jisọsu sụ whẹ: “?O nweru onye l'ime unu, l'e-nwe atụru lanụ kpụ, atụru ono adalahụ l'ime iduma mbọku ọtuta-ume? ?Onye ono te ejedu je apafụta iya? 12Madzụ te egbedaanu ka atụru ọ bụ ọkpobe iwhe. Ọo ya bụ l'ome iwhe-ọma mbọku ọtuta-ume ta adụkwa lẹ nsọ.” 13O kfugee nno, ọ sụ nwoke ono: “Machịa ẹka ghu amachị.”

Ọ machịa ya. Ẹka ono bya eteta, dụ iya g'ọo ọwhua. 14Ndu Fárisii ono wụfuta etezhi bya achịlahaa idzu gẹ whẹ l'e-shi megbua Jisọsu.

Nwozhi, Chileke họtaru

15Jisọsu malẹruwho l'o noo iwhe whẹ l'achị idzu iya, ọ lụfuta l'ẹka ono tụgbua. Igweligwe madzụ wutsoru iya. O mekota iwhe bụ ndu ọwhu ẹhu l'eme whẹ mehukota. 16O kfuru whẹ kfushiaru whẹ iya ike sụ whẹ tẹ whẹ ba akọjeshi onye ya bụ l'edzudzu-ọha. 17Iwhe lile ono bẹ mekotaru nụ nke ọwhu l'ọo-vụ mbụ iwhe ono Chileke shi l'ọnu Ayizáya onye nkfuchiru Chileke kfua sụ: 18“Ọ wakwa onye l'ejeru mu ozhi ndọwa,

ọo mu gude ẹka mu họta iya.

Ọo onye mu yeru obu, bụkwaruwho onye

l'emeje tẹ obu jidata mu.

Mu l'e-ye iya Ume mu l'ẹhu

t'o mee t'iwhe bụkota mba gẹ mba ha,

dụ lẹ mgboko-o makọtaru lẹ mu l'e-kpe whẹ ikpe.

19O to jekwa ọtu ntụtu-ẹgo, too jehunu ochi mkpu.

Tọ dụhunu onye bya l'a-nụ olu iya l'echi-ụzo.

20Ọ tọ byakwa l'e-me tẹ nke onye nọ l'iwhe-ọtsulanu gvụ.

Tọo hahụnu onye ume l'ebuhu ebuhu

t'ume buhurwee ya.

Oo-gudelewho ẹka iya g'o gude jeye nteke

iwhe kfụru nhamụnha l'a-ka ejo-iwhe ẹkuku.

21Ọo ya bụ onye mba gẹ mba ha l'a-tụko ele ẹnya iya.”

Ẹka ike Jisọsu shi

(Mak. 3:20-30; Luk. 11:14-23)

22Tọ dụ iya bụ l'e dutaru Jisọsu nwoke lanụ ọgvu bu l'ẹhu; ọgvu ono bẹ meru nwoke ono l'ọotso ìshì, too kfukwawho okfu. Jisọsu bya emee nwoke ono ọ whụlahaa ụzo, kfulahaa okfu. 23Ọ kpụbekota ndu ono gẹ whẹ ha ọnu okfu, whẹ sụ: “?M'ọ tọ bụnua onye-e bẹ bụ Nwa Dévidi ọbu?” 24Ndu Fárisii nụle iya whọ, whẹ sụ: “Nwoke-e tẹge adụkwa ike achịfuje ọgvu nggẹ l'ọ tọ bụ l'o gude ike ọgvu Biyélezebọbu bụ iya bụkota ishi l'iwhe bụkota ọgvu kpaa-whuu.”

25Jisọsu marụ iwhe whẹ l'arị, ọ sụ whẹ: “Alị-eze -kewaa onwiya ẹbo selahaa okfu, alị-eze ọbu bụakwa iyi. Nteke bụ l'ọo mkpụkpu, ọdua l'ọo ndu uwhu lanụ bẹ keru onwowhe ẹbo selahaa okfu, ya echihu. 26Nteke bụkwanu lẹ Sétanu bẹ bya achịfutade Sétanu, ọo ya bụ lẹ mkpaka dụ l'ibe iya, ọ -dụwaa nno, ?ndẹkwadu gẹ alị-eze iya l'e-me keru? 27Ọ -bụnuru l'ọo Biyélezebọbu bẹ mu gude ike iya achịshi ọgvu, ?ọo onye bẹ ụnwu unu whẹ gude ike nkiya achịshi nke whẹ? Ọ kwa iya bụ l'ọo ụnwu unu ono l'e-goshiwaro l'ikpe nmarụ unu. 28Nteke bụkwanu l'ọo Ume Chileke bẹ mu gude achịshi ọgvu ọbu, ọo ya bụ l'o noo iwhe l'egoshi lẹ Chileke bụwaa eze l'ẹka unu nọ.

29“?Tẹ ndẹe gẹ madzụ l'e-mezhia bahụ l'ụlo mkparawa, akwara dụ l'ẹhu, je egwoo iwhe iya l'ọkpehu, m'ọ -bụdua l'onye ono bẹ vuada ụzo kee mkparawa ono ẹgbu tọgbo, tẹmenu ya egwowaro iwhe l'ụlo iya.

30“Onye mu l'iya l'ẹte abụa ẹhu bụkwa onye ọhogu mu. Onye l'ete etsoo mu achịkobe iwhe achịkobe bẹ l'akpakashị iya akpakashị. 31O noo iwhe meru mu sụ unu agha: iwhe lile bụ iwhe-dụ-ẹji, madzụ l'emegbabe bẹ Chileke l'a-gụkotakwaru whẹ iya nvụ, ya a-gụkwaaru whẹ whọ nvụ l'ekfubyishi, whẹ l'ekfubyishi Chileke. Ọle onye kfubyiru Ume-Dụ-Nsọ bẹ Chileke l'ẹte abyakwaa l'agụru iya nvụ. 32Iwhe bụ onye l'ekfuru Abụbu-Ndiwhe ejo okfu bẹ l'aa-gụkwaru iya nvụ, ọle onye kfubyiru Ume-Dụ-Nsọ bẹ l'aata abyakwaa l'a-gụru nvụ. A ta agụkwaru iya onye ọbu lẹ mgboko ọwa, a nọ ntaa, t'a gụru iyẹ ya lẹ mgboko ọwhuu, l'a-bya nụ.

Oshi ọmi mẹe akpụru iya

(Luk. 6:43-45)

33“Unu l'eme t'unu wọta akpụru dụ ree l'oshi, unu yeru, unu vukwaro ụzo meeda oshi ọbu t'ọ dụ ree. Nteke bụ l'unu te eletadu oshi ọbu ẹnya, o -mebyihu, unu amarụ l'akpụru iya l'a-dụkwawho ẹji. Ọo iwhe akpụru oshi mịtaru bẹ l'eegudeje marụ ẹgube iwhe oshi ọbu bụ. 34Unubẹ ụnwu, oguji-nwaka nwụshiru-a, ?ndẹnu g'okfu ọma l'e-me shi unu l'ọnu l'ẹka unu dụ ẹji l'onwunu? Nkele iwhe ọnu l'ekfuje bẹ bụ iwhe jiru obu ebushihu ebushihu. 35L'ọkpobe madzụ l'eshije l'ọkpobe iwhe dụ iya l'obu wofuta ọkpobe iwhe, ejo madzụ l'eshijekwanu l'ejo iwhe dụ iya l'obu wofuta ejo iwhe.

36“Tẹ mu kfulekwaru iya who unu, lẹ mbọku ikpe Chileke bẹ onyenọnu l'a-bya akfụru, kaa ishi iwhe o kwoberu kfua iwhe bụ-zhia mkpọkoro okfu, shijezhia ya l'ọnu fụta. 37O noo l'ọo okfu shi madzụ l'ọnu bẹ l'ee-gude gụa onye ọbu l'onye dụ chịriri. Ọ bụkwaruwho okfu shi madzụ l'ọnu bẹ l'ee-gudekwawho nma iya ikpe.”

Eekfu tẹ Jisọsu goshi l'ọo Chileke zhiru iya

(Mak. 8:11-12; Luk. 11:29-32)

38Tọ dụ iya bụ, o nweru ndu o-zhi-iwu mẹe ndu Fárisii, harụ bya asụ iya: “O-zhi-iwhe, meeru anyi iwhe-awhụrulenya, bụkwanu iwhe l'e-goshi anyi l'ọo Chileke zhiru ghu l'ezhi.”

39O yeeru whẹ ọnu sụ whẹ: “Ọgbo elenu-a bẹ panụkakwaru ẹji; whẹ te ekwe nọpyabe Chileke l'ẹka. Whẹ l'achọ t'e goshi whẹ iwhe-awhụrulenya, l'e-goshi l'ọo Chileke zhiru mu tẹ mu bya l'ezhi. Ọle ọ tọ dụkwanu iwhe-awhụrulenya ọdo a bya l'e-goshi whẹ, gbahaa iwhe ono, nwụru l'ẹhu Jona bụ onye nkfuchiru Chileke. 40Mbụ ọo gẹ Jona nọkotaru ujiku ẹto, eswe l'ẹnyashi l'ime ẹwho owhomu-ka-azụ; bụ gẹ Abụbu-Ndiwhe l'a-nọ abalị ẹto, eswe l'ẹnyashi l'ime alị. 41Ndu Nínive bẹ l'a-gbalihu mbọku ikpe, nma ọgbo elenu-a ikpe. O noo lẹ ndu Nínive bẹ darụ onwowhe ụta, haa ome iwhe-dụ-ẹji whẹ l'emegbabe lwakfuta Chileke gẹ Jona je ekfuru yeru whẹ. Ọle t'unu lekwawho, l'onye ka Jona nkajishi bẹ nọkwa l'ẹka-a ntaa. 42Eze-nwanyị ono l'achị ndu Shiba bẹ l'a-gbalihu mbọku ikpe, nmaa ọgbo elenu-a ikpe, o noo l'o shi l'ẹka ono mgboko beru bya ọnuta olu-okfu mmamagụ Sólomọnu. Ọle t'unu lenu l'onye ka Sólomọnu nkajishi nọ l'ẹka-a ntaa.”

Iwhe l'akpatajẹ ọgvu alwawhu azụ

(Luk. 11:24-26)

43“Ọobuje nteke a chịfuru madzụ ọgvu l'ẹhu, ọgvu ono eje etsoru echi-ẹgu ẹka-mini l'adụa aghawhe, achọ-whe ẹka l'ọo-nmẹe anmẹe. Nteke o jenyaaru tọ dụ ẹka ọ whụru, 44ya asụ lẹ ya l'a-dawhushiwaa azụ lẹ akahụ ụlo iya whọ. Nteke ọ byatashiaru bya awhụa l'ọ daburu iwhoro, a zawa iya aza dozhigee ya ree, 45ya eje achịta ọgvu ẹsaa ọdo, kabaarọ yẹbedua igiri yeru onwiya, whẹ awụba je eburu l'ẹka ono. Ndzụ onye ono abya aka njọ amamẹ lẹ g'o shi dụ nteke mbụ whọ. O nokwawho gẹ l'ọo-dụ ọgbo elenu-a, metageeru ejo-iwhe, ọ wọ whẹ l'ẹkpiri ndono.”

Ne Jisọsu mẹe unwune iya

(Mak. 3:31-35; Luk. 8:19-21)

46O noo ya, Jisọsu kpụkwaduru-a okfu ono l'ọnu ekfu eyeru ndu ono, ne iya mẹe unwune iya shi rwua, bya akfụru l'etezhi zhia ozhi t'e kuaru whẹ Jisọsu tẹ whẹ l'iya whụ. 47Onye lanụ sụ iya t'o gebekwawho lẹ ne iya mẹe unwune iya bẹ kfụkwaru l'etezhi eme tẹ whẹ l'iya whụ.#12:47 Ụwhodu l'ẹkwo gbarụ lẹ mbụ, e deru l'okfu Giríku bẹ l'ẹte ededuaru vẹsu 47 yekobe iya ẹgube, e deru iya l'ẹka-a.

48Ọ sụ onye ono kfuru iwhe ono: “?Ọo onye bụ ne mu? ?Tọo onye bụ unwune mu?” 49Ọ bya ewhee ẹka lẹ ndu l'etso ụzo iya; sụ: “Lee ndu bụ whẹ bụ ne mụbe Jisọsu, bụru unwune mu. 50Ọo iwhe bụ onye l'eme iwhe dụ Nna mụbe Jisọsu ree, mbụ Nna mu ono bu l'imigwe, o noo onye bụ nwune mu nke nwoke, bụru nwune mu nke nwanyị, bụkwaruwho ne mu.”

Currently Selected:

Mátiyu 12: Ezaa

Highlight

Copy

Compare