Malakayi 1
1
Chileke yeru ndibe iya obu
1Ọ waa bụ ozhi Onye-Nwe-Ọha zhiru Malakayi t'o zhia ndu Ízurẹlu.
2Onye-Nwe-Ọha l'ekfu sụ: “Mu yekwaru unu obu.”
“Iwhe unu gbee ekfu bụ: ‘?Ọo gụnu bẹ goshiru l'i yeru anyi obu?’ ”
Onye-Nwe-Ọha sụ: “?Ọo kwa lẹ Ịso yẹle Jékọpu bụ nwune? Onye ọwhu mu yeru obu bụ Jékọpu. 3Ọwhube Ịso bẹ dụ mu ashị. Ugvu ugvu alị Ịso bẹ mu meru ọ bụru ẹka ẹgbara kfụru, mu woru alị iya haarụ nkụta-ọswa, bu l'echi-ẹgu.”
4Ọ -bụru l'ẹpa Ịso, bụ iya bụ ndu Edọmu bẹ l'ekfu sụ: “Mkpụkpu anyi bẹ zekposhihuru ezekposhihu, ọle anyi l'a-tụkwa iya t'ọ kfụru ọdo.”
Ọle iwhe Onye-Nwe-Ọha, bụ Onye-ishi-igwe-ọgu l'ekfu bụ: “Tẹ whẹ tụnua ya gẹ whẹ l'a-tụ iya, tẹ mu nwutsushia ya. Ndu madzụ l'e-ku whẹ ejo mba, ndu Onye-Nwe-Ọha doberu ẹhu-eghughu iya jeye lẹ gbururu. 5Unu l'e-gude ẹnya unu whụa iwhe ono, unu asụ: ‘Onye-Nwe-Ọha bẹ ike iya pakwarụ ẹka je akpaa l'ẹka l'abụa alị ndu Ízurẹlu.’
Aabarụ ndu l'agbajẹ ẹja nụ Chileke mba
6“Sụa, nwa l'akwabẹjekwa nna iya ugvu, nwozhi l'akwabẹje onye-nwe-iya nụ ugvu. Ọ -bụruwho lẹ mu bụ nna unu ?ọo awe bẹ unu doberu ugvu, rwuberu mu nụ? Ọ -bụruwho lẹ mu bụ Onye-nwe-unu ?ọo awe bẹ unu doberu ẹso, gbarụ t'unu yeru mu?” O noo iwhe Onye-Nwe-Ọha bụ Onye-ishi-igwe-ọgu l'ekfuru unubẹ ndu ono, l'agbajẹ ẹja nụ Chileke, bụ ndu l'akpọ ẹwha mu ẹbo-ẹbo l'afụ.
“Unu l'a-jịkwaro sụ: ‘?Ndẹe g'anyi shi akpọ ẹwha ghu ẹbo-ẹbo l'afụ?’
7“Ụzo unu shi akpọ ẹwha mu ẹbo-ẹbo l'afụ bụ l'unu l'egudeje nri, l'aasọ nsọ bya atụshi l'ẹnya-mgbẹja mu.
“Unu l'a-jịkwaro ọdo sụ: ‘?Ndẹe ụzo, anyi shi emerwushi ghu?’
“Ụzo unu shi emerwushi mu bụ l'unu l'asụje l'ẹnya-mgbẹja nke mụbe Onye-Nwe-Ọha ta agbadụ t'a gụbe iya iwhe. 8Nteke unu gude anụ, l'atsọ ishi bya agbaarụ mu ẹja ?tọ bụdu unu ome ejo-iwhe? Nteke unu gude anụ, l'ete ọkpa mẹe anụ, ẹhu l'eme bya agbaarụ mu ẹja ?tọ bụdu unu ome ejo-iwhe? Unu kpụtanu anụ, dụ nno je akpẹe onye bụ ọ-chị-ọha alị unu, t'unu marụ mẹ ẹhu l'a-tsọ iya ụtso, ya emeeru unu iwhe-ọma.” O noo iwhe Onye-Nwe-Ọha, bụ Onye-ishi-igwe-ọgu l'ekfu ndono.
9“Sụa, unubẹ ndu ono, l'agbajẹ ẹja nụ Chileke, unu gudedaa ẹgube ngwo-ẹja ono je aryọo Chileke t'o meeru unu eze-iwhe-ọma, t'unu marụ ?ọo-nata iya unu? O nokwa iwhe Onye-Nwe-Ọha, bụ Onye-ishi-igwe-ọgu l'ekfu ndono.
10“Nggẹ l'ọ dụ g'e shi onye lanụ l'ime unu gụ-chia mgbo eze-ụlo mu ono agụ-chi, t'unu haa anọ akpọ ọku, l'adụa iwhe ọ bụ l'ẹnya-mgbẹja mu. Ẹhu ta atsọhekwa mu ụtso l'ẹka unu nọ. Ọ tọ dụkwa ngwo-ẹja, unu gude bya, mu l'a-nata l'ẹka unu ilile. O noo iwhe Onye-Nwe-Ọha bụ Onye-ishi-igwe-ọgu l'ekfu ndono. 11Lẹ mba gẹ mba ha, shizhiawho l'ẹnyanwu-awata jeye l'ẹnyanwu-arịba bẹ ẹwha mu hakwa shii. Ẹka lile bẹ l'aakpọru mu ụ̀nwù isẹnsu ọku, agbarụ mu ẹja guru egu, nkele ẹwha mu bẹ ha shii lẹ mba gẹ mba ha.” O noo iwhe Onye-Nwe-Ọha, bụ Onye-ishi-igwe-ọgu l'ekfu ndono.
12“Ọle unubẹdua l'anọje emetoshi ẹwha mu. Ụzo unu shi emetoshi ẹwha mu bụ agha; l'unu l'arịje l'ẹnya-mgbẹja mụbe Onye-Nwe-Ọha ta adụdu iwhe ọ bụ, unu l'arịjekwaawho l'ọo ẹka l'aa-bya atụshi nri, l'aasọ nsọ. 13Unu l'asụje: ‘Ẹgube iwhe ọwaa gvụakwaru anyi ike.’ Unu kfugee nno, unu anyaarụ mu eze.” O noo iwhe Onye-Nwe-Ọha bụ Onye-ishi-igwe-ọgu l'ekfu ndono.
“Unu l'egudeje anụ e zhitaru l'oshi mẹe anụ, l'ete ọkpa mẹe anụ, ẹhu l'eme bya l'unu l'agbarụ mu ẹja. ?Unu l'arị lẹ mu l'a-nata unu ẹgube ẹja ono? O nokwa iwhe Onye-Nwe-Ọha l'ekfu ndono. 14Onye l'aghọ ụgho bụkwa onye a tụru ọnu, mbụ onye nweru anụ bụ okee ya, o ribua nte lẹ ya l'a-kpẹe ya Onye-Nwe-Ọha, e megee ọ bụru anụ, ọrwu dụ l'ẹhu b'o gude gbaarụ mụbe Onye-Nwe-Ọha ẹja. Unu marụ amarụ lẹ mu bụkwa onye eze, parụ ẹka. Mba lile l'atsụkota mu egvu.” O noo iwhe Onye-Nwe-Ọha bụ Onye-ishi-igwe-ọgu l'ekfu ndono.
Currently Selected:
Malakayi 1: Ezaa
Highlight
Copy
Compare
Share
Want to have your highlights saved across all your devices? Sign up or sign in
© 2014, Wycliffe Bible Translators, Inc. in cooperation with Abakaliki Literacy and Translation Trust
