Zakaráya 14

Onye-Nwe-Ọha l'abya tẹ ya bụru eze

1Lekwa lẹ mbọku Onye-Nwe-Ọha l'e-kpe ikpe l'abyaakwa, mbụ mbọku, l'ee-gwo arya unubẹ ndu Jerúsalẹmu tụtua, nọdu l'iwhu unu kee ya. 2O noo lẹ mu l'e-rwuta mba gẹ mba ha, whẹ awụru bya ọgu lẹ Jerúsalẹmu. Whẹ alwụa obodo unu lwụta, gwoo arya dụ l'ụlo unu tụtua, gude ụnwanyi unu l'ike whaa kutukutu. Nkere ẹbo ndu obodo ono bẹ l'aa-kpụ lẹ ndzụ, ọle ndu ọwhu wuduru nụ ta adụdu onye bya l'e-dufu whẹ edufu l'obodo ono. 3Nteke ono bẹ Onye-Nwe-Ọha l'e-je alwụshi mba gẹ mba ha ono ọgu ẹgube ono, ọolwujehawaa l'oge ọgu. 4Mbọku ono bẹ l'ọo-kfụru gẹdemu l'eli ugvu ólivu ono, dụ chebe iwhu l'ụzo ẹnyanwu-awata Jerúsalẹmu. Ugvu Ólivu ono eshi l'ụzo ẹnyanwu-awata kekahu ẹbo jeye l'ụzo ẹnyanwu-arịba, oke nsụda, nweru ogbu anọkahu iya l'echilabọ, ibẹka ugvu ono nnanụ akpọliberu laa ụzo isheli, ibẹka lanụ akpọliberu laa ụzo ọhuda. 5Unu l'e-shi lẹ nsụda ugvu mu ono rebe ọso gbalaa nkele nsụda ugvu mu ono l'a-nọ jeye lẹ Ázelu. Unu l'a-gba ọso g'unu gbajẹru iya l'alị ọnma jijiji ono, mejeru nteke Uzáya bụ eze ndu Juda. O noo nteke Onye-Nwe-Ọha bụ Chileke mu yẹle ndu nkiya l'a-lị bya ndono.

6Mbọku ono bẹ iwhoro ta adụdu, oyi ta atsụ. 7Mbọku ono l'e-likolewho ọnu. Eswe ta adụdu, ẹnyashi ta adụ, iwhoro l'a-dụkota mẹe l'ẹnyashi. Onye marụ gẹ mbọku ono l'a-dụ dụ bụ Onye-Nwe-Ọha.

8Mbọku ono bẹ mini, l'anụ ndzụ l'e-shi lẹ Jerúsalẹmu asọshi. Nkere lanụ asọru laa eze-ẹnyimu ọwhu dụ l'ụzo ẹnyanwu-awata, nkere lanụ asọru laa eze-ẹnyimu ọwhu dụ l'ụzo ẹnyanwu-arịba, ọo-nọ asọ l'udzumini asọ l'ọnanwu. 9Onye-Nwe-Ọha abya abụru eze, l'achị mgboko l'owhu. Nteke ono bẹ Onye-Nwe-Ọha bẹ bụ Onye-Nwe-Ọha ono, ọ bụ bẹ l'ọo-bụru, ẹwha iya abụru iwhe ọ bụ.

10Alị ono g'ọ ha bẹ l'aa-rwazekota arwaze ya eshi lẹ Geba dụ barịkitii jeye lẹ Rimọnu, dụ l'ụzo ọhuda Jerúsalẹmu. Ọle Jerúsalẹmu l'a-sụru gẹdee tsefu ha l'imeli imeli, shi l'ọnoguzo Bénjaminu nọo jeye l'akahụ ọnoguzo, mbụ jeye l'ọnoguzo Mgburẹku, bya eshikwawho l'ụlo-eli Hananẹlu nọo jeye l'ẹka l'aapyịshijeru onye eze mmẹe l'akpụru vayịnu. 11Jerúsalẹmu abya abụru ẹka madzụ bu ebu. Ọla l'iswi ta abyadụ l'abatabaa ya ọdo. Ndu madzụ eburu iya nwee ntụsaru-ẹhu, ọ tọ dụdu iwhe l'e-me whẹ.

12Ọ waa bụ nchịkarehu, Onye-Nwe-Ọha l'e-wota doberu mba, tsoru Jerúsalẹmu ọgu: Whẹ l'a-nọdu ndzụ anụ, dụ whẹ l'ẹhu ereshihu ereshihu, akpụru-ẹnya adụ whẹ l'ukuku ẹnya ereshihu, ire adụ whẹ l'ọnu reshihu.

13Nteke ono bẹ Onye-Nwe-Ọha l'e-me iwhe ọotsu egvu abyakfuta whẹ, onyenọnu eje awọru ibe iya l'ẹka, whẹ alwụkfuru ọgu. 14Ndu Juda l'a-lwụ ọgu ẹhu Jerúsalẹmu. A tụko ẹku, ndu mba, buwheru whẹ mgburumgburu kparụ gwotakota, mbụ mkpọla-ododo, mbụ mkpọla-ọcha mẹe ẹkwa bẹ l'ee-gwotakota gwoo ya nke etsutsu.

15Ọ bụru ụdu nchịkarehu ono bẹ l'ee-wokfuta ịnya mmaanụ mẹe ịnya-mulu mẹe ịnya-kamẹlu mẹe nkakfụ-ịgara mẹe iwhe bụ anụ nọ l'ọdu-ọgu ndu ọhogu ono.

16E megee, ndu wafụru l'ẹka mba gẹ mba ha ono, tsoru Jerúsalẹmu ọgu ejejee Jerúsalẹmu awha g'awha ha je abaarụ Eze, bụ Onye-Nwe-Ọha bụ Onye-ishi-igwe-ọgu ẹja, whẹ erikwaawho oge Ime-mkpu. 17Mba nọ lẹ mgboko-o l'ẹte ejee Jerúsalẹmu je abaarụ Eze ono, bụ Onye-Nwe-Ọha bụ Onye-ishi-igwe-ọgu ẹja, bẹ mini l'a-byakwaa l'a-chịru whẹ. 18Ọ -bụru lẹ mba Íjiputu te ejedu je emee oke iya nke whẹ, Onye-Nwe-Ọha ewokfuta whẹ ẹgube nchịkarehu ono, o doberu mba gẹ mba ha ono, jịkaru lẹ whẹ te ejedu ori oge Ime-mkpu ono. 19Ọo ya bụ áwhụ, l'aa-nụ ndu Íjiputu yẹle mba gẹ mba ha, l'ete ejee Jerúsalẹmu je eria oge Ime-mkpu ono.

20O -rwulewho nteke ono bẹ iwhe l'ee-dekota l'ọku-mgbịrigba, a nyabẹru ịnya l'olu bụ: Ọ dụru Onye-Nwe-Ọha lẹ nsọ. Ite oshi iwhe dụ l'eze-ụlo Chileke bẹ l'e-dobeje nsọ g'ọo ochi ono, l'adụje l'ẹnya-mgbẹja. 21Iwhe bụ ite oshi iwhe dụkota lẹ Jerúsalẹmu mẹe lẹ Juda l'a-dụkotaru Onye-Nwe-Ọha, bụ Onye-ishi-igwe-ọgu lẹ nsọ. Ndu byarụ ọgwa Chileke l'a-patajẹ ite ono gude shia anụ whẹ gburu gude agwa Chileke ọbu. Nteke ono bẹ ndu l'agba nghọ ta anọhedu ọdo l'ụlo Onye-Nwe-Ọha, bụ Onye-ishi-igwe-ọgu.

Currently Selected:

Zakaráya 14: Ezaa

Highlight

Copy

Compare