Ozhi ndu ishi-ozhi 20

Iwhe e meru lẹ Masedóniya mẹe Girísu

1Ùtsú ono dazhitalewho, Pọlu bya ekukoo ndu nke Kuráyisutu bya agbẹe whẹ ọkpu-ike tẹ whẹ ba tsụkwa egvu. Ọ bya ekelegee whẹ, ọ tụgbua ọ bụru iya oje Masedóniya. 2Ọ tụko ẹka ono g'ọ ha jewhekota gude igwe okfu gbẹe whẹ ọkpu-ike. E megee, o jeshia Girísu. 3Ẹka ono b'ọ nọru ọnwa ẹto. A nọnyaa, ọ kwakọbe tẹ ya bahụ l'ụgbo jeshia alị Siriya. Ọle eshi ndu Ju chịru iya ejo idzu lẹ whẹ l'iya l'e-me l'ụzo bẹ yẹbedua chịtakwaruwho lẹ ya l'a-dawhu azụ, je eshita ụzo Masedóniya lashia. 4Ndu tso iya l'ije ono bụ Sópeta, nwa Pírọsu, onye Beríya mẹe Arisutákọsu mẹe Sekụ́ndosu. Ụmadzu labọ onona bụ ndu Tesalonáyika. O tsoru iya mbụ Gáyosu, onye Dabyi mẹe Tíkikọsu mẹe Tirọ́fimosu, ndu onona bụ ndu Éshiya. Tímoti tsokwaru iya who. 5Ndu onona bẹ vu anyi ụzo je anọdu lẹ Tirówasu kfụru-cheru anyi. 6E rigelewho oge ono, l'aatajẹ buredi, l'ete eyee iwhe l'ekoje buredi, anyi bahụ l'ụgbo lẹ Fílipayi tụgbua. A nọlewho ujiku ise; anyi byakfuta whẹ lẹ Tirówasu. E rwua ẹka ono, anyi nọo ya abalị ẹsaa.

Ejeje ikpazụ, Pọlu l'eje Tirówasu

7O belewho lẹ mbọku mbụ l'idzu, anyi dzukobe t'anyi ria Nri-ẹnyashi Onye-Nwe-Ọha. Pọlu zhilahaa whẹ iwhe nkele ọokwakobekwanu nke alala echile iya. O kfuzhiawho okfu jeye abalị daa ẹbo. 8Oryọku ha l'igweligwe l'ime ụlo-eli ẹka ono, anyi nyikotaru je adọru lẹ nke oroke-imeli-imeli iya ono. 9Nwokorọbya lanụ, l'aza Yútikọsu nọduwho anọdu l'ọnu windo. Pọlu kfunyalewho okfu ono, mgbẹnya rwelahaa Yútikọsu. A nọnyaa, mgbẹnya ono rwekota iya; o shi lẹ mkpokfu iya nke ẹto l'ẹka ono ngabuhu bya echia onwiya l'alị. E jeshia ya apali, o kekfubewaa. 10Pọlu bya enyizeta; bya azẹe ya l'eli nmapyabẹ iya onwiya; gbakụa ya ẹka sụ: “Unu ba akwagbushihe onwunu, l'ọ nọwaa ndzụ.” 11Ọ tụgbua dawhu azụ, je anyajaa buredi ono; kee; anyi ria. O kfulahaaru whẹ okfu ọdo, kfua ya jeye chi sahụ. Chi sahụlewho, ọ palihu lashia. 12Whẹ duta nwokorọbya ono lẹ ndzụ. Ọ bụru iwhe e gude dụa whẹ obu, obu kwata shihu whẹ ike ọkpobe eshihu.

Pọlu shi lẹ Tirówasu jeshia Milítọsu

13Anyi bya abahụ l'ụgbo ngafụ jeshia Ásọsu, t'anyi je apata Pọlu l'ẹka ono nkele ọ sụru t'anyi gude ụgbo byahejewaro lẹ ya l'e-gude ọkpa lụfuta ẹka ono. 14Ọ byakfuta anyi lẹ Ásọsu, anyi pata iya l'ụgbo; jee jeye anyi rwua Mitilíni. 15Tọ dụ iya bụ l'anyi eshi l'ẹka ono tụgbua, ọ bẹ echile iya; anyi shi l'ẹka ono gude ụgbo ghaa lẹ mgboro Kíyọsu. O rwua echile iya, anyi ngarwua Sámọsu. O be echile iya ọdo; anyi rwua Milítọsu. 16O noo lẹ Pọlu kfuhawaru sụ lẹ ya l'a-gha Éfesọsu agha nggẹ ya te eje ọkpo ụkfu l'alị Éshiya. L'ọ dụ iya ẹgwegwa nkele oome tẹ ya kebe ẹhu rwuada Jerúsalẹmu tẹmenu ya erwua mbọku Péntikọsutu.

Pọlu l'asụ ndu e meru ọgurenya chọchi lẹ Éfesọsu tẹ whẹ nọo ọwhoma

17Pọlu nọdu lẹ Milítọsu zhi t'e je ezhia ndu e meru ọgurenya chọchi lẹ Éfesọsu tẹ whẹ bya tẹ whẹ l'iya dzuda. 18Whẹ byakfutale iya who, Pọlu sụ whẹ: “Iwhe mu l'eme tẹ mu kfuru unu bụ: Unubẹdua l'onwunu mawarụ-a gẹ mu shi emeje eshi nteke ono, mu l'unu shi nọduta, nkeshi mbọku mbụ, mu byarụ alị Éshiya. 19Mu wozetaru onwomu alị ejeru Onye-Nwe-Ọha ozhi, mu gude ẹnya-mini, gude iwhe-ọtsulanu, byakfutaru mu nu, shikota l'ejo idzu, ndu Ju l'achịru mu eje ozhi ono. 20Mẹ unu makwarụ-a l'o to nwedu iwhe shitaru l'ụzo ono, Chileke l'e-shi dzọo unu, mu l'ete eshia ishi lanụ tọkashiaru unu, mbụ m'ọ tọ dụkwa ẹka, mu kfuru iya unu azụ okfu m'ọo nnanụ. Mu ryarụ iya unu aryarya, zhia ya unu ezhi l'edzudzu-ọha mẹe l'ibe unu l'ibe unu g'unu ha l'ẹhu l'ẹhu. 21Mu nmarụ ndu Ju ọkwa, nmaaru iya ndu l'ẹte abụa ndu Ju: tẹ whẹ da onwowhe ụta, haa iwhe-dụ-ẹji, whẹ l'emegbabe, lwakfuta Chileke bya ekweta l'ọo Jisọsu bụ Onye-Nwe-Ọha. 22Lẹ ntaa kwa iwhe Ume-Dụ-Nsọ zhiru mu bẹ mu l'eme. Mu l'e-je Jerúsalẹmu, tọ hẹkwa lẹ mu marụ gẹ l'ọo-nwụru mu l'ẹka ono. 23L'ọo lẹ ọwhu mu ka ogude ẹka bụ lẹ Ume-Dụ-Nsọ l'emeje, iwhe bụ mkpụkpu gẹ mkpụkpu ha mu bahụru, mu awhụa l'oje mkpọro mẹe iwhe-ọtsulanu, parụ ẹka swiru mu lẹ Jerúsalẹmu ono. 24Ọle ọ tọ dụdu iwhe mu kuru ndzụ mu. Iwhe mu l'ekfuzhianu bụ tẹ mu jefuzhianu ozhi, mu l'eje l'ishi, mbụ tẹ mu jefukota ozhi ono, Onye-Nwe-Ọha, bụ Jisọsu zhiru mu tẹ mu jee ono bụ iya bụ tẹ mu kfukashiaru ndiwhe nke ozhi-ọma: lẹ Chileke l'a-whụru whẹ imiko.

25“Ntaa bẹ mu mawarụ l'unubẹ ndu ono, mu tsoru jewhee, zhia ozhi-ọma l'ọo Chileke bụ eze ta awhụbahekwaa mu ọdo. 26O noo iwhe mu kwoberu sụ unu ntanụ-a, onye lekeberu ẹnya laa l'iyi, l'ẹka mụbe Pọlu ta adụhekwa l'ọchi iya. 27O noo lẹ mu tụkowaru iwhe lile, Chileke tụberu shi ishi lanụ tọkashiaru unu. Ọ tọ dụkwa ọwhu mu domiru unu edomi m'ọo nnanụ. 28Unu leta onwunu ẹnya, unu eletakwawho ụnwu-atụru ono, Ume-Dụ-Nsọ yeru unu l'ẹka ẹnya. Unu bụru ndu l'azụ chọchi, Chileke gude mmee ono, Nwa iya gbarụ l'oswebe, mee ọ bụru nkiya. 29Mu makwarụ-a lẹ mu lashilewho bẹ ndu ejo nzhi l'a-wụbata g'ọo ejo ágụ́ bya anmakashịa unu. Whẹ ta ahakwa igwe atụru ono m'ọo nnanụ. 30O nweru nteke l'aanọnyaa, ya enweru ndu l'e-shi l'echilabọ unu dzụlahaa ejire. Whẹ egude nno melahaa tẹ whẹ ghọta ndu kweru nke Kuráyisutu tẹ whẹ wọta ẹka whẹ. 31O noo iwhe meru unu je l'akwabẹkwaru onwunu ẹnya. Unu nyatajẹkwa lẹ mu kwatarụ gude ẹnya-mini, kebe ẹhu eme unu t'unu tsoru ụzo, kfụru nhamụnha. Mu zhiru iya unu l'ẹhu l'ẹhu: eswe l'ẹnyashi awha ẹto owhu.

32“Ntaa bẹ mu l'eye unu l'ẹka Chileke. Mu zhiwaru unu ozhi-ọma nke eze-iwhe-ọma, Chileke meru ndiwhe. Ọo ozhi-ọma ono l'e-chekwa unu. Ọ kwa iya l'a-dụ ike tụa unu g'ọo t'unu shihu ike, dụkwawho ike mee unu t'unu lẹ ndu ọdo, bụ ndu nke Chileke gba mgba nweru iwhe ono, o doberu ndu bụ nkiya. 33Sụa, unu marụ-a l'ọ tọ dụdu onye ẹgu iwhe o nweru gụjeru mụbe Pọlu. Ọ tọ dụkwa onye mu sụjeru t'ọ nụ mu afụ, ọdua l'ọo peni, ọdua l'ọo uwe. 34Unu makwarụwho l'ọo ẹka mu whẹ ẹbo-ẹbo bẹ mu gude jee ozhi jeta iwhe mu gude eme mkpa, dụru mu nụ; emekwawho mkpa ọwhu dụru ndu mu lẹ whẹ lị. 35Mu gudewaa nno goshi unu l'anyi l'anọje ejeshi ozhi anyi ike, nke ọwhu anyi l'e-gude nno yetaru ndu ọwhu l'adụa gẹ whẹ marụ iya ẹka. Tẹ anyi nyatajẹkwa iwhe ono, Jisọsu, bụ Onye-Nwe-Ọha kfuru l'onwiya sụ: ‘Onye wotaru iwhe nụ bẹ ẹhu kakwa ụtso, amamẹ onye ọwhu l'anata iya anata.’ ”

36Pọlu kfugee nno, o byishi ikpere yẹle ndu ono gẹ whẹ ha kfuru nụ Chileke. 37Ọ tụgbudelewho, whẹ tụko bawukota ẹkwa, je arwụkua ya ẹka l'olu, tsutsugee ya ọnu sụ iya t'ọ tọkwa ẹhu.

38Ọ bụru ekfukfu ono, o kfuru lẹ whẹ ta awhụbahedua ya ọdo ono bẹ kakọta whẹ orwu l'ẹhu, whẹ vudozhiaru iya who jeye l'ọnu ụgbo ẹka ụgbo iya dụ.

Currently Selected:

Ozhi ndu ishi-ozhi 20: Ezaa

Highlight

Copy

Compare