Ozhi ndu ishi-ozhi 19

Pọlu nọ lẹ Éfesọsu

1Gẹ Apọ́losu nọ lẹ Kọ́rintu bẹ Pọlu tụgburu ụzo ẹnyanwu-arịba lụfu Éfesọsu. O rwua ẹka ono, ọ harụ whụa ndu l'etso ụzo Jisọsu. 2Ọ jịa whẹ: “?Unu natawarụ Ume-Dụ-Nsọ nkeshi ono, unu kweru l'ọo Jisọsu bụ Onye-nwe-unu?”

Whẹ sụ iya: “Wawa, anyi tẹke anụbukwaa nke Ume-Dụ-Nsọ.”

3Ọ jị whẹ: “?Ọo ẹgube baputizimu gụnu b'e meru unu?”

Whẹ sụ iya l'ọo baputizimu Jọnu.

4Pọlu sụ whẹ: “Jọnu shikwa emeje baputizimu gude egoshi l'onye-e bẹ dawarụ onwiya ụta, hawaa ome iwhe-dụ-ẹji o meru, lwakfuta Chileke. Iwhe ọdo, o shi ekfujefuaru ndu Ju bụ tẹ whẹ wokwaru ndzụ whẹ ye l'ẹka onye ono, l'etso iya l'azụ bụ iya bụ Jisọsu.” 5Whẹ nụ-gee iwhe ono Pọlu kfuru, e gude ẹwha Onye-Nwe-Ọha, bụ Jisọsu mee whẹ baputizimu. 6Pọlu bya abyabẹ whẹ ẹka l'ishi, Ume-Dụ-Nsọ bya eji whẹ ẹhu. Whẹ ghaa okfu-alị whẹ, kfulahaa okfu, Ume-Dụ-Nsọ l'egoshigee whẹ, whẹ watalẹkwawho okfuchiru Chileke. 7Ndu ono rwukwaru l'ụmadzu iri l'ẹbo.

8Pọlu nọkota ọnwa ẹto owhu kfukota nke Chileke l'ụlo-ndzuko ndu Ju, tọ tsụ egvu. Whẹ l'iya l'anọje atụ ntụtego. L'ọonoje eme t'o doo whẹ ẹnya l'ozhi-ọma nke ẹka ono, Chileke bụ eze ono bụ ọkpobe-okfu. 9Ọle ndu ono harụ bụru kpọkponyi, whẹ te ekweta iwhe Pọlu kfuru. Whẹ wata anọ ekfubyishi Ụzo nke Onye-Nwe-Ọha ono ekfubyishi l'ẹka ono. Pọlu parụ whẹ haa, duta ndu ọwhu bụ ndu nke Kuráyisutu, whẹ tụgbua. Mbọku-mbọku, ya ejeshia ookfu okfu Chileke l'ụlo ẹka l'eedzukoje nke ọnwu iwhe l'ibe Tiránọsu. 10O mezhia ya who nno jeye, o mee ya awha labọ owhu. Ọo ya bụ, ndu bukota l'alị Éshiya, mẹe ndu Ju, mẹe ndu Girísu nụkota okfu Onye-Nwe-Ọha, bụ Chileke.

Ụnwu Sukíva

11Chileke shi l'ẹka Pọlu eme iwhe-awhụrulenya, l'eteke emebu-a, 12nke ọwhu l'ọobuje: e shi iya l'ẹhu wota nkachifu, ọbu nwampekala ẹkwa gude jekfu ndu ẹhu l'adụa mma, whẹ emehukota l'iwhe ọbu, l'eme whẹ nụ; nteke bụ l'ọo ejo-maa bu whẹ l'ẹhu, ejo-maa ọbu alụfuchaa. 13O nwekwaruwho ndu Ju, tsoru ejewhe achịshikwawho ejo-maa, bugee ndu madzụ l'ẹhu. Whẹ l'anọje eme tẹ whẹ gude ẹwha Jisọsu eme iwhe ono. Whẹ l'asụje ejo-maa ono: “Mu gude ẹwha Jisọsu, onye Pọlu l'ekfu okfu iya ekfuru ghu t'ị lụfu.” 14O nweru nwoke onye Ju, bụ onye ishi ndu l'agbajẹ ẹja nụ Chileke, l'aza Sukíva. Nwoke ono nwụtaru ụnwegirima unwoke ẹsaa. Ọo ya bụ l'ọ bya ebe ujiku lanụ, ụnwegirima ono mekwaawho tẹ whẹ gude ẹwha Jisọsu chịfu ejo-maa lẹge ndu ọwhu l'achịfuje whọ.

15Ejo-maa ono, whẹ l'eme tẹ whẹ chịfu sụ whẹ: “Jisọsu bẹ mu marụ, makwarụwho ọwhube Pọlu, unubẹdua ?unu bụ ndu ole?”

16Onye ono, ejo-maa bụ l'ẹhu gude ejo ọkpehu lwụshi whẹ ọgu, nke ọwhu bụ l'ọ ka whẹ ẹsaa ono ike. O meka whẹ iwhe, gbabẹchaa whẹ ọto. Whẹ shi l'ụlo gbafụ gbalashịa. 17Ndu Ju mẹe ndu l'ẹte abụa ndu Ju, bu lẹ Éfesọsu nụkota iwhe ono, whẹ tsụlahaa egvu. A kwabẹlahaa ẹwha Onye-Nwe-Ọha, bụ Jisọsu ọkpobe ugvu. 18Igweligwe ndu kwetaru woru onwowhe ye Kuráyisutu l'ẹka bya adụshide iwhe-dụ-ẹji, whẹ shi anọje emegbabe. 19Ndu shi agwọ mgbọro-ọgvu chịfuta-gezhia ẹkwo, whẹ shi egudeje agwọ ọgvu ono, chịkobe iya ẹka lanụ, kpọo ya ọku l'iwhu ọha. A bya agbakọo aswa ẹkwo ono, ọ bụru ụkporo ẹkpa-ego iri l'ẹbo l'ẹkpa-ego iri. 20E shi nno, okfu Chileke goshi ire, dụ iya l'ẹhu, ọ kabakwaawhọ ojedzuru mgboko, kabaa oshihu ike.

Ùtsú l'etsu lẹ Éfesọsu

21Iwhe ono nwụ-gelewho, Ume-Dụ-Nsọ mee tẹ Pọlu sụ lẹ ya shifutaje Masedóniya mẹe alị Akáya lụfuwaro lẹ Jerúsalẹmu. Ọ sụ lẹ ya jegelewho ẹka ono bẹ ya l'e-jekwawho Romu. 22Ọ bya ezhi ụmadzu labọ lẹ ndu l'eyejeru iya ẹka: Tímoti yẹle Ẹrásutosu tẹ whẹ vuru iya ụzo jeshia Masedóniya. Yẹbedua nọtabaadaa l'alị Éshiya t'o jekfude whẹ.

23Ọ bụlekwaruwho nteke ono bẹ oke mkpaka batarụ lẹ mkpụkpu ono. Iwhe kparụ iya bụru nke otso Ụzo nke Onye-Nwe-Ọha. 24O noo l'o nweru onye l'akpụ ụzu, l'eme nka shii, l'eegudeje mkpọla-ọcha akpụshi ụnwu iwhe l'adụ-gejee g'ọo ụlo eze-nwanyị ndu Éfesọsu, l'eekuje Atẹ́misu. Ẹwha onye ụzu ono bụ Dimítiriyọsu. Yẹle ndu l'akpụjeru iya iwhe ono gude iya akpa okpoga nke ẹtu. 25Ọ bya ekukoo ndu lile ono l'ẹka lanụ mẹ-gee iwhe lile, bụkota ndu ọgbo ụzu ono, sụ whẹ: “Ndu nke mu! Unu marụ-a l'ọo iwhe-e, anyi l'eme bẹ anyi gude aba. 26?Ọ kwa l'unu l'anụa-a, tẹmenu unu l'elekwawho iwhe nwoke-e, bụ Pọlu l'eme? Ọ sụru l'agwa, madzụ gude ẹka dobe ta abụdu ọkpobe iwhe ilile. Ntaa b'o gudeekwaa nno kfubuta ndu ha l'igweligwe lẹ Éfesọsu, o wuduwaru-a nwanshị nta-a, ya egude iya jekota alị Éshiya l'owhu. 27Iwhe dụ ẹji, dụ iya nụ bụ l'iwhe-e, anyi l'eme-e bẹ l'e-vuta ejo ẹwha. Ọwhu kabaarọ njọ bụru l'eze-ụlo eze-nwanyị ono, bụ Atẹ́misu ta adụhedu iwhe l'ọo-bụbaa. Ọdo bụ l'aa-parụ iya haa, mbụ eze-nwanyị ono, alị Éshiya l'owhu mẹe mgboko owhu l'abyajẹ ọbaru ẹja.”

28Ikpoto ndu ono nụnyalewho iwhe ono, l'ookfu; iwhu gbangahụ whẹ l'ẹhu-eghughu. Whẹ tụ ụzu sụ: “Atẹ́misu Éfesọsu bụ eze agwa-oo!” 29Ùtsú da lẹ mkpụkpu ono. Whẹ dzukobe nteke onowho, gude Gáyosu yẹle Arisutákọsu, bụkota ndu Masedóniya labọ, whẹ lẹ Pọlu l'alịje, kpụta whẹ kpụfuru ọha l'ẹka obodo ono l'edzuje. 30Pọlu l'onwiya chọde tẹ ya jekfu ikpoto ndu ono, ọle ndu nke Kuráyisutu te ekwedu t'o je. 31Ndu a marụ ẹwha whẹ lẹ Éshiya, bụkwanu ndu whẹ l'iya l'eshi ọnya zhia ozhi sụ t'e je zhia ya: byiko, tẹ ba awhụbukwaa ya l'ẹka ono, obodo l'edzuje awhụwhu owhu. 32Nkele nteke ono bẹ ùtsú ono dekotaru gbigbigbi l'ẹka ono, whẹ dzukoru. Ndu l'ekfu nke ne whẹ, ndu l'ekfu nke nna whẹ; o noo l'o wuduru mẹe ya abụru lẹ ndu lile ono kụru l'ẹka ono ta adụdu onye ọwhu marụnu m'ọo iwhe ọbu, whẹ kwoberu gbafụta, nke ewhoroo lẹ whẹ marụ iwhe ọbu, l'ada nụ. 33Ọo ya bụ, e dobenu sụ l'ọo nwoke ọbu, ẹwha iya bụ Alẹguzánda bẹ kparụ iwhe l'ada nkele ndu Ju họfutaru iya, nwufu iya ye l'iwhu l'echi ọha ono. Alẹguzánda bya ewheeru whẹ ẹka t'e gebe tẹ ya dofu onwiya. 34Whẹ whụlewho l'ọ bụ onye Ju, whẹ tụko gẹ whẹ ha gude olu lanụ chilahaa sụ: “Atẹ́misu Éfesọsu bu eze agwa-oo!” Whẹ ryazhiawho iwhe ono mkpụrudumulanu jeye iwhe ha g'ọo awa labọ gaa.

35E megee, onye l'ederu obodo ono ẹkwo bya ekebe ẹhu ryabua whẹ. Ọ sụ whẹ: “Ndu Éfesọsu! Ọ tọ dụdu onye l'amaa l'ọo Éfesọsu bụ mkpụkpu, nwe eze-ụlo Atẹ́misu ono, bụkwaru iya whọ l'abarụ ntẹkpe ono, gbarụ iche, shi l'igwe daa ẹja. 36Ọ tọ dụkwa onye l'a-sụ l'ọo ejire. O noo iwhe meru mu sụ t'unu daa jii. T'unu be emehekwa g'ọo ndu l'ẹte amaa iwhe ọdo. 37Unu kpụtawaru ndu-a bya ẹka-a, l'ẹbe abụ lẹ whẹ zhitaru iwhe l'eze-ụlo eze-nwanyị ono, tẹmenu tọ dụ ejo okfu, whẹ kfuru iya. 38Sụa, nteke bụ lẹ Dimítiriyọsu mẹe ndu ọgbo ụzu iya nweru ndu whẹ sụru l'o nweru iwhe whẹ meru whẹ, mbọku ikpe kọtu bẹ dụlekwawho adụ, tẹmenu ndu ishi, l'achị mkpụkpu nọdukwawho l'ẹka ono. Tẹ whẹ je ẹka ono je ekfu iya. 39Nteke bụ l'o nweru iwhe ọdo, unu l'ekfu, unu ekfua ya mẹe mkpụkpu dzulewho edzudzu okfu. 40O noo l'ejo iwhe dụ iya nụ kwa l'aa-sụ l'anyi kparụ ùtsú ntanụ-a, l'ẹbe abụkwanu l'o nweru ishi iwhe bụkwanu: e -kude anyi, anyi egude iya dofu onwanyị l'ẹgube mkpu ọwa-a, a gbakọru ẹgube-ẹ ntanụ-a.” 41O kfugee nno, ọ sụ whẹ tẹ whẹ lashia, whẹ wụfu lashia.

Currently Selected:

Ozhi ndu ishi-ozhi 19: Ezaa

Highlight

Copy

Compare