Ozhi ndu ishi-ozhi 18

Iwhe l'eme lẹ Kọ́rintu

1E megee, Pọlu shiwaro lẹ Átẹnsu jeshia Kọ́rintu. 2O rwua ẹka ono, ọ whụa onye Ju, ẹwha iya Akwị́la. Ẹka, a nwụru iya anwụ bụ lẹ Pọ́ntosu. Ọ bụ-woo bẹ Akwị́la yẹle nyee ya bụ Prisíla shi Ị́tali lwa Kọ́rintu. Iwhe meru whẹ lwatashia bụkwaru l'ishi ọ-chị-ọha, bụ Kulọ́diyosu bẹ tụru iwu sụ tẹ iwhe lile, bụ ndu Ju lụfukota l'alị ndu Romu. Pọlu bya eje, whẹ l'iya jịa. 3O rwua, whẹ l'iya nọduwaro tụko ese anya ẹhu whẹ, nkele ọ kwanụ ọga iwhe lanụ bẹ whẹ tụkoru eme gude akpata ẹwho whẹ, bụ iya bụ okwe ẹkwa, e gude eme ụlo-ẹkwa. Pọlu l'onwiya bụkwawho onye l'ekweje ẹkwa. 4L'oojeje l'ụlo-ndzuko ndu Ju l'iwhe bụ-zhia mbọku ndu Ju l'atụtaje ume tẹ ya je edzushi whẹ idzu, kfulahaa nke Chileke, l'ọonoje eme tẹ ya kfuta ndu Ju mẹe ndu Girísu yeru Jisọsu.

5Sáyilasu yẹle Tímoti shi lẹ Masedóniya lwalẹwho, Pọlu whube iwhu nteke ono l'okfu nke Chileke mbọku-mbọku; l'oogoshi ndu Ju l'ọo Jisọsu bụ Onye-Ndzọta ono, Chileke kweru ụkwa iya ọbu. 6Nteke whẹ jịkaderu okfu iya, ekfukwaru iya who ejo okfu, ọ jịa uwe iya pukalangu sụ whẹ: “Swaa ẹka mu swaa ọkpa mu tukobekwa unu, ọchi ẹhu unu tukokwaru unu l'ishi, l'ẹka mbẹdua ta adụhekwa iya. Ntaa bụakwa ndu l'ẹte abụa ndu Ju bẹ mu bya l'echeberu iwhu.” 7Ọ haa whẹ lụfu-shia, je eburu l'ibe onye Girísu, l'eekuje Tíshọsu Jọ́sutusu. Tíshọsu ono bụ onye Chileke dụru lẹ nsọ. Ibe iya bẹ dụkube ụlo-ndzuko ndu Ju. 8Onye ishi ụlo-ndzuko ono, bụ Kirísupọsu bẹ yẹle ndibe iya kpakọru kweta l'ọo Jisọsu bụ Onye-nwe-whẹ-nụ. A hakwawhọ l'igweligwe lẹ Kọ́rintu ono nụa nke Jisọsu; whẹ woru onwowhe ye Jisọsu l'ẹka, e mee whẹ baputizimu.

9O be l'ẹnyashi ujiku lanụ, Pọlu whụa ọwhulenya. Jisọsu sụ iya: “Be ejezhikwaa ọtsu-egvu, Pọlu! Kfujelekwawho iwhe l'iikfu, ba adụkwa nteke l'ịi-ha iya. 10Mu kfụkwaru-a swiru ghu. Ọ tọ dụkwa onye bya l'a-fụru ghu, meka ghu iwhe, o noo l'a hakwa l'urwu lẹ mkpụkpu-a bụkotaru ndu nkemu.” 11Tọ dụ iya bụ lẹ Pọlu anọo awha owhu l'ọnwa ishii l'ẹka ono, zhikota okfu Chileke.

12Nteke ono bụru Gáliyo bẹ bụ onye ọ-chị-ọha ndu Akáya. Ndu Ju bya anọkobe gude Pọlu, kpụfu iya l'ụlo-ikpe. 13Whẹ sụ lẹ Pọlu l'eme tẹ ya mee ndibe whẹ tẹ whẹ bajẹru Chileke ẹja l'ụzo, l'abụa iwhe iwu kfuru.

14Pọlu jeshia oye ọnu, Gáliyo sụ ndu Ju ono: “Nggẹ l'ọo iwhe l'iwhe-e bụ okfu l'e mesweru, ọdua l'ọo ejo akpamara b'e meru mẹ mu asụ: Ee! L'ọ dụa ree tẹ mu yeeru unubẹ ndu Ju ọnu. 15Ọle eshi-ọwhu iwhe unu l'adzọ bụ nke ẹwha, mẹe okfu, e kfuru l'ọnu, mẹe nke iwu unu; a-a, t'unu jekwa edoshia ya l'onwunu. Mu te ekpejekwa ẹgube ikpe ono.” 16Ọ chịshia whẹ l'ụlo-ikpe ono. 17Whẹ tụko gẹ whẹ ha gude Sosutenisu, bụ onye ishi ụlo-ndzuko ndu Ju ono, chingaa ya ẹhu l'iwhu ụlo-ikpe l'ẹka ono. Gáliyo te eyeru whẹ ọnu.

Pọlu l'adawhu azụ lẹ Ántiyọku

18E megee, Pọlu yẹle ụnwunna byakwa anọfua nwidzudzu ono, ọ haa whẹ yẹle Prisíla mẹe Akwị́la lịru bahụ l'ụgbo jeshia Siriya g'o rwushigeedaru ẹgbushi iya lẹ Kenkiríya nkele iwhe o kweru Chileke ụkwa iya b'o mewaru. 19Whẹ rwua Éfesọsu. Whẹ rwua ẹka ono, Pọlu haa Prisíla yẹle Akwị́la, bahụ l'ụlo-ndzuko ndu Ju tẹ yẹle ndu Ju kfulahaa nke Chileke. 20Whẹ ryọo ya tẹ whẹ l'iya nọtabaa, to kwe. 21Ọ tụgbua, ọ sụ whẹ lẹ ya l'a-dawhu azụ ọdo byakfuta whẹ, m'ọ -bụru-a uche Chileke. Ọ bahụ l'ụgbo lẹ Éfesọsu tụgbua.

22O rwulewho Sizaríya, ọ bya egude ọkpa jeshia Jerúsalẹmu, je ekele ndu chọchi ẹka ono. O shiwaro eli eli jeshia Ántiyọku. 23Ọ nọlekwawho nwanshị lẹ Ántiyọku, ọ tụgbua ọdo. O je eshita alị Galéshiya mẹe Firíjiya, emekaa t'obu kabaa oshihu ndu nke Kuráyisutu ike l'ibiya onona.

Apọ́losu l'abya Éfesọsu mẹe Kọ́rintu

24O nweru onye Ju, ẹwha iya bụ Apọ́losu, a nwụru lẹ Aleguzándiriya, byarụ Éfesọsu. Ọ marụ gẹ l'eekfuje okfu, makwarụwho iwhe e deru l'ẹkwo Okfu Chileke mashịaru iya ike. 25E zhikotahawaru iya nke Ụzo nke Onye-Nwe-Ọha, mbụ ọ kwatawaa awhọ iya l'obu awhọshi iyẹ ya ike tẹ ya kfuru ndu ọdo nke Jisọsu, tẹmenu l'oozhikwa iya whọ ezhi. Ọotukoje okfu ẹhu Jisọsu ono shi ishi lanụ ahakashị iya nnanụ nnanụ. Ọle ẹka, ọ maberu bẹ bụlewho lẹ baputizimu ono, Jọnu shi emeje who. 26Ọ wata anọ asa okfu Chileke kaa kaa l'ụlo-ndzuko ndu Ju ono, t'ọ tsuje egvu. Prisíla yẹle Akwị́la nụlewho iwhe l'ookfu, whẹ bya eduta iya duru laa ibe whẹ, je akabaa ya ozhirwe Ụzo Onye-Nwe-Ọha ezhirwe. 27Apọ́losu sụ lẹ ya l'e-je alị Akáya. Ụnwunna, nọ lẹ Éfesọsu sụ iya l'ọ dụkwa ree shii, whẹ bya ederu ẹkwo nụ iya tẹ ndu nke Kuráyisutu, nọ l'ẹka ono nata iya ree-ree-ree. O rwua ẹka ono, ọ kwata yeru whẹ ẹka shii, mbụ ndu bụwaa ndu shi l'eze-iwhe-ọma, Chileke meru whẹ kweta l'ọo Jisọsu bụ Onye-nwe-whẹ-nụ. 28L'ọo tukputaje ndu Ju l'ẹgo l'edzudzu-ọha, l'oogudejekwawho iwhe e deru l'ẹkwo Okfu Chileke egoshi whẹ iya ree-ree-ree l'ọo Jisọsu bụ Onye Ndzọta, Chileke kweru ụkwa iya ọbu. Mbụ l'ọo tukputaje whẹ nke ọwhu bụ l'ọ tọ dụhedu onye ọwhu l'amabajẹkwadua ọnu, l'oo-ye.

Currently Selected:

Ozhi ndu ishi-ozhi 18: Ezaa

Highlight

Copy

Compare