Ozhi ndu ishi-ozhi 12

E gburu Jémusu, tụa Pyita mkpọro

1Ọ bụru nteke ono bẹ eze, bụ Hẹ́rodu harụ ndu chọchi dabẹ ẹka, akpa whẹ ẹhu. 2O gude Jémusu, bụ nwune Jọnu gbuta iya ishi. 3O lee ẹnya, whụa l'egbugbu, ya gburu nwoke ono bẹ dụ ndu Ju ree, o je egudefua ọwhube Pyita. Nteke o guderu ọwhube Pyita bẹ bụ mbọku, l'eeri oge ono, l'aatajẹ buredi, l'eete eyee iwhe l'ekoje buredi. 4O gude Pyita tụa ya mkpọro. Ọ bya eye ndu ojọgu iri l'ishii: gbaa whẹ ẹno ẹno, dobe tẹ whẹ cheje iya nche. Iwhe Hẹ́rodu rịkwanuru bụru l'ọo e rigee oge ono, woo: ya akpụfutaru iya ọha. 5Ọo ya bụ, Pyita nọdu l'ụlo mkpọro, ọle ndu chọchi l'ekfulewho anụ Chileke ekfushi iya ike l'iswi ẹhu iya.

Ojozhi-imigwe l'adzọ Pyita lẹ mkpọro

6O belewho l'ẹnyashi mbọku, bụkwanu: chi iya -sahụ, Hẹ́rodu akpụta Pyita kpụfutaru ọha, Pyita nọdu eku mgbẹnya. Ndu ojọgu labọ nọdu iya ibẹka ibẹbo eche iya nche. A tụa ya mkpọro uzhi labọ l'ẹka. Ndu ojọgu nọdu-gee nche l'ọnu ọka-mkpọro ono. 7A bya l'amadeshia, ojozhi-imigwe, shi l'ẹka Onye-Nwe-Ọha kfụwaru l'ẹka ono, Pyita nọ. Ụlo mkpọro ono g'o ha nwukotalewho whoo. Ojozhi-imigwe ono bya enwua Pyita ẹka, kutee ya sụ iya: “Ngwa, tehu ẹgwegwa!” Mkpọro ono, a tụru iya l'ẹka labọ tụshihu dakọta l'alị. 8Ojozhi-imigwe ono sụ iya: “Weru iwhe ghu t'o shihu ghu ike l'ukfu, gụ achịta akpọkpa ghu yee ẹgwegwa.” Pyita bya emee g'e kfuru iya. Ojozhi-imigwe ono sụ iya: “Chịta ukpo ghu gbakụa onwoghu tsoje mu l'azụ.” 9Pyita tsoru iya, whẹ lụfu l'ụlo mkpọro ono. Pyita ta ama l'iwhe ono, ojozhi-imigwe ono l'eme bẹ bụ iwhe l'eme lẹ madzụ. O dobeleru-a g'ọo lẹ nrọ bẹ ya l'arọ iya. 10Whẹ bya aghata ndu nche nke ivurụzo, bya aghaa ndu nke ẹbo, jezhiawho jeye whẹ jerwua ọnu ẹka l'eeshije abata l'ime mkpụkpu ono, bụ mgbo-igwe b'e gude guchia ọnu ẹka ono. Ọnu ẹka ono gụhaa onwiya, whẹ ghata tụgbua. Whẹ tsoru ụzo lanụ l'ime mkpụkpu ono. Ọo ya bụ, a bya l'amadeshia, ojozhi-imigwe ono mihuwaa parụ Pyita haa nwẹkiya.

11Nteke ono Pyita bya amarụ iwhe shi eme nụ, ọ sụ: “Ntaa b'o doru mu ẹnya l'iwhe-e bẹ bụ iwhe meru lẹ madzụ. L'ọo Onye-Nwe-Ọha zhiru ojozhi-imigwe iya, ọ bya adzọfuta mu l'ẹka Hẹ́rodu, dzọfuta mu l'ẹka iwhe lile, bụ iwhe ndu Ju l'arị lẹ whẹ l'e-me mu.”

12Ọ malẹruwho ẹka ọ nọ, ọ bya atụgburu nteke ono jeshia ibe Méri whẹ bụ iya bụ ne Jọnu Makụ. Igweligwe madzụ dọkoberu l'ẹka ono ekfu anụ Chileke. 13Pyita bya akụa ẹka l'ụzo. Nwata nwamgbọko, yẹle madzụ bu, l'eezhije ozhi jeshia ọmaru onye ọ bụ. Ẹwha nwamgbọko ono bụ Roda. 14Ọ nụlewho olu Pyita, ẹhu tsọde iya ụtso, tsọta iya nke ọwhu o gbee haa ọguha ụzo ono, ọ gbawhu azụ je aryaaru whẹ l'o kwa Pyita bẹ kfụru l'ọnu-ụlo ono. 15Whẹ sụ iya: “?Ọo ọgvu l'eme ghu?” L'ookfukwaa iwhe l'ookfu ekfushi iya ike. Whẹ sụ l'ọo bụkwa l'ọo ojozhi-imigwe, l'edu Pyita.

16Pyita l'akụkwaa ẹka-a gẹ l'ọoku iya. A nọnyaa, whẹ bya agụhaa ụzo. Ọ kpụbe whẹ ọnu okfu gẹ whẹ whụru iya. 17O meeru whẹ ẹka pọpopo tẹ whẹ ngabẹ nchị. Ọ bya eshi ishi lanụ kọoru whẹ gẹ Onye-Nwe-Ọha gude dufuta iya l'ụlo mkpọro ono. Ọ sụ whẹ tẹ whẹ kọoru iya Jémusu mẹe ụnwunna ndu ọwhu. Ọ tụgburu jeshia ẹka ọdo.

18Chi sahụlewho, ọ tụfu ndu ojọgu ono, nọ nche ẹhu g'ọ nwụru Pyita. Whẹ gbahụ yabayaba. 19Hẹ́rodu sụ t'e tsoru chọ-whee ya. A chọ-gee ya, t'a whụ iya. Ọ jị-gee ndu nche ono ajị, o zhi t'e gbutachaa whẹ ishi.

E megee, Hẹ́rodu shi lẹ Judíya jeshia Sizaríya je anọo nwọdu.

Hẹ́rodu nọ ndzụ tụa ikpiri-ẹhonwu

20A nọnyaa, okfu daarụ Hẹ́rodu yẹle ndu mkpụkpu Taya mẹe Sáyịdonu, Hẹ́rodu vọru ọku ghụa ẹhu. Whẹ bya ahọta madzụ ye tẹ je aryọo ya. Whẹ vuru ụzo je aryọ-butaada Bulásutọsu bụ iya bụ onye l'eleta ẹnya l'ibe eze. Whẹ ryọ-butale iya whọ tẹmenu whẹ jekfu eze nteke ono je aryọo ya t'e doshia okfu ono, nke l'ọo l'alị-eze iya b'e shi ewotaru whẹ nri.

21Obenu mbọku, Hẹ́rodu tụru ọnu okfu ọbu, ọ bya akwaa onwiya l'uwe onye eze iya, bya anọdu l'oshi-eze iya, wata anọ eyeru ndu ono ọnu. 22Whẹ tụa ụzu sụ: “Ọ tọ bụhekwa madzụ l'ekfu okfu-a-o! Ọ waakwa iya bụ chi!” 23Nteke onowho, ojozhi-imigwe, shi l'ẹka Onye-Nwe-Ọha chitalekwawho Hẹ́rodu tụa gburugudu nkele ọ harụ, e wota ugvu, rwuberu Chileke kpụ akwabẹ yẹbedua. Ikpiri-ẹhonwu bya eripyabe iya tagbua. Ọ nwụhu.

24Okfu Chileke kabaa nụ edzuru ẹka lile; a kabakwaarọ adụ l'igwe kweta nke Onye-Nwe-Ọha.

Chileke l'ahọta Sọlu yẹle Bánabasu

25Bánabasu yẹle Sọlu jegee ozhi, e zhiru whẹ, whẹ shi lẹ Jerúsalẹmu dawhushia azụ lẹ Ántiyọku. Whẹ duta Jọnu Makụ, whẹ l'iya lịru.

Currently Selected:

Ozhi ndu ishi-ozhi 12: Ezaa

Highlight

Copy

Compare