Ozhi ndu ishi-ozhi 13

1Lẹ chọchi, dụ lẹ Ántiyọku b'o nweru ndu nkfuchiru Chileke, nọ iya nụ mẹe ndu l'ezhije okfu Chileke. Ẹwha whẹ bụ Bánabasu, mẹe Símiyọnu, onye l'eekuje Náyija, bụ iya bụ Nwuji, mẹe Lúsiyọsu, onye Sayiríni, mẹe Sọlu, mẹe Manéyenu, onye bụ yẹle Hẹ́rodu, bụ ọ-chị-ọha b'e hefutaru l'uwhu lanụ. 2O be ujiku lanụ, whẹ dọkobe aswị ẹgu ekfu anụ Chileke, Ume-Dụ-Nsọ sụ whẹ: “Unu họfutaru mu Sọlu yẹle Bánabasu tẹ whẹ jeeru mu ozhi mu kuturu whẹ tẹ whẹ bya ejee.”

3Ndu chọchi swịa ẹgu kfuru nụ Chileke bya abyabẹ whẹ ẹka l'ishi whẹ jeshia.

Iwhe l'eme lẹ Sáyipurọsu

4Eshi ọ bụ Ume-Dụ-Nsọ bẹ zhiru Sọlu yẹle Bánabasu, whẹ tụgburu jeshia Selúsiya je abahụ l'ụgbo mini jeshia alị Sáyipurọsu, eze-ẹnyimu gbawheru mgburumgburu. 5Whẹ rwua Sálamisu, whẹ kfua okfu Chileke l'ụlo-ndzuko ndu Ju, dụ-gee l'ẹka ono. Whẹ lẹ Jọnu Makụ lịkwaruwho t'o yejeru whẹ ẹka l'oje ozhi ono.

6Whẹ tsoru alị ono, mini gbawheru mgburumgburu ono jeye whẹ rwua Páfọsu, dụkwawho l'alị ono. Whẹ whụa onye Ju, nọ l'ẹka ono, l'ada lẹ mgbashị, ọ sụkwawho lẹ ya bụ onye nkfuchiru Chileke. Ẹwha iya bụ Ba-Jisọsu. 7Ọ bụru ọnya onye ọ-chị-ọha, l'achị alị ono, mini gbawheru mgburumgburu. Ẹwha ọ-chị-ọha ono bụ Sẹ́jiyosu Pọlosu. Sẹ́jiyosu Pọlosu ono bụru nwoke, kwatarụ marụ iwhe shii. Ọ-chị-ọha ono bya ekua Bánabasu yẹle Sọlu tẹ whẹ bya, nke l'ọogu iya ẹgu tẹ ya nụa okfu Chileke. Whẹ byakfuta iya. 8Ọo ya bụ, Ba-Jisọsu melahaa tẹ ya kpọshia iwhe Sọlu whẹ byarụ; nke l'ọ tọ dụdu iya nke tẹ ọ-chị-ọha ono kweta nke Chileke. Iwhe l'eekuje iya l'okfu Giríku bụ Élimasu bụ iya bụ onye l'ada lẹ mgbashị. 9Ọo ya bụ, Ume-Dụ-Nsọ bya eji Sọlu ẹhu, bụ onye l'eekujekwawho Pọlu. O kefuru onye ono, l'ada lẹ mgbashị ono ẹnya 10sụ iya: “Gụbe nwa Oshifutuswe. Mbụ gụbe onye l'anọje emebyishi iwhe dụ ree emebyishi. Ọ tọ dụdu ẹgube ụgho, l'ịitii ghọ, tọ dụ ẹgube ẹregede, ị gbawhodoru. ?Ọo nteke ole bẹ l'ịi-hazhia ogude ejire ekfubyishi ọkpobe-okfu nke Chileke? 11Lee lẹ ntaa bẹ Chileke bya l'ebyi ghu ẹka l'ẹhu, watalẹwho ntaa bẹ l'ịi-wata ọtso ishi. Ọ bụru nno bụ gẹ l'ịitso-zhia ya whọ jeye nwidzudzu-a agbaghata.”

E jia ekfu-a, ẹnya labọ bụru iya pyịrikiti. O bukulahaa ebuku, chọkashide onye l'e-gude iya ẹka. 12Onye ọ-chị-ọha ono whụa iwhe ono meru nu, o kwetalekwawho nke Onye-Nwe-Ọha, bụ Jisọsu. Okfu ẹhu Jisọsu ono, e zhiru iya kpụbe iya ọnu okfu shii.

Iwhe l'eme lẹ Ántiyọku Pyisídiya

13Pọlu whẹ bya abahụ l'ụgbo lẹ Páfọsu jeshia Pega, bụ mkpụkpu, dụ lẹ Pamfíliya. Whẹ rwua ẹka ono; Jọnu Makụ haa whẹ dawhushia azụ lẹ Jerúsalẹmu. 14Whẹ shi lẹ Pega tụgbua jeshia Ántiyọku Pyisídiya. O be mbọku ọtuta-ume ndu Ju, whẹ bahụ l'ụlo-ndzuko ndu Ju; je anọdu; whẹ lẹ ndu byarụ nu. 15A bya agụlewho iwhe agụgu l'ẹkwo iwu Mósisu mẹe iwhe ọwhu shi l'ẹkwo, ndu nkfuchiru Chileke deru; ndu ishi ụlo-ndzuko sụ t'e kfuru Pọlu whẹ: “Ụnwunna anyi, ọ -bụru l'o nweru okfu, unu l'e-kfu gude gbẹe ndu-a, nọ l'ẹka ume, unu kfua ya.” 16Pọlu gbalihu, bya achilia ẹka iya tẹ whẹ nọdu ndoo. Ọ sụ: “Unu gebekwawho-o! Sụa, unubẹ unwoke Ízurẹlu ibe mu mẹe unubẹ ndu lile ọwhu bụ ndu Chileke dụru lẹ nsọ, 17Chileke ndu-a, bụ Ízurẹlu họtaru ndụ-ichee anyi whẹ, mee whẹ, whẹ paa ẹka nteke ono, whẹ shi bụru mbyambya l'alị Íjiputu. Chileke gude eze ike nkiya dufuta whẹ l'alị Íjiputu. 18Ọ talẹkwawho nshi, dua whẹ ụkporo awha ugbo labọ l'echi-ẹgu. 19O gbushia uzhi mba ẹsaa l'alị Kenanu, bya ewota ndibe iya dochia ẹnya ndu shi nweru alị ono, whẹ nweru alị ono. 20A nọo iwhe ha g'ọo ụnu awha l'awha ụkporo labọ l'awha iri.

“E megee, ọ bya anụde whẹ ndu ọgbo-ikpe jeye l'ọgbo nke onye nkfuchiru iya, bụ Sámuwẹlu. 21O be nteke a nọnyaaru, whẹ ryọo Chileke t'ọ nụ whẹ eze, l'a-chị whẹ. Chileke họfutaru whẹ Sọlu, bụ nwa Kishu, bụ onye shi l'eri Bénjaminu t'ọ bụru eze whẹ. Ọ bụru iya bụ eze whẹ ono; chịa whẹ jeye ọ chịa whẹ ụkporo awha ugbo labọ. 22Chileke wofulewho onye onona, ọ hata Dévidi t'ọ bụru eze whẹ. Chileke kfua okfu ẹhu Dévidi sụ: ‘Dévidi, bụ nwa Jesi bụ onye dụ mu l'obu, onye l'e-mekotalewho iwhe lile, ẹnya dụ mụbe Chileke.’

23“Ọo onye shi l'eri Dévidi ono, bụ iya bụ Jisọsu bẹ Chileke meru Onye-Ndzọta ndu Ízurẹlu, bụkwanu iya bụ onye Chileke kweru ụkwa iya. 24Jisọsu -bya l'abya, Jọnu vuhawaru ụzo ryaarụ iya ndu Ízurẹlu owhu aryarya tẹ whẹ daa onwowhe ụta, haa oome ejo-iwhe, lwakfuta Chileke t'e mee whẹ baputizimu. 25O rwudelewho nteke Jọnu l'a-sụchi ozhi iya ono ishi, ọ sụ whẹ: ‘?Ọo onye bẹ unu doberu sụ lẹ mu bụ? Ọ tọ kwa mbẹdua bụ onye ọbu, unu l'ele ẹnya iya ọbu. Ọle onye onona l'ee-megee etso mu l'azụ, onye l'adụa iwhe mu bụ l'ẹka ọ nọ nke tẹ mu tọfu eri akpọkpa, o yeru l'ọkpa.’

26“Ụnwunna mu; unubẹ ndu shi l'ẹpa Ébirihamu mẹe ndu ọha ọdo, nọ l'ẹka-a, Chileke dụru lẹ nsọ. Ọo anyi l'unu bẹ Chileke zhiru ozhi ono t'e zhia anyi l'ọo Jisọsu l'adzọje ndzụ-o! 27Ndu bu lẹ Jerúsalẹmu mẹe ndu ishi whẹ ta amakwanu m'ọo l'ọo Jisọsu bụ Ọ-dzọ-ndzụ. O to dokwa whẹ ẹnya ilile mbụ okfu ndu nkfuchiru Chileke, l'aagụjeru whẹ mbọku ọtuta-ume lile. E megee; whẹ gbeenu mee t'iwhe ndu nkfuchiru Chileke ono kfuru vụa lẹ g'e kfuru iya nteke whẹ kperu Jisọsu nkfugbu. 28Whẹ sụ tẹ Páyileti haa t'e gbua ya lẹ ba bụ l'ọ dụ-zhia iwhe whẹ marụ, whẹ l'a-sụ l'o noo iwhe e kwoberu egbu iya. 29Whẹ megee iwhe lile, bụlekwaho iwhe okfu Chileke kfuru l'okfu ẹhu iya, whẹ pazeta iya l'eli oswebe, bya aparụ iya ye l'ilu lia. 30Ọle Chileke meru iya, o shi l'ọnwu teta nọdu ndzụ. 31E megee, o goshi ndu ono, whẹ l'iya lị shi Gálili jee Jerúsalẹmu onwiya, o goshi whẹ onwiya ujiku olemole. Ntaa bẹ ndu ono kfụwaru ekfuru ndu Ízurẹlu iwhe whẹ gude ẹnya whẹ whụkota l'okfu ẹhu iya.

32“Iwhe anyi byarụ bụ t'anyi bya akọoru unu ozhi-ọma ono bụ iya bụ l'iwhe ono, Chileke kweru ndụ-ichee anyi whẹ ụkwa iya, 33b'o meekwaru anyịbe ndu-a, shi l'ẹpa whẹ nteke ono, o meru Jisọsu, o shi l'ọnwu teta; nọdu ndzụ. Ọ bụru iwhe ono b'e deru lẹ Egvu-ọma nke ẹbo sụ:

“ ‘Ọo ghu bụ Nwa nwoke mụbe Chileke;

wata ntanụ-a bẹ mu bụakwa Nna ghu.’

34Ọ waa iwhe ọwhube Chileke kfuru lẹ nke ememe ono, ya l'e-me iya, t'o shi l'ọnwu teta nọdu ndzụ, t'ọ bọ nwụhuhe ọdo, nke a sụroo l'o rehuru erehu. O kfuru sụ:

“ ‘Mụbe Chileke l'e-meru unu iwhe-ọma ono, dụ nsọ,

bụ o-nwe-arwụhu, mu kweru Dévidi ụkwa iya.’

35O noo iwhe meru g'o gude o kfukwaawho l'ẹka ọdo sụ:

“ ‘I ti kwedu t'onye nke ghu, i yeru obu rehu erehu.’

36“Sụa, iwhe ono ta abụkwa Dévidi b'e kwoberu kfua ya, o noo lẹ Dévidi bẹ mekwaru uche Chileke l'ọgbo nkiya, o megee ya, ọ bya anwụhu, e lia ya l'ẹka, e liru nna iya ochee whẹ, ọ nọdu l'ẹka ono rehu. 37Obenu l'onye ono, Chileke meru, o shi l'ọnwu teta nọdu ndzụ te erehudu erehu.

38“Sụa, t'o doo unu ẹnya g'unu hakọta, ụnwunna mu, l'ọo Jisọsu ono bẹ Chileke shi l'ẹka iya gụhaaru unu ụzo, unu l'e-shi t'ọ gụaru unu nvụ l'iwhe-dụ-ẹji, unu l'emegbabe. 39L'iwu Mósisu ta adụkwa ike mee unu t'unu bụru ndu dụ chịriri l'iwhu Chileke. Ọle nteke unu bya bya egude obu unu g'ọ ha, wota onwunu ye Jisọsu l'ẹka bẹ Chileke l'agụkotakwa unu lẹ ndu dụ chịriri. 40Ọo ya bụ, t'unu letakwa ẹnya t'iwhe ono, ndu nkfuchiru Chileke kfuru be eme unu. Mbụ iwhe ono, whẹ kfuru sụ:

41“ ‘Unu lewaro! Unubẹ ndu ono,

l'akpọ Chileke ẹbo-ẹbo l'afụ, t'ọ tụfu unu ẹhu,

t'unu lakwaa l'iyi.

O noo l'iwhe mu l'e-me l'ọgbo nke unu-a bụ iwhe unu

l'ẹte abyaa l'ekweta l'ọo ọkpobe-okfu,

e -behuduru e kfuru iya unu!’ ”

42Pọlu yẹle Bánabasu lụfudelewho l'ụlo-ndzuko ono, ndu ono ryọo whẹ tẹ whẹ dawhukwa azụ mbọku ọtuta-ume ọdo, bya akọbaaru whẹ iwhe ono. 43Ndu ono gbakashịhulewho, ndu Ju mẹe ndu l'ẹte abụa ndu Ju, mewaru onwowhe ndu Ju tsoru Pọlu yẹle Bánabasu. Pọlu yẹle Bánabasu l'ekfushiru whẹ iya ike sụ whẹ tẹ whẹ ba ahakwa eze-iwhe-ọma, Chileke meru whẹ.

44O be lẹ mbọku ọtuta-ume ọdo, o wudu nwanshị mẹe mkpụkpu ono l'owhu awụfukota bya ụlo-ndzuko ono ọnuta okfu Chileke. 45Ndu Ju whụlewho g'igwe-ọha ono l'awụ, whẹ kolahaaru whẹ okoowhoo, bya akpobyishilahaa iwhe Pọlu l'ezhi, wata iya owhu iwhu.

46Pọlu yẹle Bánabasu kfushilahaa ya ike, mbụ whẹ ta atsụ egvu ekfu iya sụ whẹ: “Ọo unubẹ ndu Ju b'ọ gbarụ nke t'e vuru ụzo zhiada ozhi-ọma-a. Ọle eshi unu jịkaru iya, unu te ekwe l'unu dụ nke l'unu l'e-nwe ndzụ tututu-mịmimi, bẹ anyi l'a-hakwa unu cheberu mba ndu ọdo, l'ẹte abụa ndu Ju iwhu nta-a. 47O noo l'ọo iwhe ono bẹ Onye-Nwe-Ọha họtaru anyi, zhi iya anyi nteke ono, ọ sụru:

“ ‘Mu họtaru unu t'unu bụru

iwhoro, dụru ndu l'ẹte abụa ndu Ju.

T'unu gude ozhi-ọma ono,

Chileke l'e-shi dzọfuta ndiwhe

gude jedzuru mgboko-o

mgburumgburu jeye l'ẹka o beru.’ ”

48Ndu l'ẹte abụa ndu Ju nụa ya, ẹhu tsọlahaa whẹ ụtso, whẹ jalahaa ozhi-ọma nke Onye-Nwe-Ọha, bụ Jisọsu ono ajaja. Ndu Chileke dụhawaa mbụ gụa lẹ ndu l'enwee ndzụ tututu-mịmimi bya eworu onwowhe ye Kuráyisutu l'ẹka.

49Ozhi-ọma nke Onye-Nwe-Ọha dzuru ẹka lile lẹ mba ono. 50Ndu Ju kpalia ụnwanyi, l'ẹte abụa ndu Ju, bụkwanu ndu a marụ ẹwha whẹ lẹ mkpụkpu ono, bụkwaruwho ndu l'anwụ ẹka ndu Ju. Ndu Ju kpalia ụnwanyi ono mẹe unwoke bụ ishi lẹ mkpụkpu ono, yeru whẹ ọku tẹ whẹ chịfu Pọlu whẹ. Whẹ wata omekpa Pọlu yẹle Bánabasu ẹhu, chịfu whẹ l'alị whẹ ọbu. 51Ndụ-ishi-ozhi ono jịshiaru whẹ udzu ẹja, dụ whẹ l'ọkpa l'alị whẹ, whẹ tụgburu jeshia Ayikóniyomu. 52Ẹhu l'atsọ ndu nke Kuráyisutu, nọ lẹ Ántiyọku ụtso. Ume-Dụ-Nsọ jikota whẹ ẹhu.

Currently Selected:

Ozhi ndu ishi-ozhi 13: Ezaa

Highlight

Copy

Compare