Ozhi ndu ishi-ozhi 11

Pyita l'akọru ndu ọwhu nọ lẹ Jerúsalẹmu iwhe meru lẹ Sizaríya

1Ndụ-ishi-ozhi mẹe ụnwunna, nọ lẹ Judíya gẹ whẹ ha nụa lẹ ndu l'ẹte abụa ndu Ju bẹ natarụ okfu Chileke. 2Pyita lwawhulewho azụ lẹ Jerúsalẹmu, ndu Ju wata iya ọta ụta. 3Whẹ sụ iya: “?Ọo gụnu meru iwhe i jeru ibe ndu l'ẹte abụa ndu Ju gụ lẹ whẹ rigba nri?”

4Pyita bya eshizhiawho ishi lanụ kọkotaru whẹ iwhe meru nụ g'ọ hakọta nnanụ nnanụ. Ọ sụ whẹ l'iwhe kparụ iya nụ bụ lẹ:

5“Mu nọ lẹ Jọpa. Mu nọdu l'ẹka ono ekfu anụ Chileke, a nọnyaa, ọ dụ mu g'ọo mgbẹnya jịpyaberu mu ẹnya. Mu whụa ọwhulenya, whụa g'ẹkwa, ha ọsa shi l'imigwe alwazeta l'alị. Ẹkwa ono b'e gude l'ishi iya whẹ ụzo ẹno. O rwukubelewho ẹka mu nọ ntse, ọ kfụru. 6Mu bya elerweta iya ẹnya, mu whụkota iwhe bụ-zhia anụ, nweru ọkpa ẹno mẹkota iwhe bụ anụ-ẹgbudu mẹkota iwhe bụ anụ, gude ẹwho awụ mẹkota iwhe bụ ẹnu, l'ewhe l'eli. 7Mu nụa olu, sụru mu: ‘Pyita gbalihu gbua ria!’ 8Mu sụ iya: ‘Onye-Nwe-Ọha, mu te erikwa! L'iwhe iwu Mósisu sụru t'e be eri, ọdua l'ọo iwhe l'aasọ nsọ teke erwubukwaa mu l'ọnu.’ 9Olu ono, shi l'imigwe ono sụkwa mu whọ: ‘Tọ bọ dụhekwaa nteke ọdo, mu l'a-sụbaa l'iwhe Chileke sụru tẹ ba asọshi nsọ bẹ bụ iwhe l'aasọ nsọ.’ 10Iwhe ono mee ugbo ẹto, e megee, e wolikota iya woba l'imigwe. 11Nteke ono bẹ ụmadzu ẹto, shi Sizaríya, e zhiru tẹ whẹ bya ekua mu byarwuwaru l'ụlo anyi nọ. 12Ume Chileke sụ mu tẹ mu tsolekwaru whẹ whọ, tẹ mu be ejekwa ọbo obu ẹbo. Ụnwunna-a, nọ l'ẹka-a whẹ ishii tsoru mu, anyi jeshia Sizaríya ono, anyi tụko bahụ l'ụlo Koníliyọsu. 13Koníliyọsu kọoru anyi lẹ ya whụru ojozhi-imigwe kfụru l'ime ụlo iya; woo ojozhi-imigwe ono sụ iya tẹ ya zhi madzụ t'e je Jọpa je ekuaru iya nwoke, ẹwha iya bụ Sáyịmonu, onye l'eekuje Pyita. 14Sụ iya lẹ Pyita ono bẹ l'e-kfuru iya okfu, Chileke l'e-gude dzọta yẹle ndibe iya. 15O noo ya, mu bya awatalẹwho okfu okfu, Ume-Dụ-Nsọ byalẹkwawho bya eji whẹ ẹhu lẹ g'o jiru iya anyịbedua lẹ mbụ. 16Mu nyata lẹ Onye-Nwe-Ọha bẹ sụru agha: ‘Jọnu gude mini mee baputizimu, ọle unubẹdua bẹ l'ee-gude Ume-Dụ-Nsọ mee ya.’ 17Ọo ya bụ, ọ -bụru lẹ Chileke bẹ nụkwaruwho ndu l'ẹte abụa ndu Ju iwhe ono, ọ nụru anyịbedua, bụ ndu Ju nteke ono, anyi natarụ Jisọsu Kuráyisutu l'ọo ya bụ Onye-nwe-anyi, sụ ?ọo onye bẹ mu bụ nke anọ akpọshi iwhe Chileke l'eme?”

18Whẹ nụ-gele iya whọ, whẹ tabuhu Pyita ụta, wata okele Chileke sụ: “Ọo ya bụ lẹ Chileke bẹ gụhaakwaruwho ndu l'ẹte abụa ndu Ju ụzo tẹ whẹ daa onwowhe ụta, haa ome iwhe-dụ-ẹji, whẹ l'emegbabe nata ndzụ ọwhuu.”

Aawata chọchi lẹ Ántiyọku

19Ndu, a chịkashiru lẹ mkpamẹhu, a kparụ ndu chọchi g'e gburu Sutívinu gbakashịhu tsoru Finíshiya mẹe Sáyipurọsu mẹe Ántiyọku. Ọ bụleruwho ndu Ju kpụ bẹ whẹ l'ezhi ozhi-ọma ono nteke ono. 20Ọle ndu chọchi ono, ndu ọwhu shi Sáyipurọsu mẹe Sayiríni tụgburu jeshia Ántiyọku je aryakashịaru ndu l'ẹte abụa ndu Ju, bugee l'ẹka ono ozhi-ọma nke Onye-Nwe-Ọha, bụ Jisọsu. 21Chileke yeru whẹ ẹka, a ha l'igweligwe kweta l'ozhi-ọma ono, whẹ l'ezhi, bya eworu onwowhẹ ye l'ẹka Onye-Nwe-Ọha.

22E kfukashia nke ekwekwe ono nke ọwhu o rwuru ndu chọchi Jerúsalẹmu lẹ nchị. Whẹ yefu Bánabasu t'o jeshia Ántiyọku. 23O rwua je awhụa ẹgube eze-iwhe-ọma, Chileke l'emeru ndu ono. Ẹhu tsọlahaa ya ụtso. Ọ sụ whẹ tẹ whẹ gudelekwawho ire-lanụ nọpyabeshia ike l'ẹka Onye-Nwe-Ọha lẹge whẹ tụberu iya l'obu whẹ. 24O noo lẹ Bánabasu ono bụ ọkpobe madzụ. Ume-Dụ-Nsọ jiru iya ẹhu, o gudekwawho obu iya g'ọ ha kweta nke Chileke. Ọo ya bụ, Onye-Nwe-Ọha yekwabaa ndu ha l'igwe lẹ ndu chọchi.

25E megee, Bánabasu tụgburu jeshia Tásọsu ọcho Sọlu. 26Ọ whụa ya, o dulia ya byatashia Ántiyọku. Whẹ labọ ono nọo awha owhu l'ẹka ono whẹ lẹ ndu chọchi, whẹ zhikota igweligwe madzụ ozhi-ọma ono. Ọo lẹ Ántiyọku b'e vugezhia ụzo ku ndu l'etso ụzo Jisọsu ndu nke Kuráyisutu.

27Lẹ nteke ono b'o nweru ndu nkfuchiru Chileke, shi lẹ Jerúsalẹmu bya Ántiyọku. 28Onye lanụ bẹ ẹwha iya bụ Ágabọsu. Ágabọsu gbalihu gude ike Ume Chileke sụ l'oke mkpẹgu bya l'abya lẹ mgboko-o mgburumgburu. Mkpẹgu ono bekochakwaru bya nteke ọ bụ Kulọ́diyosu bụ ishi ọ-chị-ọha alị ono. 29Ndu nke Kuráyisutu ono chịa idzu sụ t'onyenọnu tụa iwhe gẹ ike beru iya t'e wolajeru ụnwunna ndu ọwhu bụ lẹ Judíya. 30Whẹ mee ya nno. E wota iwhe ọbu, a tụtaru nụ Bánabasu yẹle Sọlu, whẹ wolahuru ndu, e meru ọgurenya chọchi lẹ Judíya.

Currently Selected:

Ozhi ndu ishi-ozhi 11: Ezaa

Highlight

Copy

Compare