Ozhi ndu ishi-ozhi 10

Pyita l'awhụ ọwhulenya

1O nweru onye ishi ndu ojọgu, bu lẹ Sizaríya, ẹwha iya bụ Koníliyọsu. Ọo onye ishi ndu ojọgu, l'achị ndu ojọgu ụkporo ise lẹ Ọgbo ojọgu Ị́tali 2Koníliyọsu bụ onye l'anọje akwabẹ Chileke ugvu. Chileke dụru yẹle ndu ibe iya lẹ nsọ. Ndu Ju ọwhu l'adụa gẹ whẹ marụ iya bẹ l'ọonuje iwhe shii, l'ọonoje ekfu anụ Chileke nteke nteke. 3O be ujiku lanụ gẹ ẹnyanwu swịfuwaru l'ishi; Koníliyọsu whụa ojozhi-imigwe, shi l'ẹka Chileke ree-ree-ree l'ọwhulenya, whụa ya g'ọ batarụ bya eku iya sụ iya: “Koníliyọsu!”

4Koníliyọsu gude ọtsu-egvu lee ojozhi-imigwe ono, sụ iya: “Owe-e! ?Ndẹe g'ọ dụ Onye-ukfu-l'ọha?”

Ojozhi-imigwe ono sụ iya: “Chileke bẹ nụakwaru ekfukfu ono, l'ịinoje ekfu anụ iya, natakwawhọ iwhe-ọma ono, l'iimeje ono. Ntaa bẹ Chileke nyatawaru ghu. 5Harụ madzụ zhi tẹ whẹ je Jọpa je ekuaru ghu nwoke lanụ ọbu, ẹwha iya bụ Sáyịmonu, ẹwha iya bụfukwaawho Pyita. 6Ọ byarụ abya. Ẹka ọ nọdu anọdu bụ l'ụlo Sáyịmonu, onye l'emeje akpọ-anụ gẹ l'ọo-dụ, e gude iya eme iwhe. O buwho l'agụga eze-ẹnyimu.” 7Ojozhi-imigwe ono, shi l'ẹka Chileke, shi ekfu eyeru iya tụgbulewho, Koníliyọsu bya ekua ụmadzu labọ lẹ ndu l'oozhije ozhi, yeru whẹ onye ishi ojọgu lanụ. Onye ojọgu ono bụkwawho onye Chileke dụru lẹ nsọ. Ọ lị lẹ ndu kagee ọnokube Koníliyọsu l'onwiya ntse, ejeru iya ozhi. 8Ọ bya akọ-geeru whẹ iwhe meru nu. O zhi whẹ tẹ whẹ tụgbua jeshia Jọpa. Whẹ tụgbua jeshia.

9O belewho echile iya gẹ ndu ozhi ono l'erwukubewaa Jọpa, Pyita nyihu eli ụlo, dụ barịkiti l'echi-eswe jeshia okfu anụ Chileke. 10A nọnyaa, ẹgu gụlahaa ya. L'ọogu iya nggẹ l'ọ-dụkwanu g'e shi ya ria nri. Nri shikwaduru l'ọku. O gbee dụ iya g'ọo nwa mgbẹnya jịpyaberu iya ẹnya. 11Ọ whụa g'imigwe gheru ọnu. Ọ whụa iwhe shi l'imigwe ono alwa l'alị. Iwhe ono dụ g'ọo ẹkwa ọcha, ha shii, e gude iya l'ishi iya whẹ ẹno, ewozeta iya l'alị. 12L'ime ẹkwa ono bẹ l'ọotoo dụdua ẹgube anụ, nwe ọkpa ẹno, dụ lẹ mgboko, l'ẹte adụa ya. Tọ dụ ẹgube anụ ọwhu l'awụ l'ẹwho, l'ẹte adụa ya. Tọ dụ ẹgube iya ọwhu l'ewhe l'eli, l'ẹte adụa ya. 13Ọ nụa olu, sụru iya: “Gbalihu Pyita! Gbua ria!”

14Pyita sụ: “Tụswekwa, Onye-Nwe-Ọha, mu te erikwa, o nọo lẹ mu teke eribukwaa iwhe iwu Mósisu sụru t'e be erishi, ọdua l'ọo iwhe l'aasọ nsọ.” 15Olu ono sụkwa iya: “Tọ bọ dụhekwa nteke ọdo, l'ịi-sụbaa l'iwhe Chileke sụru t'a ba asọshi nsọ bẹ l'aasọ nsọ.” 16Iwhe ono mee nno ugbo ẹto. E megee, e wolia ya woba l'imigwe.

17Pyita rịlahaa iwhe ọwhulenya ono, ọ whụru ono bụ. Ọ tụfu iya ẹhu. Nteke ono bẹ ndu whọ Koníliyọsu zhiru lewaru ẹnya ụlo Sáyịmonu jeye whẹ whụa ya, gbee kfụwaru nụ l'ọnu-ọguzo. 18Whẹ kua oku jị sụ: “?O nweru onye byarụ abya, bu l'ẹka-a, ẹwha iya bụ Sáyịmonu Pyita?”

19Pyita nọdu arịkwadua iwhe ọwhulenya whọ bụ. Ume Chileke sụ iya: “Sáyịmonu, lekwa l'o nweru ụmadzu ẹto, nọ l'ẹka-a achọ ghu. 20Gbalihu nyizeta je etsolekwaru whẹ who, be ejekwa ọbo obu ẹbo nkele ọ kwa mbẹdua zhiru whẹ tẹ whẹ bya.” 21Pyita nyizeta je asụ whẹ: “Ọo mbẹdua bẹ unu l'achọ ọbu. ?Unu byarụ gụnu?”

22Whẹ sụ iya: “Ọo Koníliyọsu, bụ onye ishi ndu ojọgu l'achị ndu ojọgu ụkporo ugbo ise bẹ zhiru anyi t'anyi bya. Ọo onye obu-ọma, bụru onye Chileke dụru lẹ nsọ. Nwoke ono bụ onye ndu Ju l'eyeru ugvu shii. Ọo ojozhi Chileke bẹ zhiru iya t'ọ bya ekua ghu t'ị bya ụlo iya, t'ọ nụa iwhe l'iikfu.” 23Pyita bya eduta whẹ, whẹ radụ aradụ mbọku ono.

Pyita nọ l'ibe Koníliyọsu

O be echile iya, Pyita gbalihu tsoru whẹ. Ụnwunna, bu lẹ Jọpa hakwarụwho tsoru iya. 24O be echile iya, whẹ jerwua Sizaríya. Koníliyọsu bẹ dụhawaa mbụ elehawaa ẹnya whẹ, whẹ lẹ abụbu iya whẹ mẹe ndu ọnya iya whẹ, o zhiru tẹ whẹ bya, tụko nọdu ngabẹru Pyita whẹ. 25Pyita batadẹ l'ụlo, Koníliyọsu gbakfu iya je adaa, kfupyabe iwhu l'alị l'atatiwhu Pyita, ekele iya ekele. 26Pyita kpulia Koníliyọsu sụ iya: “Gbalihu agbalihu, lẹ mu bụa madzụ mmaanụ lẹge gụbedua bụ.” 27Pyita l'ekfuwaruro Koníliyọsu okfu jeye whẹ bahụ l'ime ụlo Koníliyọsu ẹka ọ whụru igwe-ọha, dọru iya nụ. 28Ọ sụ whẹ: “Unu marụa l'onwunu l'ọ dụ lẹ nsọ l'omelalị anyịbe ndu Ju nke t'onye Ju kpakfu onye l'ẹte abụa onye Ju, ọdua l'ọo to nweru iwhe yẹle onye l'ẹte abụa onye Ju l'a-nọdu emegba. Ọle Chileke bẹ goshiwaru mu sụ t'ọ bọ dụkwa onye mu l'a-sọje nsọ, tọ dụ onye mu l'a-sụje lẹ mmerwu dụ l'ẹhu. 29Ọ bụru iwhe ono bẹ meru mu te ejezhiduaro ọkpa ishi iwhe ọbu, l'eekuru mu, mu tsoleruwho ndu unu zhiru tẹ whẹ bya ekua mu. Sụa, iwhe mu l'ajị ntaa bụru: ?Ọo gụnu bẹ l'iikuru mu?”

30Koníliyọsu sụ: “Iwhe mu l'ekuru ghu bụ, l'ọo oge ntaa echile bya abụru idzu-a, bụ iya bụ l'atangụ ẹto nke eswe bẹ mu nọ l'ụlo mu ekfu anụ Chileke. O noo ya, mu bya l'eledeshia ẹnya, onye ọbu, yeru uwe, l'egbu zaa-zaa kfụwaru mu l'iwhu. 31Ọ sụ mu: ‘Koníliyọsu, Chileke bẹ nụakwaru iwhe l'iikfu anụ iya. Ọ nyatarụ iwhe-ọma, l'iimeje. 32Zhi madzụ t'e je Jọpa je ekua onye ẹwha iya bụ Sáyịmonu, ẹwha iya bụfukwaruwho Pyita. Ọ byarụ abya. Ọ nọwho l'ụlo Sáyịmonu onye l'emeje akpọ-anụ gẹ l'ọo-dụ, e gude iya eme nka, bu l'agụga eze-ẹnyimu.’ 33Tọ dụ iya bụ, mu zhilekwawho madzụ nteke onowho t'a bya ekua ghu. I mekwaa ree g'ị byarụ-a. Ntaa bẹ anyi nọkota l'iwhu Chileke, anga t'anyi nụa iwhe Onye-Nwe-Ọha l'a-sụ ghu t'i kfuru anyi.”

Ọnu, Pyita l'eyeru Koníliyọsu

34Ọo ya bụ, Pyita wata ooye ọnu. Ọ sụ: “Ntaa b'o dowaru mu ẹnya lẹ Chileke ta abọdu madzụ ẹbo. 35O to kfudu woo: lẹ madzụ shi alị ọwhu, ọdua o shi alị ọwhu. Iwhe bụ onye l'atsụ-a egvu iya, eme iwhe kfụru nhamụnha bẹ dụwa iya ree. Onye ono bẹ l'ọo-nata. 36Sụa, Chileke zhiru ndu Ízurẹlu ozhi, ọ bya eshi l'ẹka Jisọsu Kuráyisutu zhia whẹ ozhi-ọma ẹhu-ọdu-guu, mbụ Jisọsu Kuráyisutu ono, bụ Onye-nwe madzụ lile. 37Unu mawarụ-a eze iwhe ono, watarụ ememe lẹ Gálili jeye o medzuru Judíya owhu gẹ Jọnu ryageleruwho nke oome baputizimu arya. 38Unu nụwaru nke Jisọsu, bụ onye Názaretu, mbụ lẹge Chileke gude mee, Ume-Dụ-Nsọ ji iya ẹhu, mekwaawho ike ji iya ẹhu nke ọwhu ọ tụkoru ẹka lile jekota, eme iwhe dụ ree. L'ọobuje onye Sétanu keru ẹgbu, ya atọo onye ọbu, mee ya, ya enweru onwiya nkele Chileke swikwanuru iya. 39Anyịbedua bẹ gudekwa ẹnya anyi whụa iwhe Jisọsu meru l'alị ndu Ju mẹe lẹ Jerúsalẹmu. Anyi kpụta Jisọsu ono kpọpyabe l'oswebe, ọ nwụhu. 40Ọle Chileke meru iya, o shi l'ọnwu teta nọdu ndzụ g'ọ nọleruwho abalị ẹto l'ime ilu ono, o mee ya t'o goshi onwiya lẹ ya nọwaa ndzụ. 41Ọ tọ bụkwa madzụ lile bẹ whụru iya nụ. Ọ lẹkwawho anyịbedua, l'atụ ọnu iya-a, bụ ndu Chileke họtaru-a bẹ bụ ndu whụru iya nụ. Anyi l'iya tụkokwaru nọo, ria nri, ngụkwaawho iwhe angụngu gẹ Chileke megeedaru iya ono, o shi l'ọnwu teta, nọdu ndzụ. 42O zhiru anyi t'anyi zhikashia ozhi-ọma ono t'o rwugbaru madzụ lile nchị. Sụ t'anyi ryaarụ iya ndiwhe aryarya: l'ọo ya bẹ Chileke meru onye l'e-kpe ndu nọ ndzụ mẹe ndu nwụhuru anwụhu ikpe. 43Ndu nkfuchiru Chileke gẹ whẹ hakọta bẹ kfukotaru okfu ẹhu iya. Whẹ sụru l'iwhe bụ onye woru onwiya ye l'ẹka iya bẹ Chileke l'e-gude ike, dụ l'ẹwha Jisọsu ono gụaru nvụ l'iwhe-dụ-ẹjị, onye ọbu metagbaberu.”

Chileke l'anụ ndu l'ẹte abụa ndu Ju Ume-Dụ-Nsọ

44Pyita kpụkwaduru-a okfu ono l'ọnu ekfu, Ume-Dụ-Nsọ bya ejikotalewho ndu lile, l'anụ okfu ono ẹhu. 45Ọ kpụbe ndu Ju ono, l'etso ụzo Kuráyisutu, mbụ ndu ono, shi Jọpa ọnu okfu; lẹ Chileke nụkwaruwho ndu l'ẹte abụa ndu Ju Ume-Dụ-Nsọ. 46O noo l'anyi nụru gẹ ndu ono ghageeru okfu-alị whẹ kfulahaa okfu, Ume-Dụ-Nsọ l'egoshi whẹ, aja Chileke ajaja.

Pyita sụ: 47“Eshi-ọwhu ndu-a natarụ Ume-Dụ-Nsọ gẹ anyịbedua natarụ iya-a ?ọ hụnu gụnu ọdo l'akpọshi t'e be eme whẹ baputizimu?” 48Ọ sụ t'e gude ẹwha Jisọsu, bụ Kuráyisutu mekota whẹ baputizimu. E megee, whẹ ryọo ya tẹ whẹ l'iya nọo jeye tẹ nwa idzudzu ono ghata.

Currently Selected:

Ozhi ndu ishi-ozhi 10: Ezaa

Highlight

Copy

Compare