Nahum 3
3
1Gawey e ra gbɔng repomo mo
de ra ga lusha nemi pyak.
Ra kat ragas bɔs, ra sila na nezap pyɛ̂ jugu,
na pyɛ́ detidetu de ba hashe.
2Wet in betong! Wok in bezining de be taksal,
bol bekyɛkyɛ̂ bedwa de be wus,
bedwa de be kyɔ́rɔk,
bekyɛkyɛ̂ bedwa de be kyě gyilsit!
3Bemât comô bedwa ba yi na yol,
bewal be tē bwerep,
bebara be nɛp!
Nepyak bemat de ba kushu,
na bagwɔ̂t bavin.
Bemat de ba ga kushu vit a basa,
be kyě tiris bol e ra vɛ!
4Pyɛ́ yemo mwa ya sé yaga na be tabak mɛ̀ gbɔng repomô Nineve de ra sé sede devwes de wa sé zɛrɛ mo, ko wó hwɔlɔ bemat vey na wɛ na nezɛrɛ̂ nejwâng wɛ. Wá dɔnɔ yerê bemat jey na mɛlɛ̂m nu.
5Dagwi Darwey, Dâ Jey Mwa a ye:
Ma sé wo repugu mo!
Mê hywɛrɛm hwo
na me dura a yére bemat jey nekpimit mo,
na bemât segwɔm jey be di rekyen mo arɔng.
6Mê liring hwo na serwik,
mê shɛgɛsh hwo,
mê tɛ̀ hwo sè pyɛ byɛs.
7Mwa vemo de ba di o bê ye lot,
bê to ɛn na bama.
Yɛn ê ye, “Nineve wa ga tɛ́ ɛ barin.
E wa de ê tosho wɛ arɛt?
E wa de ê simo na a wɔrɔk wɛ ɛ?”
8À Nineve, hwà dal Tebes, gbɔng repomô segwɔm Misra a? Ra vɔk Gwɔrɔt Nil de gwa gyep rɛ sede jwâ-pomo. 9Etiyopya na Misra yɛn vɛ a gâp rɛ vit a yɛnɛ mo. Put na Libya ba sé e ji bavwel de ba ra gafiri na rɛ. 10Mwa ano, ba re Tebes na como, ko ba hashe bemat o vɔk e de sesam. Ba tugut nèy rɛ, ba mɔbɔs nɛ̀ e kahɛ kwɔn. Ba masa sesek e ra begbɔng bemât rɛ na be jut ɛn sede besam, ko ba rɔgɔs hɛn na ngyang. 11À Nineve, ê yang o bùrum sede mwât sefeng, ko hwô wɔ jama kwɔ̂n lɛrɛ na bemât repugu mo. 12Nekwɔn dâl bemât como mo nê sè sede batin regwi de nèy o na ga vel — sede ba dugut cɔ́gɔt o, ko nèy o nê gabsa e nu mwat dugut o!
13Bemât como mo ba sé sede beha, ko vit a pyɛ de ya dul vwel mo e nuyêl bemât repugu mo, yaga kya ha rɔda re becwang de ba tɛ̀ gàp e ri ruhup mo. 14Vos in nshi gyam na be vey gwɔrɔ repomo min o na como! Gwɛ̌ lɔk in nekwɔn dal min na gap! Yong in bagat bwos — jut in cɔgɔ̂t lɔk o, ko luk in sebwos o! 15Kya hê re in, bê wey na yin na wal e de como sede rawal.
Yin a ga gwɛsɛ nepyak min sede rawal. 16Yin a vɔk bejik pyak sede netangacɛn e lagwi. Ko a remo, rawal o wa ga wuma babok wɛ, ko wa ga tele nedem wɛ. 17Bemât nuyel min ba sé sede rewûk rawal, de re sangal e ra yép, jeng de jey ya sumal, ko jeng de gwi gwa ta, ko re sogo re kyè. Vit a mwat de e tɔk kwɔn de ra kyè vɔk ɛ. 18À hwo Da vwel Asirya, begbɔng bemat mo ba sé nevwa, ko sana belek, bemat mo ba ga shara hɛn e ra beraku, ko vit a mwat de ê to tula hɛn. 19Vit à pyɛ de yê tɛt nepêp ram mo — rê vel wɛt. Mwa bemat de bê wok rehâ wey na hwo ê yang ɛn yɔɔt, yaga hwà ga tak a yɛn mwa ding-ding.
Currently Selected:
Nahum 3: bomBI
Highlight
Copy
Compare
Share
Want to have your highlights saved across all your devices? Sign up or sign in
© 2009 Nigeria Bible Translation Trust and Wycliffe Bible Translators, Inc. in cooperation with Berom Language and Translation Board
New Testament originally published by © 1984 International Bible Society and Nigeria Bible Translation Trust
