Habakuk 1
1
1Hâ siitit de Dagwi Darwey a ha a Habakuk, zarap mɛ sede e ji negwi à hemo:
Habakuk a gwɔrɔng e ra nevît gâs badu e tē
2À Dagwi Darwey, mê ros e rɛ̌ e de yila hwō ko
hwà wok me wɛt ɛ?
Mê ros e rɛ̌ e de tosho vey na hwo yaga yol
ko hwà sey ot wɛt ɛ?
3Yaga sɛ́ de hwó tɛ̀ me bɛrɛng neves ɛ?
Yaga sɛ́ de hwó niri na reyɔm ɛ?
Wey na yol de ya gwɔrɔ me.
Tô cuna na nenan na ga sogo e kagwa.
4Badu ba vɔk gap wɛt, ko be sang ra shɔt na tsak o wɛt.
Vê neves be di wɛng e ra vê cik,
yi ano be lashe shɔt.
Dagwi Darwey a toyo a Habakuk na ha
5Dagwi Darwey a toyo a yɛ:
Bɛrɛng hin yére bemat jey
ko yin a rɔda langat hin pyɛ de yin ê di.
Ma sé kyè wɔ̀ ra pyɛ cak e jeng min,
yemo de yin ê sey tsak o na yɛ wɛt
jeng de yin a wok hâ yɛ.
6Mê gwɛ retô BeBabilɔn de bemat be wok bengyip mɛn,
yɛn e sǎ yaang wɛt.
Yɛn e kyě gwɔsɔ jey,
na be ye màk à bavwel de ba sé bemɛn wɛt.
7Yɛn e kyě tɛ̀sɛ bemat be vow,
Yɛn e ragas pyɛ́ de yey mɛn ye simo,
yɛn e dak kaa na nerey mɛn.
8Bedwa mɛn be dal cwēy na tele pep,
be dal bebwá na nɔ̂ng bengyip nawiri.
Bemât comô bedwa mɛn be yis na tele —
be yis yikyik.
Be yis na tele sede bekim —
be hwo e ra pyɛ de bê re.
9Bemât como mɛn be yi na yol.
Kawɛ mwat e ji bapomo mo e tɛ̀ bengyip sizɔng.
Yɛn e tula besam pyak sede gwɔ̂t bazɛk.
10Begbɔng begwɔ̀m ba sé a yɛn pyɛ wɛt,
ko yɛn e byɛs bemât badu mɛn.
Yɛn e byɛs kwɔ̂n dâl de hê dul ɛn nà re pomo,
yɛn e tula gwofongol e ra jwâ-pomo na be yel be re rɛ.
11Ko yɛn e yishing rɛ sede wúla,
be kwey nedem mɛn,
Yɛn a sé bemat de ba ga buru.
Yɛn a tɛ̀ ci mɛn yɛ à gap mɛn.
Habakuk a to gwɔrɔng a Dagwi
12Habakuk a to ye,
“À Dagwi Darwey, yi e susu mo hwà sé Dagwi.
Hwo wɛ à Dagwi hom, wo jɛrɛ, wot ê kushu wɛt.
À Dagwi Darwey, hwà ga tɛ̀ BeBabilɔn be ra shɔt.
À Gwofwa e hwo de hwà tɛ̀ ɛn be tabak bemat.
13Hwà sé jɛrɛ ding-ding,
bayis mo be bɛrɛng pyɛ́ vyes e ji bemat mo.
Hwó tɔk niri na reyɔm wɛt.
Hwô sǎ e de niri na bemât kwɛlɛng vemo ano wɛt.”
Hwô sǎ e de saa yuu-yuu wɛt
jeng de vê neves bê wɔlɔk vê cik.
14Hwó tɔk tik be teshe na bemat sede betɔk gworep,
be tele gushuk, vit a vɛ na mwât nuyel.
15BeBabilɔn be vos bemat sede betɔk na begúk
be hwɔlɔ hɛn sede betɔk na segun.
Yɛn e tula hɛn na sòro sede ngyāma,
yi ano, yɛn e ra pee ko be vɔk yey pyɛng!
16Yaga ano, yɛn e nára a ci mɛn de ya sé sede bagun, nɔrɔ̂ yas,
ko be rangas a yɛ̄ de ya sé sede soro nɔrɔ̂ pyɛ̂ nesang hyɔɔlɔl.
Yaga bagun o be vɛ̀sɛ a yɛn na pyɛ̂ nedanerey
tanga pyɛ̂ re pyak de ya dal na nerat.
17Yɛn ê re nuyel e de râ fwom na bagun mɛn nesheneshey,
na yɛn a sǎ e de weres na yére bemât jey sana toshô reyɔm mɛn a?
Currently Selected:
Habakuk 1: bomBI
Highlight
Copy
Compare
Share
Want to have your highlights saved across all your devices? Sign up or sign in
© 2009 Nigeria Bible Translation Trust and Wycliffe Bible Translators, Inc. in cooperation with Berom Language and Translation Board
New Testament originally published by © 1984 International Bible Society and Nigeria Bible Translation Trust
