Mika 7
7
Vit a mwat de a sé cik
1Gawey e ra me! Yaga ma ga tɛ́ me sede mwat de,
e bamâ vôs nèy cɔ́gɔt naswigi,
na e bamâ vôs nèy anap,
ko a sɛ̀ vwɔ mo de ê re wɛt,
vit a nèy regwi ne pɛrɛ mo,
kɛ nevele de a vɔk cwey o.
2Vê tsak o ba ga wɛrɛn vit e vwel o
ko vit a mwat de a pɔl de a sé cik.
Mwâ hɛn ba sé e waba na be shushu nemi,
be ra jàma bemɛn na bagun.
3Vɔ mɛn ba ga tɔ́k ɛn na râ neves,
mwât nuyel na mwât shɔt be jama pyɛ bâng nu.
Ko vê reto be ha pyɛ de be simo,
yi ano mwa hɛn be hanas neves sede lɔ̂k rugu.
4Vemo de ba dal na nerat e ji mɛn ba sé sede serɔgɔ, vit à nèy,
vê dál mwa na necik ba sé shagarak sede yép.
Jeng tabâk bemât gyeng mɛn ya ga pom,
a remo a sé a yɛn kpɛɛ.
5Tɛ̀ gap e ra mwât vwara mo wɛt,
sey tsak o na wo yey mo wɛt.
Gyeng nu mo yi e hwā de hwó kula hɛ.
6Yaga hwey he byɛs da mɛ,
hwong e sogo e ra neng mɛ,
gwel e sogo e ra dekwop mɛ,
bemât lɔ mwat o ba ga tɛ́ ɛn vê repugu mɛ.
7Ko me à, mê bɛrɛng Dagwi Darwey,
mê tɛ̀ bayis e ra Dagwi de ê sey me.
Dagwi hom ê wok me.
Toshô gabɔk na tɛ̂ gap e ra Dagwi
8À vê repugu hom,
yin kwon vɔk yey pyɛng e ra me wɛt!
Ma ga gaba, ko mê sogo,
Ma sé sangal e lwil, ko Dagwi Darwey ê sè a me negbey.
9Mê niri na shôm Dagwi Darwey,
yaga ma ga ra a yɛ banɛn.
Sɛ̌ a jut ha hom,
na a ra shɔt yaga me.
Ê nusu na me e negbey,
mê di de a ga sey me.
10Ano vê repugu hom bê di,
ko rekyen rê bang vemo de ba yang me,
“Dagwi Darwey, Dagwi mo ma wɛ ɛ?”
Bayis hom bê di gaba mɛn,
e remo bê bɔrɔs hɛn e vwel sede bwɔrɔ̂k nehyok.
Dagwi ê toyo na BeIsrayɛl
11Jeng lɔ̂k jwâ gbɔng repomô Yɛrusalɛm à yemo!
E jeng o bê gwɛ neyɛnɛ̂ vwel o pyak.
12E jeng o bemat mo behak bê vey na hwo e Yɛrusalɛm.
Yi e Asirya vɔk e Misra,
na yi e Misra vɔk e Gwɔrɔt Ɛifaratɛs.
Yi e gworep vɔk e gworep,
yi e raku vɔk e raku.
13Ko jey o yê tɛ́ ɛ gbingiring,
yi na bemât sangal e yɛ,
na yi na pyɛ́ de yɛn a ra.
14Sè lwêk bemat mo na gwele mo,
kwarâ vyel gwô nedanelɔ mo,
de gwa sangal nju gwɛ e rehwot
e tê vwêl sehwey rat.
Tik na ye re sehwey e Bashan na Gileyat,
sede e jeng raane.
15Sede e jeng de yin à nusu yi e sevwêl Misra,
mê dura a yin pyɛ̂ bes!
16Yére bemat jey yê di ko yê vo rekyen,
mwa ano de ya vɔk reto pyak,
yê tɛ̀ vɔ e nu,
betong mɛn bê ye rip.
17Yê lɛ̄lɛ fongol sede gwɔ̄m, sede pyɛ̂ gabagâ jey,
yɛn ê nusu na vow yi e bavɔng mɛn.
Yɛn ê doyo vey na Dagwi Darwey, Dagwi mot na sáp,
ko yɛn ê vɔk bengyip mo.
Tsak tɛ̂ yêy Dagwi
18Wà a sé Dagwi sede hwo, de hwó fugut banɛn,
hwó hala burû bwang bemat mo de ba dal ɛ?
Hwó vɔk shom mo gbak-gbak wɛt,
yaga hwó tɛ̀ yey na tsak tɛ̂ yey mo.
19Hwô to wok nemwishish mot,
hwô bɔrɔs neburu mot e nɛ̂n bol mo.
Hwô bomos mwa banɛn mot,
e nɛ̂n gworep.
20Hwô dura tsak o mo na Yakɔp,
na tsak tɛ̂ yey mo na Abraham.
Sede remo de hwá sira a bedabeda mot,
yi e jeng raane.
Currently Selected:
Mika 7: bomBI
Highlight
Copy
Compare
Share
Want to have your highlights saved across all your devices? Sign up or sign in
© 2009 Nigeria Bible Translation Trust and Wycliffe Bible Translators, Inc. in cooperation with Berom Language and Translation Board
New Testament originally published by © 1984 International Bible Society and Nigeria Bible Translation Trust
