Nahum 1
1
1Bwok-basâ negwi-ywey de Dagwi a dura a Nahum wo Ɛlkɔsh, ha sé hâ siitit e ra Nineve.
Shôm Dagwi Darwey e ra Nineve
2Dagwi Darwey a sé Dagwi de e ra repugu na vemo de be ngyɛ̀nɛ hɛn na yɛ.
E tala neves mɛn
ko e shushu shom mɛ e ra yɛn
Dagwi Darwey e tala vê repugu mɛ,
ko shom me ye tē puu e ra vemo de be kyɛ́ ɛn hɛ.
3Dagwi Darwey e ra shom ziri wɛt, a vɔk reto pyak,
ko e sang tik nà tabak mwat de a buru wɛt.
Gwông kweres mɛ gwa sé e ji wula na gûl rwak,
ko bale ba sé sede búm de gwa sé e nɛ̂n bol mɛ.
4E gyong gworep ko gwo pere hworok!
E tɛ̀ nerɔt mwa ne ye jɔng.
Hirî Bashan na Raku Karmɛl be hworos,
ko cúyu Lɛbanɔn ye tē zùt.
5Beraku be digis e nuyêl mɛ,
ko berahwol be tē ywey.
Sevwel sé vow e nuyel mɛ,
jey na bemât yɛ mwa be vow arɔng.
6Wa ê kyɛm a tumal a shom mɛ ɛ?
Wa ê nàra kwen jeng de a sé tē puu na shom ɛ?
Shom mɛ ye nunus sede balêm kya,
ko pyɛ̂ mwa, vɔk e beta ye bunut hɛ e nuyel mɛ.
7Dagwi Darwey a sé rwat;
A sé kwɔ̂n dâl bemat mɛ e jeng reyɔm.
E bɛrɛng vemo de be jama kwɔ̂n lɛrɛ na yɛ.
8Ê wey na vê sogô nehywɛ na tɛmɛ-nshi,
ko ê raa bol vê repugu mɛ vɔk e ji lwil.
9E nɛ̌ neves de yin e yong e ra Dagwi Darwey ɛ?
Ê wey na pyɛ̂ mwa.
Mwat e ra retek na yɛ,
ko e dal zang hining na a wey na yɛ wɛt.
10Sede rɔgɔ, na shik, sede cugul cogot,
kya hê re ɛn.
11Ko di, à Nineve,
mwat hwak a sé nusu yi e ji mo.
A yong pyɛ́ vyes e ra Dagwi Darwey.
A vos badu yapyi.
Há vɔk na Yuda
12Dagwi Darwey a ye:
“Mwa ano de BeAsirya ba vɔk gap, ko ba sé pyak za wɛt,
bê wey na yɛn, ko bê sè vit.
À bemat hom, ma ga tak a yin,
ko mê re nuyel na tak a yin wɛt.
13A remo mê kwɔrɔ swesêk vɔk berɔndɔng de ba kana tɛ̀ e rafwɔ min,
ko mê tut ngyang de ba rɔgɔs hin mɛ.”
Há vɔk na gbɔng gwɔ̀m Nineve
14Dagwi Darwey a ga nɔng redu remo e ra hwo
“Hwô vɔk yére de yê re nuyel na reza mo wɛt.
Mê wey na pyɛ̂ sekwit mwa yi e duk re fongol bedagwi mo.
Ma sé yong sak yaga hwo,
yaga hwà sé pyɛ̀ byɛm-byɛm!”
Há vɔk na Yuda
15Di, tom a sé kyè vey e ra beraku na yɛgɛt yat.
A sé e gwong na a vey ha rehâ sangâl netyang!
À yin BeYuda, ra in nzem min,
ko sila hin sira min,
yaga bemat beves bê sang to hwo e ra vwel min na como wɛt.
Ba ga wey na yɛn mwa vit!
Currently Selected:
Nahum 1: bomBI
Highlight
Copy
Compare
Share
Want to have your highlights saved across all your devices? Sign up or sign in
© 2009 Nigeria Bible Translation Trust and Wycliffe Bible Translators, Inc. in cooperation with Berom Language and Translation Board
New Testament originally published by © 1984 International Bible Society and Nigeria Bible Translation Trust
