Mika 6
6
Shɔt e ra Israyɛl
1Wet in betong na hâ Dagwi Darwey:
Sogo, dul tó mo e nuyêl beraku,
ko tik na berahwol be wok fwɔ mo.
2Wet in betong, à yin beraku, wok in kûn Dagwi Darwey,
na yin batîs jey vê raane,
yaga Dagwi Darwey a tɛ̀ kûn bemat mɛ,
ko ê ra shɔt na Israyɛl.
3“À bemat hom, ma ga ra a yin sɛ́ ɛ?
Yin a ga ruru na me a?
Toyo a me hin!
4Yaga ma vey na yin yi e Misra,
ma viri hin yi e lɔ̂ sesam,
ko ma tomo Mose, na Aharon
tanga Miryam e nuyel min.
5À bemat hom, bare hin na pyɛ de
Gbɔng Gwɔ̀m Balak wo Mowap a yong,
pyɛ de Balaam Bɛyɔr a toyo a yɛ mɛ,
na pyɛ de ya té yi e Shitim vɔk e Gilgal,
yaga na yin a tɔk tomong rat
de Dagwi Darwey a sey in mɛ.”
Pyɛ de Dagwi e simo
6“Mê vey e nuyêl Dagwi Darwey na sɛ́
na me ye guduruk e nuyêl Dagwi wo rak o ɛ?
Mê vey e nuyel mɛ na nɔrɔ̂ pyɛ̂ rangas
na byôt mus wo shey hining a?
7Dagwi Darwey ê vɔk yey pyɛng na gu beturuk,
na nerɔt něy gu kuru a?
Mê nɔng wen negel hom yaga buru hom,
yɛ̀ hwêy rebek hom yaga nɛ̂n yey hom a?”
8Wey, à mwasi, Dagwi Darwey a ga ha a hwo,
pyɛ de ya sé ryat, na pyɛ de e simo yi na hwo.
Bē gas badu e tē, na be tɛ̀ yey na tsak tɛ̂ yey,
na be kyè na dyɛ̂ng to na Dagwi mō.
Dagwi ê tabak bemât mɔt tanga vê yol
9Fwɔ̂ Dagwi Darwey gwo mok e ra gbɔng repomo,
a sé netsitsɛng nerat na be sap ɛ:
“Wet in betong, à yin yerê bemat hom
de yin a tula hin e repomo mo!
10Mê tɔk ye bam a pyɛ̂ nedanerey
yê neves e lɔ̂ mwat vwes,
na keshi masâ pyɛ́ ke bɔs, pyɛ dúsa arɛt?
11Mê tɔk hala a mwat pyɛ masâ nezap pyɛ́
na gwodap pyɛ̂ masa nedirik yɛ̂ kwɛlɛng a?
12Bedaberey min be kat yol,
bemat min mwa be ha bɔs,
na balêm kwɛlɛng mɛn.
13Yaga ano ma ga hwo mǎ hin,
na me tɛ̀ yin wey yaga banɛn min.
14Yin ê re, ko vit à sirik,
vyong yê sǎ e de royo hin.
Yin ê hashe pyɛ́, ko yin ê tɔk gyep yɛ wɛt,
ko pyɛ de yin a gyep, mê wey na yɛ na como.
15Yin ê tus, sana yɛt bwal o,
yin ê farang pwat, sana mɔmɔ hin na něy o,
yin ê piri nèy anap, sana sɔ nshi mo.
16Yaga yin a gyeng badu Gbɔng Gwɔ̀m Ɔmri,
na mwa tom lɔ Gbɔng Gwɔ̀m Ahap,
yin a raa vôs badu mɛn.
Yaga ano mê tɛ̀ be wey na yin,
bemat min bê sè pyɛ byɛs,
ano yin ê wok na dusâ bemat mwa.”
Currently Selected:
Mika 6: bomBI
Highlight
Copy
Compare
Share
Want to have your highlights saved across all your devices? Sign up or sign in
© 2009 Nigeria Bible Translation Trust and Wycliffe Bible Translators, Inc. in cooperation with Berom Language and Translation Board
New Testament originally published by © 1984 International Bible Society and Nigeria Bible Translation Trust
