Yona 3
3
Yona a wɔ́ e Nineve
1Dagwi Darwey a to ha na Yona hê neba a ye, 2“Sogo na hwo kyè vɔk e Nineve, gbɔng repomo rane, na hwo ra a yɛn nu sede remo de mê ha a hwo.” 3Ko Yona a sogo, a kyè vɔk e Nineve sede remo de Dagwi Darwey a ha a yɛ. Nineve wa sé gbɔng repomo tyɔng wɛt. A rɔda jut mwat pɔlɔ tat na a yɛnɛ repomo mo.
4Yona a hwo kyè e ji repomo mo. Sede a kyè kwɛngɛl pɔlɔ hining, ko a mok, a ye, “Bwang nepɔlɔ kuru banaas (40) de bê wey na Nineve.”
5Ko bemât Nineve ba sey tsak o na Dagwi. Yɛn a vo redu wɔgɔ, kawɛ mwat a tik rê pyɛ́. Ko bemat o mwa hɛn, gbɔng o na hwey ba tɛ̀ pyɛ̂ sesin.
6Jeng de ha mo ha wul na gbɔng gwɔ̀m Nineve, yɛ arɔng a sogo yi e gwofwa negwɔm mɛ, a pat gworugu mɛ, a tɛ̀ pyɛ̂ sesin, ko a wɔ̀ sangal e fongol. 7Ko a tomo a BeNineve na nu wɔgɔ, “Gbɔng gwɔ̀m na bemât badu mɛ ba nɔng redu remo — Hwak a kwon re pyɛ cak, kɛ a sé mwasi, kɛ yas, kɛ rɔndɔng, kɛ vyel, be re kɛ be sɔ pyɛ cak wɛt. 8Ko tik na bemasi na yas o mwa be tɛ̀ pyɛ̂ sesin. Kawɛ a ra won na Dagwi na gap, kawɛ a tik ragas pyɛ́ vyes tanga yol de e ragas. 9Gyeng Dagwi ê tik nà ra pyɛ de ya sé e yey mɛ, a wok nemwishish mot na wot a wey wɛt.”
10Jeng de Dagwi a di pyɛ́ de yɛn a ra, na gwong de yɛn a doyo yi e begwong beves mɛn, ko a wok nemwishish mɛn, a tik pyɛ de ya kana sé e yey mɛ, ko a ra yɛ wɛt.
Currently Selected:
Yona 3: bomBI
Highlight
Copy
Compare
Share
Want to have your highlights saved across all your devices? Sign up or sign in
© 2009 Nigeria Bible Translation Trust and Wycliffe Bible Translators, Inc. in cooperation with Berom Language and Translation Board
New Testament originally published by © 1984 International Bible Society and Nigeria Bible Translation Trust
