Yona 1
1
Yona a tele yi na Dagwi
1Dagwi Darwey a ha na Yona Amitai a ye, 2“Sogo na hwo kyè vɔk e Nineve, gbɔng repomo rane, na hwo ra a yɛn nu, yaga neves mɛn na ga kat de mê niri na nɛ.” 3Yona a sogo ko a tele yi na Dagwi Darwey vɔk e Tarshish e negya. A kwey e Yɔpa, ko a sɛ̀ dwa-nshi de wa sé kyè wɔ sogo vɔk e Tarshish, ko a tala dyām o, a yel na bemât dwa mo vɔk e hwomo, na a tele yi na Dagwi Darwey.
4Ko Dagwi Darwey a hala gwogùl gwo hwo e ra gworep o, gûl rwak o gwa pɛsɛl na gap tyɔng wɛt, ko dwa-nshi mo wa hwo tē sede wô kwɔrɔs hɛ. 5Mwa bemât gangâs dwa mo ba vo bengyip sizɔng, ko kawɛ e ji mɛn a hwo ra won vɔk na dagwi mɛ. Yɛn a sǎ e de bomos pyɛ́ de ya sé e ji dwa mo e ji nshi na be tɛt mɛ nedirîk gangâs wɛ. Ko e jeng o Yona a ga wɛrɛ e hwomo e nɛ̂n dwa mo, e dyɛngɛ, e de nevwa de na vo ɛ sizɔng. 6E hwomo, mwât nuyêl dwa mo a wɔ̀ sɛ ɛ, ko a yang ɛ, “Sɛ́ ya tɛ̀ hwà sê nevwa ɛ? Sogo, ra won na dagwi mo, gyeng ê wok nemwishish mot, na a sey ot.”
7Ano kwong bemât gangâs dwa mo ba man ko ba yang bemɛn, “Tik na wot masa na sesek na wot di mwat de a vey na gwazɛrɛk gwomo.” Yɛn a masa na sesek ko masa mo ha gaba e ra Yona. 8Ko yɛn a yang ɛ, “Ha a wot, e renɛ̂n wa de ra vey á wot na gwazɛrɛk gwomo ɛ? Fwom mo à sɛ́ ɛ? Hwà yi e gwa ɛ? Hwà sé wo yɛ̌ yere ɛ?”
9Ko Yona a toyo a yɛn, a ye, “Ma sé WoIbrani, me re a Dagwi Darwey fongol, yɛ Dagwi wo lagwi de a yong gworep na vwel.”
10Ko a misang a yɛn, a sé tele yi na Dagwi Darwey. Ko bemât gangâs dwa mo ba vo bengyip sizɔng, yɛn a yang ɛ, “Yaga sɛ́ de hwà ra ano ɛ?” 11Gûl rwak o gwa sǎ e de gwɛsɛ hɛ zɔng. Ko yɛn a rangal hɛ, ba ye, “Wot ra a hwo sɛ́ na gworep o gwo ye yuu ɛ?”
12Yona a toyo a yɛn, a ye, “Jut me hin, na yin bomo me e ji gworep o, yi ano, gwô ye yuu. Yaga ma tɔk a sé nɛn hom de gbɔng gûl rwak gwomo gwa hwo e ra yin.” 13Mwa ano, bemât gangâs dwa mo ba ye ngyɛ́k na be gangas wɛ vɔk e rekwogom, ko yɛn a kyɛm wɛt yaga gûl rwak o gwa gwɛsɛ hɛ zɔng. 14Ano yɛn a tosho a Dagwi Darwey, yɛn a ye, “À Dagwi Darwey, wot e ra won na hwo, hwo tik ot na wot wey yaga neken mwat womo, hwo ra a wot shɔt mɔrɔ̂ mwat wɛt, yaga e hwo, a Dagwi Darwey, de hwà ra pyɛ de ya jam a hwo e masâ sesek o.” 15Ano yɛn a jut Yona, ba bomo hɛ e ji gworep, ko gworep o gwa pere ye yuu. 16Ko bemât gangâs dwa mo ba gwɛ̌ sap Dagwi Darwey, yɛn a nára a yɛ nɔrɔ̂ pyɛ̂ rangas, ko yɛn a sisa hɛn na be ra a yɛ fwom.
17Ko Dagwi Darwey a tɛ̀ gwogbɔng gwotɔk gwohwak gwo wɔlɔk Yona mo. Ko Yona a sè e ji jîm gwɛ pɔlɔ tat, gwi na turuk.
Currently Selected:
Yona 1: bomBI
Highlight
Copy
Compare
Share
Want to have your highlights saved across all your devices? Sign up or sign in
© 2009 Nigeria Bible Translation Trust and Wycliffe Bible Translators, Inc. in cooperation with Berom Language and Translation Board
New Testament originally published by © 1984 International Bible Society and Nigeria Bible Translation Trust
