Obadya 1
1
1Pyɛ de Obadya a di e negwi-ywey.
Pyɛ de Darwey Dagwi Darwey a ha e ra vwêl Ɛdɔm à yemo.
Dagwi a rɔda tabak Ɛdɔm
(Yirm 49:9-10, 14-16)
Dagwi Darwey a ga tomo tom mɛ vɔk na yére bemat jey, ko wot a ga wok ha mo:
“Sogo hin! Tik na wot a kyè wɔ̀ hwo e ra Ɛdɔm na como!”
2Dagwi Darwey a ha na vwêl Ɛdɔm o, a ye,
“Mê tɛ̀ hwo sè kesɛl e ji yére bemat jey mwa,
bê byɛs o tyɔng wɛt.
3Dâk kaa mo ha ga kwɛlɛng hwo.
Lɔ mo ha sé e rak o e sǎs beraku, yaga ano hwà yâng tó mo,
‘E wa de ê kyɛm a hwɔtɔ me vey e vwel ɛ?’
4Mwa ano de hwà lɔk lɔ mo
e rak o ding-ding sede rɛngɛ̂ kim,
de ha sé a hwo sede ha wɔ̀ wul netangacɛn e lagwi,
yi e hwomo mê hwɔtɔ hwo vey e vwel.
5Ka sede begbik be vey e lɔ mo naturuk,
yɛn e hashe pyɛ́ de yɛn e simo zɔng.
Jeng de bemat be wɔ̀ vos nèy anap,
yɛn e tɛrɛs ɛ nemɔ mo wɛt a?
Ko di, bemât repugu mo ba ga yishing hwo haalal!
6À yin yerê Esau, ba ga pɛgɛt hin ngyɛ̄k-ngyɛk
ba hashe pyɛ̂ nedanerey mwa.
7Bemât gafiri min ba ga kwɛlɛng hin,
ba ga ro in e yɛnɛ̂ vwel min.
Bemat de bá kana sè sangal tyang na yin
ba ga di wɛng e ra yin.
Besa mo de yin á kana re pyɛ́ e shǐ hining na yɛn,
ba ga tɛ̀ a yin segun;
ko yin ê tɔk pyɛ de yɛn a ra wɛt.
8Dagwi Darwey a ye:
E jeng o mê wey na bemât netsitsɛng mwa yi e Ɛdɔm,
ko mê fugut vê tɔk mɛn mwa yi e Raku Esau.
9À Teman, besuga mo bê vo bengyip,
ko bê wey na kawɛ mwat de a sé e Raku Esau.
Retîn tabâk Ɛdɔm
10Yaga mɔbɔs na neves de ba ra a gwa mo Yakɔp,
hwô vo rekyen sizɔng,
bê wey na yin neshey gbak-gbak.
11Yin a tumal e hagat,
e jeng de yére dyuk ya sé kwɔrɔs ri ruhûp Yɛrusalɛm,
ya hashe pyɛ̂ nedanerêy rɛ,
ko ya gas yɛ e ji mɛn na masâ sesek.
Yin á sè tyɛng na yére yane mo arɔng.
12Yin a yâng shɛgɛsh begwa min
e jeng negbang mɛn wɛt.
Yin a yâng feng e ra BeYuda
e jeng de ba wey na yɛn wɛt.
Yin a yâng dak kaa
e jeng reyɔm mɛn wɛt.
13Yin a yâng yel e ri gbɔng repomô bemat hom
e jeng rezot mɛn wɛt.
Yin arɔng yin a yâng shɛgɛsh râ neves mɛn
e jeng rezot mɛn wɛt.
Yin a yâng hashe pyɛ̂ nedanerey mɛn
e jeng rezot mɛn wɛt.
14Yin a yâng tumal e gasâng gwong na yin a vos vemo de be tele,
yin a yâng to nása hɛn e vɔ bemât repugu mɛn,
e jeng reyɔm mɛn wɛt.
Dagwi a rɔda ra shɔt
15Jeng ya ga vey bagat de Dagwi Darwey ê ra a yére bemat jey mwa shɔt.
À Ɛdɔm, pyɛ de hwà ra, bê tala hwo pyɔ̌n yɛ.
Tomong mo bê raa hwo.
16Sede remo de bemat hom ba ga sɔ nshî tabak mɛn e rahwol hom wo jɛrɛ,
ano de mwa yére bemat jey de ba gwɔrɔ hɛn bê sɔ nshî tabak hɛn arɔng.
Yɛn ê sɔ, be ye fip à nɛ,
ko bê vɔk be kyè, be wɔ̀ vusa hɛn vit.
Wɛ̂ng BeIsrayɛl e yɛnɛ mo
17Ko behak bê wɔ̀ dal e Raku Siyɔn,
kwɔn o hê sè hê jɛrɛ.
BeYakɔp bê to sey ɛ vwêl
vemo de bà kana sey ɛ vwel mɛn.
18BeYakɔp bê sè sede kya,
ko BeYɔsɛf bê sè sede lêm kya,
BeEsau bê sè sede cugul.
Bê tɛ̀ kya e ra yɛn, ko hê wey na yɛn vit.
Vit a WoEsau hwak de ê dal.”
Yaga Dagwi Darwey a ha ano.
19“BeYuda rwa batin bê sey ɛ berakû Ɛdɔm be sangal ɛ.
Vemo de ba sé e fwɔ̂ berahwôl rwa rak bê sey ɛ vwêl BeFilisti be sangal ɛ.
BeIsrayɛl bê sey ɛ yɛnɛ̂ bavwêl Ɛfrayim na Samariya be sangal ɛ.
BeBɛnyamin bê sey ɛ Gileyat be sangal ɛ.
20BeIsrayɛl rwa bato bê toyo,
bê sey ɛ vwêl Finikya vɔk e Zarɛfat.
Bemât Yɛrusalɛm de ba sé e de sesam e Sardis,
bê sey ɛ bapomô Yuda rwa batin.
21Besuga bê wɔ̀ tut e ra Raku Siyɔn
ko bê re negwɔm e ra Raku Esau.
Ko Dagwi Darwey pyɛ mɛ ê sè Gbɔng Gwɔ̀m.”
Currently Selected:
Obadya 1: bomBI
Highlight
Copy
Compare
Share
Want to have your highlights saved across all your devices? Sign up or sign in
© 2009 Nigeria Bible Translation Trust and Wycliffe Bible Translators, Inc. in cooperation with Berom Language and Translation Board
New Testament originally published by © 1984 International Bible Society and Nigeria Bible Translation Trust
