Yɔwɛl 3
3
Dagwi a rɔda ra a yére bemat jey shɔt
1Dagwi Darwey a ye,
“E jeng o mê to toyo a Yuda na Yɛrusalɛm na nerey mɛn.
2Mê tula mwa yére bemat jey
na me vey na yɛn e Nɛk Shɔt.#3:2 Nɛk Shɔt: E lem BeIbrani ba jɛk Nɛk Yɛhɔshafat.
Mê ra a yɛn shɔt e hwomo,
yaga pyɛ̂ mwa de yɛn a ga ra a bemat hom de ma kasa.
Yɛn a ga shara BeIsrayɛl e ji yére bemat jey,
ko yɛn a ga gas vwel hom.
3Yɛn a masa na sesek na be gas mɛ bemat hom.
Yɛn a rɛsɛl nèy bewen e sesam na be tala mɛ bedebeves,
ko nèy behwong e sesam na be tala mɛ siring.
4“À Tur, na Sidɔn tanga mwa vwêl BeFilisti, e sɛ́ de yin e simo yin a ra a me arɛt? Yin e simo yin tala me yaga pyɛ cak a? E me de mê tala hin dey-dey! 5Yin a ga hashe dyam pyɛng na dyam shinang hom na mwa pyɛ́ ryat hom yin wɔ̀ tikis e beduk rê fongol min. 6Yin a ga hashe BeYuda na bemât Yɛrusalɛm yin a kyè mɛ yikyik yi e vwel mɛn ko yin a wɔ̀ rɛsɛl a BeGirik. 7A remo, ma sé kyè wɔ̀ toyo na yɛn yi e nekwɔn de yin a kana rɛsɛl hɛn ɛ. Mê ra a yin pyɛ de yin a ga ra a yɛn arɔng. 8Mê nɔ̂ng BeYuda nèy min bewen na behwong, ko yɛn ê rɛsɛl hɛn vɔk na BeSeba de ba sé yikyik. Me Dagwi Darwey ma ha ano.”
9“Ha in a yére bemat jey reha remo:
Yong in yaga tô comô Dagwi,
Yila hin besuga min.
Tula hin bemat mwa yaga como!
10Turu hin bewal na ron min!
Turu hin bebara na bebǎ bwal min!
Tik na vê mɛrɛk min
be tɛ̀ gap wɔ̂ como!
11Ra in dey-dey, na yin a vey!
À yin yére bemat jey mwa tula hin e Nɛk o.
À Dagwi Darwey, tomo na besuga mō!
12Tik na yére bemat jey be yong ɛn,
na yɛn a vey e Nɛk Shɔt.
E hwomo, me Dagwi Darwey mê sangal
na me ra a mwa yére bemat jey shɔt.
13À besugâ Dagwi yɛ́t in hɛn sede be yɛt bwal nahywɛp,
Bɔrɔs hin hɛn sede be farang nèy anap.
Bètus o bê sila na nshi mo.
Yaga neves mɛn na kat.
14Bemat gu mo, gu mo
ba sé e Nɛk Shɔt.
Yaga jeng Dagwi Darwey
ya ga vey bagat e Nɛk Shɔt o.
15Gwi na pwɛl bê tɛ́ ɛn mwangalang,
ko netangacɛn nê to nɔng negbey wɛt.”
Dagwi a rɔda tɛ̀ nerat e ra bemat mɛ
16Dagwi Darwey e lulum sede gukum yi e Raku Siyɔn,
fwɔ mɛ gwô takla yi e Yɛrusalɛm.
Jey na lagwi bê vow,
ko Dagwi Darwey ê sè kwɔ̂n lɛrɛ̂ bemat mɛ, kwɔ̂n dâl BeIsrayɛl.
17“À yin BeIsrayɛl a sé ano de yin ê tɔk,
me wɛ à Dagwi Darwey, Dagwi min,
ko ma sé sangal e Siyɔn, raku hom wo jɛrɛ.
Yɛrusalɛm wô to sè jɛrɛ,
vit à bemât como beduk e ji mó.
18E jeng o, batin anap bê nɔngɔs nshi e beraku mwa,
ko berɔndɔng bê nɔngɔs nevasal e kawɛ rahwol,
mwa nerɔt Yuda nê vɔk nshi.
Jɔt nshi yê tele yi e Gbɔng Duk Re Fongol wo Dagwi Darwey,
ko yê wɔ̀ tɛ̀ nshi e Nɛk Batin-á-rɔ́gɔ.
19Vwêl Misra hê tɛ́ ɛ gbingiring,
ko hê Ɛdɔm hê tɛ́ ɛ barin,
yaga bemat mɛn bá kana tak a BeYuda e como,
ko ba mɔbɔs bemat de ba ra a yɛn pyɛ wɛt.
20Ko Yuda wô sila na vê sangal ɛ neshey gbak-gbak,
ko Yɛrusalɛm wô vɔk bezamang sana yɛnɛ.
21Mê tala pyɔ̌n vemo de ba ga mɔbɔs,
mê hala a vemo de ba gang ɛn na shɔt wɛt.
Yaga me Dagwi Darwey ma sé sangal e Raku Siyɔn!”
Currently Selected:
Yɔwɛl 3: bomBI
Highlight
Copy
Compare
Share
Want to have your highlights saved across all your devices? Sign up or sign in
© 2009 Nigeria Bible Translation Trust and Wycliffe Bible Translators, Inc. in cooperation with Berom Language and Translation Board
New Testament originally published by © 1984 International Bible Society and Nigeria Bible Translation Trust
