Yɔwɛl 2
2
Rawal wa sé pyɛ durâ jeng Dagwi Darwey
1Pɛsɛl hin bedurum e Siyɔn!
Dak in sekun e ra raku Dagwi wo jɛrɛ!
À yin bemât vwel o mwa: Vów in na bengyip!
Yaga jeng Dagwi Darwey ye kyè vey, ya ga vey lɛs.
2Jeng o yê sè mwangalang, ko yê sè dìlim,
Jeng o yê vɔk bale pyak, ko yê siri tyɔng wɛt,
Gbɔng regyɛng bemât como rê gap ra sé kyè vey pom,
sede lwil de gwa bang beraku kyibit
yerê remo de ba ga kana di pyɛ cak ano wɛt,
ko bê sang di yerê yɛ e ngamo nuyel wɛt.
3Bê re pyɛ̂ mwa e nuyel sede kya.
Ko e bamâ vɛ, balêm kya bê lolo.
E nuyêl vɛ, vwel o hê sè gyat sede Bwi Ɛdɛn,
ko e bamâ vɛ, mwa vwel o hê sè gbingiring.
Pyɛ cak yê hywit a vɛ wɛt.
4Ba sé sede bedwa e bɛ́rɛng,
be tele sede bedwâ como.
5Jeng de be kyě gyilsit e ra rak beraku,
na rewɔng sede bekyɛkyɛ̂ bedwa,
sede rewɔ̂ng kya de ha sé re sɔng hwogot.
Be ngyɛrɛ hɛn sede gbɔng regyɛng bemat
de re yong ɛ́ yaga tô como.
6Kawɛ mwat e tɛ̀ bengyip ras de
ba vey bagat,
bayîs kawɛ mwat bê bɛɛ lùu.
7Bé hwo e ra pyɛ sede bemât como;
be turus e vara duk sede bemât jugu.
Be kyè cik vɔk e nuyel,
sana sege bak de bê kwey ɛ.
8Kawɛ e ye lap e bak o wo mumwɛ wɛt,
kawɛ e kyè cik vɔk e kwɔn de a tá ɛ nu.
Be tɛ̀ tô vɛ e ji bemât repugu mɛn,
ko pyɛ cak ye tɔk dul vɛ wɛt.
9Be gyilsit tsów wɔ̀ yel e ji repomo,
be tele e ra jwa-pomo mo,
be turus na be yel e nelɔ,
ko be yeles e bapɔk nelɔ mo sede begbik.
10Jey ye digis jeng de be yi vey pom,
lagwi wo vow arɔng.
Gwi na pwɛl be tɛ́ ɛn mwangalang
ko netangacɛn ne to lolo wɛt.
11Dagwi Darwey e nɔ̂ng bemât como mɛ nu na gap,
ko bemât como mɛ mo ba sé pyak,
vemo de be gyeng nu mɛ ba vɔk gap.
Jeng Dagwi Darwey ya sé gbɔng jeng, ya sé pyɛ bengyip sizɔng!
E wa de ê tɔk nàra kwen ɛ?
Yila toshô gabɔk
12Dagwi Darwey a ye,
“Ka a remo mwa, doyo hin yi e banɛn min,
Toyo hin vey na me na neyey min mwa!
Tik in rê pyɛ́, tosho hin, ra in sesin.
13Tik na yin a dura, yin e lashe yey mwin.
Hàma hin neyey min, ko berugu min wɛt!”
To in vey na Dagwi Darwey, Dagwi min!
A sé wo nerat, wo toshô reyɔm.
E ra shom ziri wɛt, e dura a bemat nerat mɛ ding-ding,
E simo na a ra a yin pyɛ vyes wɛt.
14Gyeng rɔ̌ Dagwi Darwey, Dagwi min
ê sege barê yey mɛ,
na a tɛ̀ a yin nerat.
Yi ano, yin ê tɔk nára a yɛ
nɔrɔ̂ pyɛ̂ yeneng na nshî anap.
15Pɛsɛl hin bedurum e ra Raku Siyɔn!
Nɔng in nu na bemat be tik rê pyɛ́!
Yila hin bemat e tulâ jɛrɛ!
16Tula hin bemat mwa e dem hining,
tɛ̀ in hɛn haalal yaga gbɔng tulâ Dagwi!
Tula hin bemakuk.
Vey in na nèy, tanga nèy nesɛl de ne rɔɔ ngas.
Tik na rwâs-gwel a vey yi e duk mɛ,
ko gwel o a vey yi e jɔ̀rɔm mɛ arɔng.
17Tik na bepiris de be ra a Dagwi Darwey fwom
be tula hɛn e tê gàgbang nása nenɔrɔ̂ yas na rwi Gbɔng Duk Re Fongol,
be tosho na be ra won arɔng.
Tik na yɛn a ye, “À Dagwi Darwey, tik nà tabak bemat mo.
Tik nà tɛ̀ bemât nedanelɔ mo be sè pyɛ byɛs.
Hwo kwon tik yére bemat jey be tabas a wot nengyas,
be tē, ‘Dagwi min a wɛ?’ arɛt?”
Dagwi a toyo na nerât vwel mɛ
18E bama mo, Dagwi Darwey a rɔda pugu vwel mɛ,
na a tosho reyɔ̂m bemat mɛ.
19Dagwi Darwey ê toyo a yɛn, a ye,
“Di, a remo ma sé kyè wɔ̀ nɔng in
pyɛ̂ yeneng, na nshî anap tanga něy pwat de yê vey a yin.
Yére bemat jey behak yê to tɔk byɛs in wɛt.
20Mê ro rawâl como wo rwa bato yikyik,
ko mê ro ɛn vɔk e hêy gbingiring.
Vemo de ba vey e yel,
mê ro ɛn vɔk e Gworep Nevwashe,
ko vê bama,
vɔk e Gworep Tē.
Nesang neves nê tugus yi e bavin mɛn.
Ey mwin, Dagwi Darwey a ga ra tomông bes.
21À vwel, hwo kwon wok bengyip wɛt,
vɔk yey pyɛng na hwo shɛgɛsh.
Ey mwin, Dagwi Darwey a ga ra tomông bes.
22À ngyāma yin vɔk bengyip wɛt,
nekwɔn gyengês yas na ga to man sɔng rwat naka.
Batîn cɔ́gɔt ba ga to hwo tɔs nèy,
ko ba vɔk nèy regwi na ne anap pyak arɔng.
23À bemât Siyɔn, vɔk in yey pyɛng.
Tik na yey min ye pɛngɛ
e ra pyɛ de Dagwi Darwey, Dagwi min a ga ra a yin.
A ga nɔng in rwak pyak naswigi,
wa rop a yin naka nabolos,
ko wa jam a yin nahywɛp, tyɛng sede raane.
24Begàzu min bê sila na pyɛ̂ yeneng,
ko bavɔng de be piri ɛ nshî anap na něy pwat,
bê sila ko nê kyě tele e jey.
25Mê toyo a yin na pyɛ́ de yin a bidɛ
e ji neshey de bètàrmaje, na rawal,
na yɔ́rɔ begwòng tanga yɔ́rɔ wey na pyɛ́
bá re a yin pyɛ̂ hiri min.
E me de ma kana tomo a yin rawâl como mo.
26Ko di, a remo,
yin ê vɔk pyɛ́ shɛrɛk na yin re, yin siris.
Yin ê somo Dagwi Darwey, Dagwi min,
de a ga ra a yin pyɛ̂ langat yemo.
Bê sang to tɛ̀ bemat hom be vo rekyen wɛt.
27Ano kwong, à BeIsrayɛl, yin ê tɔk ma sé e tē min.
E me, Dagwi Darwey, de ma sé Dagwi min,
ko vit a dagwi hwak sede me.
Bê sang to tɛ̀ bemat hom be vo rekyen wɛt.”
Jeng Dagwi Darwey
28“E bama mo, mê shushu Gabik hom e ra bemat mwa.
Nèy min bewen na behwong bê zarap yi na me.
Bemakuk min arɔng bê ranas negwi.
Bewen min bê di negwi-ywey arɔng.
29E jeng o, mê shushu Gabik hom,
e ra besam arɔng, beras na beha.
30Mê dura pyɛ̂ bes
e lagwi na jey.
Yin ê di nemi na kya,
tanga sekyeng de sé mugus.
31Gwi gwô tɛ́ ɛ mwangalang,
ko pwɛl gwô senge sede nemi,
gyam na jeng Dagwi Darwey ye vey,
gbɔng jeng, pyɛ bengyip sizɔng.
32Ko kawɛ mwat de ê yila Dagwi Darwey na a sɛlɛ hɛ,
Dagwi Darwey o ê sey neken mɛ,
sede remo de Dagwi Darwey a ye,
‘Behak e ra Raku Siyɔn na e Yɛrusalɛm bê dal,
ko mwa vemo de ma kasa bê nàra beken.’ ”
Currently Selected:
Yɔwɛl 2: bomBI
Highlight
Copy
Compare
Share
Want to have your highlights saved across all your devices? Sign up or sign in
© 2009 Nigeria Bible Translation Trust and Wycliffe Bible Translators, Inc. in cooperation with Berom Language and Translation Board
New Testament originally published by © 1984 International Bible Society and Nigeria Bible Translation Trust
