Yɔwɛl 1
1
1Há de Dagwi Darwey a ha a Yɔwɛl Pɛtuwɛl.
Pyɛ́ de rawal wa re
2À yin bemakuk, tē in naka,
tik na kawɛ mwat e ji Yuda a wet betong.
Pyɛ cak yerê yemo ya ga kana té
e jeng min kɛ e ye beda min a?
3Ha in a nèy min reha mo,
na yɛn a vey ha a nèy mɛn,
ko nɛ arɔng na rɔda ba ha a zamang de he kyè vey.
4Pyɛ de bètàrmaje ba tɛt ɛ,
rawal wa re,
pyɛ de rawal wa tɛt ɛ,
yɔ́rɔ begwòng ya re,
pyɛ de yɔ́rɔ begwòng ya tɛt ɛ,
yɔ́rɔ wey na pyɛ́ ya re!
5À yin de yin a ga feng siring, sene hin yin tosho!
À yin de yin a ga sɔ nshî anap, dak in sekun!
Yaga siring min wa ga tala hɛ.
6Bemât comô vwel hak ba ga hwo e ra vwel hom,
ba vɔk gap tyɔng wɛt, ko ba dal gâp bara,
yìn mɛn be re sede ve gukum,
na jōro sede yê hwâ gukum.
7Yɛn a ga wey na batin cɔ́gɔt anap hom,
ko ba ga tangal batîn regwi hom,
ba ga peshe bebǒk o e vwel,
ba tɛ̀ nelang o ne pɛngɛ.
8À bemat hom, tosho hin sede yorom-hwong e ji berugu sesin,
de e tosho rekû mwat de e hwono hɛ.
9Vit a pyɛ̂ yeneng kɛ nshî anap
de bê nára nɔrɔ̂ yɛ e Gbɔng Duk Re Fongol.
Bepiris, yɛn bemât fwom mɛ, be ra sesin.
10Vit a pyɛ́ e hiri,
sevwel sé ra sesin,
yaga ba ga wey na pyɛ̂ yeneng vit,
nèy anap na ga hworok vit a nshi,
ko batîn pat ba ga tē nɔɔshɔsh, vit à něy.
11À yin bemât cap, lashe hin yey,
à yin de yin e yong hirî anap dak in sekun,
yaga alkama na baale,
ey, ba ga wey na mwa pyɛ́ de ba how.
12Batîn cɔ́gɔt anap, na vê regwi
ba ga tē nɔɔshɔsh;
batîn cɔ́gɔt pomigiranet, na tyet tanga apɛl,
ey, mwa batin cɔ́gɔt ba ga hworos.
Yey pyɛng de bemat o bá kana vɔk
ya ga toyo hɛ e jim.
13À yin bepiris hom,
yin vemo de yin e ra fwom e gàgbang nása nenɔrɔ̂ yas!
Tɛ̀ in berugû sesin min, na yin tosho.
Wɔ̀ yel in e Gbɔng Duk Re Fongol na yin a pɔl e de sesin!
Vit a pyɛ̂ yeneng kɛ nshî anap
de bê nára nɔrɔ̂ yɛ e Gbɔng Duk Re Fongol wo Dagwi min.
14Nɔng in nu na bemat be tik rê pyɛ́,
yila hin bemat mwa e tulâ jɛrɛ!
Tula hin bemakuk,
na bemât vwel o mwa.
Tula hin e Gbɔng Duk Re Fongol wo Dagwi min,
na yin a tosho a Dagwi Darwey.
15Áaa waa, à jeng o!
Jeng Dagwi Darwey ya ga vey bagat,
jeng gawey yi na Dagwi Wo Reto Mwa.
16Wot sè bɛrɛng be sè wey na pyɛ̂ re mot
ko wot a tɔk ra pyɛ cak wɛt.
Be sè wey na yey pyɛng mot e Gbɔng Duk Re Fongol
wo Dagwi mot.
17Pyɛ́ de ba tus ya kushu e vwel na nehwogot.
Vit a pyɛ̂ yeneng de bê wɔ̀ tik e gban.
Ano, begban de ba ga hala vɛ hal
ba ga gabsa, ba tɛ́ ɛn barin.
18Yas ye rus!
Kàra berɔndɔng be tosho na rezot,
vit a sehwey yaga vɛ.
Kàra tyīmit ba sé sɔ reyɔm rining o.
19À Dagwi Darwey, ma sé tosho a hwo
yaga nekwɔn sehwey mwa na batîn cɔ́gɔt ba ga hworos,
yaga kya ha re yɛ.
20Ngyāma arɔng ya sé tosho a hwo
yaga nerɔt na ga hworos hwɔ́k-hwɔk,
kya ha ga re nekwɔn sehwey.
Currently Selected:
Yɔwɛl 1: bomBI
Highlight
Copy
Compare
Share
Want to have your highlights saved across all your devices? Sign up or sign in
© 2009 Nigeria Bible Translation Trust and Wycliffe Bible Translators, Inc. in cooperation with Berom Language and Translation Board
New Testament originally published by © 1984 International Bible Society and Nigeria Bible Translation Trust
